កីឡាអន្តរជាតិ
អន្តរជាតិ
ម្ចាស់ក្លិប PSG៖ ខ្ញុំសន្យាថា យើងនឹងឈ្នះ Champions League
× លោក Nasser Al-Khelaifi សន្យាថា Paris Saint-Germain នឹងឈ្នះពានរង្វាន់ UEFA Champions League នៅរដូវកាលក្រោយៗឆាប់ៗនេះ។ ប្រធានក្លិប PSG អះអាងដូច្នេះ ដោយភ្ជាប់ហេតុផលថា បរាជ័យក្រោមថ្វីជើង Bayern Munich នៅវគ្គផ្តាច់ព្រ័ត្របានរឹតតែបង្កើនជំនឿចិត្តកាន់តែច្រើនឡើងជាងពេលណាៗទាំងអស់។
PSG មិនអាចក៏សាងប្រវត្តិសាស្ត្រថ្មីជាមួយពានរង្វាន់កំពូលអឺរ៉ុបនៅឆ្នាំ២០២០នេះបាននោះទេ បន្ទាប់ពីខ្សែប្រយុទ្ធ Kingsley Coman ស៊ុតមួយគ្រាប់ដើម្បីជួយក្រុម Bayern Munich យកឈ្នះ ១-០ នាជំនួបផ្តាច់ព្រ័ត្រ។
ក្រុមយក្សបារាំង បានឈ្នះពានដល់ទៅ៤រួចទៅហើយក្នុងមួយរដូវកាល ២០១៩-២០ នេះ ប៉ុន្តែនៅតែមិនអាចដណ្តើមយក Champions League បាន បើទោះពួកគេបានវិនិយោគលើកីឡាករថ្លៃៗជាច្រើន ចាប់តាំងពីសេដ្ឋីកាតាឡើងទៅកាន់កាប់ចាប់តាំងពីឆ្នាំ ២០១១ មកក៏ដោយ។
បើទោះយ៉ាងនេះក្តី ប្រធានក្លិប PSG លោក Al-Khelaifi លើកឡើងថាការខិតខំប្រឹងប្រែងរបស់ ក្រុមក្នុងរដូវកាល ២០១៩-២០ នេះ ពិតជាបានបង្ហាញថា ពួកគេកាន់តែខិតជិតទៅរកការគ្រងជើងឯអឺរ៉ុបនេះក្នុងពេលពេលឆាប់ៗ។
លោក Al-Khelaifi បានប្រាប់ទូរទស្សន៍ RMC Sport ថា លោកពិតជាសោកស្តាយ ប៉ុន្តែកីឡាករទាំងអស់បានធ្វើរឿងដ៏អស្ចារ្យនៅរដូវកាលនេះ។ នៅវគ្គផ្តាច់ព្រ័ត្រ PSG ចាញ់ ១-០ មែន ប៉ុន្តែលោកក៏បានមើលឃើញថាក្រុមមានឱកាសច្រើនដែលស្ទើតែអាចរកបាន ២ ឬ ៣ គ្រាប់ឯណោះ។
អ្នកជំនួញសញ្ជាតិកាតាវ័យ៤៦ឆ្នាំ បន្ថែមថា៖« ខ្ញុំពិតជាមានមោទកភាពចំពោះកីឡាកររបស់ខ្ញុំណាស់។ យើងមានរដូវកាលដ៏អស្ចារ្យ ការប្រកួតដ៏អស្ចារ្យនៅទីនេះ។ យើងមានអ្វីគ្រប់យ៉ាងដែលយើងត្រូវការដើម្បីឈ្នះប៉ុន្តែយើងគ្មានសំណាង ព្រោះនោះជាបាល់ទាត់។ យើងនឹងបន្តខំប្រឹងដើម្បីឈ្នះនៅរដូវកាលក្រោយ។ ការប្រកួតលើកនេះ ធ្វើឲ្យយើងជឿជាក់ច្រើនជាងលើកមុនៗ។ ខ្ញុំសន្យាថា PSG នឹងឈ្នះជើងឯក Champions League មិនខាន»។
នេះជាការប្រកួតវគ្គផ្តាច់ព្រ័ត្ររបស់ PSG ក្នុងក្របខណ្ឌកំពូលអឺរ៉ុបលើកដំបូង ប៉ុន្តែជាលើកទី១១របស់ក្រុមយក្សអាល្លឺម៉ង់ Bayern Munich ដោយក្នុងនោះពួកគេឈ្នះជើងឯកចំនួន៦លើក៕
Tag:
Nasser Al-Khelaifi
Paris Saint-Germain
UEFA Champions League
© រក្សាសិទ្ធិដោយ thmeythmey.com