ស្ត្រីក្នុងវិស័យកីឡាសម័យថ្មី យល់ថាពាក្យចាស់ «២ឃ្លា» មិនត្រូវប្រើក្នុងពេលបច្ចុប្បន្ន

កីឡាជាតិ

ជាតិ

ស្ត្រីក្នុងវិស័យកីឡាសម័យថ្មី យល់ថាពាក្យចាស់ «២ឃ្លា» មិនត្រូវប្រើក្នុងពេលបច្ចុប្បន្ន

24, Aug 2020 , 8:29 pm

រូបភាព

ដោយ៖ ប៉ូ សុភា

ភ្នំពេញ៖ យុវតីកម្ពុជាដែលជ្រើសរើសការហាត់កីឡាប្រយុទ្ធដោយប្រើកម្លាំង និងថាមពលខ្លាំង លែងខ្វល់នឹងពាក្យចាស់បុរាណ ដែលថា «ស្ត្រីហាត់កីឡា គ្មានអ្នកស្រឡាញ់ និងមិនអាចមានកូន»ហើយ។ពួកគេចាត់ទុកពាក្យទាំងនេះ ជាការបង្អាក់ចិត្តពួកគេ មិនឲ្យស្រលាញ់កីឡាប៉ុណ្ណោះ។

កំពុងសម្រួលសរសៃសាច់ដុំរាងកាយ ក្រោយការហ្វឹកហាត់រួច កញ្ញា ម៉េង សេរីរចនា ជាកីឡាការនី ជម្រើសជាតិថ្នាល់របស់សហព័ន្ធកីឡាចំបាប់កម្ពុជា តែងតែឧស្សាហ៍ឮពាក្យថា«ស្ត្រីហាត់កីឡាប្រភេទប្រយុទ្ធនេះ គឺមិនមានប្រុសណាគេចូលដណ្តឹង »ឡើយ ។ ប៉ុន្តែយុរតីវ័យ ២២ឆ្នាំរូបនេះ មិនខ្វល់នឹងពាក្យសម្តីគេនោះទេ។

និយាយទាំងទឹកមុខរីករាយ យុវតី សេរីរចនា បានបកស្រាយថា៖ «ភាគច្រើនគេនិយាយបែបនេះ ប៉ុន្តែសម្រាប់ខ្ញុំមិនសូវបារម្ភទេ ព្រោះនេះមិនមែនជារឿងពិតទេ។ ពេលយើងមកហាត់រាល់ថ្ងៃ អ្នកចូលចិត្តកីឡាដូចគ្នាគេនឹងមើលឃើញ(ស្រឡាញ់)ហើយ»។

ជាកូនស្រីពៅ នៅក្នុងគ្រួសារមួយ ដែលមានបងប្អូន ៥នាក់ កីឡាការនី សេរីរចនា ជឿជាក់ខ្លាំងលើសុខភាពរាងកាយរបស់ខ្លួន ដោយមិនស្ទាក់ស្ទើរ នឹងលើកហេតុផលជាក់ស្តែងតបនឹងពាក្យថា «ហាត់កីឡាប្រើកម្លាំងខ្លាំងៗ ប្រយ័ត្នអត់មានកូន»ឡើយ។ កីឡាការនី មានមុខមូល សម្បុរស ដែលយកគំរូគ្រូបង្ហាត់ខ្លួន មកអនុវត្តនោះ បាននិយាយថា៖ « ខ្ញុំមកហាត់ប្រមាណជា ៣ឆ្នាំហើយ មានគ្រូស្រីៗច្រើនបង្ហាត់កីឡាបែបប្រយុទ្ធ គាត់ធ្លាប់ហាត់ខ្លាំងៗជាងខ្ញុំផង គាត់នៅតែអាចបង្កើតគ្រួសារមានកូន ជាក់ស្ដែងមានអ្នកគ្រូ ចូវ សុធារ៉ាអាចជាគំរូរសម្រាប់ពួកខ្ញុំ ។ អ៊ីចឹងហើយគ្មានរឿងអ្វីត្រូវខ្លាចទេ »។

«ស្ត្រី ម៉េចធ្វើចឹង(ហាត់កីឡាបោកចំបាប់) »។ នេះជាពាក្យម្តាយរបស់ សំណាង វណ្ណៈ ដែលជាកីឡាការនី ជម្រើសជាតិកីឡាតេក្វាន់ដូ( WTF) និយាយពេលឃើញ វណ្ណៈ កម្ដៅសាច់ដុំមុនហាត់ នៅផ្ទះម្តងៗ។

ពីមុនម្ដាយ សំណាង វណ្ណៈ មិនចង់ឲ្យកូនស្រី ហាត់កីឡាដែលប្រើកម្លាំងខ្លាំងដូចមនុស្សប្រុសឡើយ ដោយសារបារម្ភពីកូនស្រីផង និងពាក្យរិះគន់ពីសំណាក់សង្គមផង។

« ម្តាយរបស់ខ្ញុំនូវរក្សាទម្លាប់ចាស់បុរាណបន្តិច ព្រោះដោយសារគិតថា ខ្ញុំជាស្រីមិនគួរហាត់កីឡាបែបមនុស្សប្រុស មើលទៅមិនសម។នេះជារឿងកាលពីមុនទេ តែប៉ុន្មានរយៈពេលនេះ អ្នកម្តាយបានផ្លាស់ប្តូរការគិតរបស់គាត់មកគាំទ្រសកម្មភាពកីឡារបស់ខ្ញុំហើយ »។ នេះជាការលើកឡើងរបស់កីឡាការនី ជម្រើសជាតិកីឡាតេក្វាន់ដូ( WTF)។

កញ្ញា ហេង លី លី មិនយល់ស្របនឹងពាក្យចាស់បុរាណ ដែលបង្អាក់ផ្លូវចិត្តខ្លួន មិនឲ្យហាត់កីឡាដូចមនុស្សឡើយ ។ យុវតី លីលី តែងតែជម្នះរាល់ពាក្យនិន្ទាទាំងនោះ។ « កុំដោយសារពាក្យប៉ុន្មានម៉ាត់ធ្វើឲ្យយើង បោះបង់គោលបំណងដាច់ខាត ត្រូវប្រាកដចិត្តក្នុងសម្រេចធ្វើអ្វីមួយ»។ នេះជាការលើកឡើងរបស់ លីលី ដែលមិនខ្វល់ពាក្យថា «ហាត់កីឡាច្រើន ប្រយ័ត្នគ្មានអ្នកស្រលាញ់»។

ជាកីឡាការនីជម្រើសជាតិ ខេមរៈសហព័ន្ធយូដូ បាននិយាយថា ៖«សម័យឥឡូវ បើយើងគ្មានសមត្ថភាព ក៏គ្មានអ្នកណាគេមើលឃើញដែរ ទោះជាអ្នកមិនមែនជាអ្នកកីឡាក៏ដោយ។ ដូច្នេះហើយអ្នកមានសមត្ថភាព ទោះជាអ្នកធ្វើអ្វី ហាត់កីឡាប្រភេទណាក៏គេជ្រើសយកអ្នកដែរ ព្រោះចំនុចសំខាន់គឺ សមត្ថភាព»។

មានបទពិសោធន៍ចាស់វស្សាក្នុងវិស័យកីឡានេះ អ្នកគ្រូ ចូវ សុធារ៉ា ជាគ្រូបង្ហាត់កីឡាករជម្រើសជាតិក្នុងសហព័ន្ធកីឡាចំបាប់កម្ពុជា បាននិយាយថា ពាក្យរិះគន់លើស្ត្រីហាត់កីឡាទាំងនេះ គ្រាន់តែជាពាក្យសម្តីបង្អាក់ទឹកចិត្តតែប៉ុណ្ណោះ។ អ្នកគ្រូ ចូវ សុធារ៉ា ដែលមានកូន១នាក់ក្នុងបន្ទុកនោះ បាននិយាយដូច្នេះថា៖ បើកាលពីមុន អាចនិយាយថាជាការពិត។ តែបើសម័យនេះហើយ ពាក្យនេះគេឈប់ប្រើហើយ ដោយសារវិស័យសុខាភិបាលជឿនលឿន អ៊ីចឹងគ្មានកត្តានេះកើតឡើងទេ»។

បើតាមអ្នកគ្រូ សុធារ៉ា ការគ្មានកូន ឬគ្មានអ្នកណាស្រឡាញ់នោះ មិនអាស្រ័យលើការហាត់កីឡាប្រើកម្លាំងខ្លាំងនោះទេ។ «ចំពោះខ្ញុំអ្នកដែលនិយាយមកពីពួកគាត់ គិតថាយើងហាត់ខ្លាំងពេកចំពោះស្ត្រី តែកុំភ្លេចថាការហាត់ប្រាណបានត្រឹមត្រូវពិតជាល្អណាស់សម្រាប់ សុខភាពយើងទាំងអស់គ្នា ។ ស្ត្រីដែលមិនមានកូន គឺគ្មានហើយ មិនមែនទាល់តែហាត់កីឡាទើបអត់មានកូនទេ ខ្ញុំធ្លាប់ឆ្លងកាត់ទើបដឹង។សម្រាប់ខ្ញុំវិញលើកទឹកចិត្តឲ្យយុវតី លេងកីឡា ទាំងអស់គ្នា ដើម្បីសុខភាព និងជៀសឆ្ងាយពីគ្រឿងញៀន»។ នេះជាការលើកឡើងរបស់គ្រូបង្ហាត់ក្នុងសហព័ន្ធកីឡាចំបាប់កម្ពុជា។

យោងតាម គ្រូពេទ្យ កៅ លិកា ជំនាញពិគ្រោះរោគស្ត្រីនិងស្ត្រីមានផ្ទៃពោះ បានបកស្រាយដោយផ្អែកតាមវិទ្យាសាស្រសុខាភិបាល ផ្នែកវេជ្ជសាស្រថា ធម្មជាតិរបស់មនុស្សស្រី បើស្ត្រីមានសុខភាពល្អ អាចមានកូនបាន ទោះបីជាក្នុងស្ថានភាពណាក៏គ្មានបញ្ហាដែរ។ រីឯការធ្វើការធ្ងន់ៗ ឬការហាត់កីឡាដែលប្រើកម្លាំងខ្លាំងៗមិនចោទជាបញ្ហាឡើយ ពួកគេនៅតែអាចមានកូន តាមធម្មតា ដោយគ្មានផលប៉ះពាល់ទេ៕