អន្តរជាតិ
ចិន នឹងចែកផ្ដល់ព័ត៌មានធារាសាស្ត្រដល់ប្រទេសមេគង្គ ដើម្បីដោះស្រាយគ្រោះទឹកជំនន់និងរាំងស្ងួត នាយករដ្ឋមន្ត្រីចិន លោក លី ខឹឈាំង ថ្លែងនៅក្នុងកិច្ចប្រជុំកំពូលមេគង្គ-ឡានឆាង លើកទី៣ ពីរដ្ឋធានី ប៉េកាំង តាមរយៈប្រព័ន្ធវីដេអូ។ រូបថតចេញពីវីដេអូ Live ផ្ទាល់របស់ទំព័រហ្វេសប៊ុកនាយករដ្ឋមន្ត្រីកម្ពុជា
× នាយករដ្ឋមន្ត្រីចិន លោក លី ខឹឈាំង នៅថ្ងៃទី២៤ ខែសីហា បានប្រកាសថា រដ្ឋាភិបាលចិន នឹងចែករំលែកព័ត៌មានផ្នែកធារាសាស្ត្រនៃទន្លេឡានឆាងប្រចាំឆ្នាំដល់បណ្ដាប្រទេសមេគង្គ ដែលចាប់ផ្ដើមពីឆ្នាំនេះទៅ។ បើតាមមេដឹកនាំចិនរូបនេះ គោលដៅនៃការចែករំលែក គឺដើម្បីជួយបណ្ដាប្រទេសទាំងនេះដោះស្រាយបញ្ហាបម្រែបម្រួលអាកាសធាតុ ក៏ដូចជា គ្រោះទឹកជំនន់ និងគ្រោះរាំងស្ងួតផងដែរ។
ថ្លែងនៅក្នុងកិច្ចប្រជុំកំពូលមេគង្គ-ឡានឆាង លើកទី៣ ពីរដ្ឋធានី ប៉េកាំង តាមរយៈប្រព័ន្ធវីដេអូ នាយករដ្ឋមន្ត្រី លី ខឹឈាំង មាននិយាយដូច្នេះថា៖«ចិន មានឆន្ទៈផ្តល់ជំនួយបន្ថែមដល់ប្រទេសមេគង្គ-ឡានឆាងសម្រាប់ការប្រើប្រាស់ធនធានទឹកឲ្យកាន់តែប្រសើរឡើង»។
តាមការចុះផ្សាយរបស់ទីភ្នាក់ងារព័ត៌មាន Xinhua លោក លី សង្កត់ធ្ងន់ថា រដ្ឋាភិបាលចិន នឹងចូលរួមជាមួយបណ្ដាប្រទេសដទៃទៀតក្នុងឆ្នាំនេះ ដើម្បីកសាងវេទិកាចែករំលែកព័ត៌មានមួយពាក់ព័ន្ធកិច្ចសហប្រតិបត្តិការធនធានទឹក។ ដោយហៅប្រទេសមេគង្គ-ឡានឆាងទាំង៦នេះថា ជាសហគមន៍វាសនារួម ដែលតភ្ជាប់គ្នាដោយសារទឹកតែមួយនោះ លោកនាយករដ្ឋមន្ត្រីចិនរូបនេះ លើកឡើងថា កិច្ចសហប្រតិបត្តិការរបស់ពួកគេ ត្រូវបានប្រសូតឡើងដោយសារទឹក ។
« [ទឹក] គឺជាធាតុដ៏សំខាន់មួយក្នុងកិច្ចសហប្រតិបត្តិការនេះ ហើយពង្រឹងស្មារតីមិត្តភាពរបស់ប្រទេស LMC (កិច្ចសហប្រតិបត្តិការឡានឆាង-មេគង្គ) កិច្ចសហប្រតិបត្តិការឈ្នះឈ្នះ និងផលប្រយោជន៍ទៅវិញទៅមកផងដែរ»។ នេះការបញ្ជាក់របស់លោក លី នៅចំពោះមេដឹកនាំមីយ៉ាន់ម៉ា ឡាវ ថៃ កម្ពុជា និងវៀតណាម។
ក្រៅពីរឿងមេគង្គ-ឡានឆាង លោក លី ក៏មិនភ្លេចនិយាយដល់វិបត្តិសុខភាពសាធារណៈដែលពិភពលោកជួបប្រទះផងដែរ។ ក្នុងសុន្ទរកថានៅថ្ងៃដដែលនេះ នាយករដ្ឋមន្ត្រី លី បានប្រកាសថា ចិននឹងផ្ដល់អាទិភាពដល់បណ្ដាប្រទេសមេគង្គក្នុងការទទួលបានវ៉ាក់សាំង COVID-19 កាលណាវ៉ាក់សាំងចិន ត្រូវបានអភិវឌ្ឍរួចរាល់ និងដាក់ឲ្យប្រើប្រាស់។
«ចិន នឹងបង្កើតមូលនិធិពិសេសដើម្បីលើកកម្ពស់សុខភាពសាធារណៈក្រោមក្របខណ្ឌ មូលនិធិពិសេស LMC និងបន្តផ្ដល់សម្ភារប្រឆាំងជំងឺ COVID-10 ព្រមទាំងការគាំទ្របច្ចេកទេសដល់បណ្ដាប្រទេសមេគង្គផងដែរ»។ លោក លី អះអាងបែបនេះ។
ទន្លេមេគង្គ ដែលស្គាល់ថា ឡានឆាង ក្នុងប្រទេសចិន គឺជាផ្លូវទឹកដ៏សំខាន់សម្រាប់ការធ្វើដំណើរឆ្លងព្រំដែនក្នុងចំណោមប្រទេស ចិន ឡាវ មីយ៉ាន់ម៉ា ថៃ កម្ពុជា និង វៀតណាម។ បណ្ដាប្រទេសឡានឆាង-មេគង្គទាំង៦ បានបង្កើតយន្តការ LMC (កិច្ចសហប្រតិបត្តិការឡានឆាង-មេគង្គ) ក្នុងខែមីនា ឆ្នាំ២០១៦៕
Tag:
ចិន
លី ខឹឈាង
ទន្លេមេគង្គ
មេគង្គ-ឡានឆាង
© រក្សាសិទ្ធិដោយ thmeythmey.com