ជាតិ
សុខភាព
ស្ត្រី និងបុរសគួរសម្អាតប្រដាប់ភេទរបៀបណា ទើបចៀសវាងធ្លាក់សខុសប្រក្រតី?
×![]()
ភ្នំពេញ៖ ការធ្វើអនាម័យលើប្រដាប់ភេទ ជារឿងចាំបាច់បំផុតសម្រាប់បុរស-ស្ត្រី ព្រោះថាបើសម្អាតមិនបានត្រឹមត្រូវទេនោះ នឹងបង្កជាមេរោគលើសរីរាង្គភេទ និងបង្កជាជំងឺកាមរោគជាដើម។ តើបុរស-ស្ត្រី ត្រូវធ្វើអនាម័យប្រដាប់ភេទដូចម្តេច ទើបត្រឹមត្រូវ?
ដើម្បីជ្រាបច្បាស់សូមអញ្ជើញលោក-អ្នកនាងទស្សនាបទសម្ភាសរវាងកញ្ញា អ៊ុត រស្មី អ្នកសារព័ត៌មានថ្មីៗ ជាមួយកញ្ញា ឡេង កាណារីន វេជ្ជបណ្ឌិតផ្នែកសម្ភព និងរោគស្ត្រីនៃមន្ទីរពេទ្យស្ត្រីនគរទេព ដូចតទៅ៖
វេជ្ជបណ្ឌិតផ្នែកសម្ភព និងរោគស្ត្រី ឡេង កាណារីន បានលើកឡើងថា ការធ្វើអនាម័យប្រដាប់ឱ្យបានត្រឹមត្រូវ មិនពិបាកខ្លាំង មិនចំណាយថវិកាច្រើន និងពេលវេលាយូរនោះទេ។ ហើយការធ្វើអនាម័យឱ្យបានត្រឹមត្រូវនេះ នឹងអាចបង្ការការធ្លាក់សខុសប្រក្រតី និងជំងឺកាមរោគផ្សេងៗផងដែរ។
កញ្ញាវេជ្ជបណ្ឌិត ឡេង កាណារីន បានណែនាំពីរបៀបសម្អាតប្រដាប់ភេទស្ត្រីដូច្នេះថា៖«យើងត្រូវយកទឹកស្អាត ឬទឹកក្ដៅឧណ្ឌៗ ប៉ុន្តែ មិនបាច់ក្ដៅពេកទេ ព្រោះតំបន់សរីរាង្គភេទរបស់ស្ត្រីងាយប៉ះពាល់។ អីចឹងយើងប្រើទឹក ឬទឹកក្ដៅឧណ្ឌលាងពីមុខទៅក្រោយ ព្រោះថាខាងក្រោយជារន្ធលាមក កាលណាយើងលាងពីក្រោយមកមុខ ដូចយើងនាំមេរោគពីរន្ធលាមកចូលក្នុងទ្វារមាសយើងអីចឹង»។
វេជ្ជបណ្ឌិតនៃមន្ទីរពេទ្យស្ត្រីនគរទេព រូបនេះ បានបន្តថា ស្ត្រីត្រូវលាងផ្នែកខាងក្រៅប្រដាប់ភេទបានហើយ កុំលូកលាងផ្នែកខាងក្នុង ព្រោះអាចនាំមេរោគឱ្យចូលដល់ក្នុងទ្វារមាសស្ត្រី។ បន្ទាប់ពីលាងខាងក្រៅហើយ សូមផ្អិតនឹងកន្សែង ឬក្រណាត់ទន់ៗ កុំជូតខ្លាំងពេកវាអាចធ្វើឱ្យរលាក ឬឈឺនៅតំបន់ទ្វារមាស។
សម្រាប់ការប្រើប្រាស់ទឹកអនាម័យវិញ ស្ត្រីគួរតែប្រើនៅពេលមករដូវ ឬពេលបែកញើសខ្លាំងនៅតំបន់ប្រដាប់ភេទ ដោយចៀសវាងប្រើរាល់ថ្ងៃ ព្រោះវាអាចបំផ្លាញមេរោគល្អសម្រាប់ការពារប្រដាប់ភេទ នឹងធ្វើឱ្យងាយបង្កមេរោគចូលក្នុងទ្វារមាសស្ត្រី។
អត្ថបទទាក់ទង
ចំណែកបុរសវិញ ការសម្អាតប្រដាប់ភេទក៏មិនពិបាកដែរ ដោយបន្ទាប់ពីនោមរួច ត្រូវពន្លាត់ស្បែកគ្របលិង្គ ហើយលាងសម្អាតនឹងផ្អឹតជាមួយកន្សែងឱ្យបានស្អាត ដើម្បីចៀសវាងការដក់ទឹកនាមឬទឹក នៅនឹងស្បែកគ្របលិង្គ ដែលអាចបង្កជាមេរោគនៅប្រដាប់ភេទ។ នេះជាការបញ្ជាក់របស់វេជ្ជបណ្ឌិត ឡេង កាណារីន៕
Tag:
សម្អាត
ប្រដាប់ភេទ
ធ្លាក់ស
សុខភាព
© រក្សាសិទ្ធិដោយ thmeythmey.com
