COVID-19
អន្តរជាតិ
នយោបាយអន្តរជាតិ
បក្សសាធារណរដ្ឋ តែងតាំងលោក ត្រាំ ជាបេក្ខជនសម្រាប់ការបោះឆ្នោតខែវិច្ឆិកា ប្រធានាធិបតី ដូណាល់ ត្រាំ ថ្លែងក្នុងសន្និបាតបក្សសាធារណរដ្ឋ។ រូបភាព AFP
× លោក ដូណាល់ ត្រាំ បានបើកជាផ្លូវការយុទ្ធនាការការពារកៅអីប្រធានាធិបតីរបស់ខ្លួន បន្ទាប់ពីត្រូវបានបក្សសាធារណរដ្ឋតែងតាំងជាបេក្ខភាពប្រធានាធិបតីសម្រាប់ការបោះឆ្នោតខែវិច្ឆិកាខាងមុខ។ អំឡុងសន្និបាតបក្សដែលចាប់ផ្ដើមនៅថ្ងៃទី២៤ ខែសីហា លោក ត្រាំ មិនភ្លេចរិះគន់បក្សប្រជាធិបតេយ្យថា ព្យាយាមលួចសន្លឹកឆ្នោតរបស់លោកតាមរយៈជំរុញឲ្យបោះឆ្នោតតាមសំបុត្រ។ ម្ដងជាពីរដង លោក ត្រាំ ចោទថា ការបោះឆ្នោតតាមនេះ មិនផ្ដល់លទ្ធផលត្រឹមត្រូវឡើយ។
នៅថ្ងៃទីមួយនៃសន្និបាតបក្សសាធារណរដ្ឋដែលធ្វើឡើងបួនថ្ងៃ ប្រតិភូបក្សមកពីបណ្ដារដ្ឋ និងដែនដីអាមេរិកបានបោះឆ្នោតគាំទ្រលោក ដូណាល់ ត្រាំ ជាផ្លូវការឲ្យធ្វើជាបេក្ខជនតំណាងបក្សចូលរួមក្នុងការបោះឆ្នោតជ្រើសរើសប្រធានាធិបតីនៅថ្ងៃទី៣ ខែវិច្ឆិកាខាងមុខ។ លោក ត្រាំ ត្រូវតទល់ជាមួយលោក ចូ បៃឌិន បេក្ខភាពតំណាងបក្សប្រជាធិបតេយ្យ។
មិនទុកយូរឡើយ មិនប៉ុន្មាននាទីក្រោយត្រូវបានតែងតាំងជាផ្លូវការ លោក ត្រាំ ក៏ឡើងឆាកកាន់ម៉េក្រូក្នុងពិធីដែលធ្វើនៅទីក្រុង Charlotte ក្នុងរដ្ឋ North Carolina ហើយនិយាយជិតមួយម៉ោង។ ជាធម្មតា បេក្ខជនប្រធានាធិបតី នឹងចេញមុខនៅថ្ងៃចុងក្រោយនៃសន្និបាតដើម្បីទទួលយកការតែងតាំងជាផ្លូវការ។ បក្សប្រជាធិបតេយ្យ និងការអនុញ្ញាតឲ្យបោះឆ្នោតតាមសំបុត្រ ជាមុខសញ្ញាដែលលោក ត្រាំ រិះគន់មិនប្រណីមាត់អ្វីឡើយ។
ពីនាទីដំបូង លោក ត្រាំ ប្រាប់ប្រតិភូបក្សឲ្យប្រយ័ត្នពីផែនការរបស់បក្សប្រជាធិបតេយ្យដែលជំរុញឲ្យបោះឆ្នោតតាមសំបុត្រក្រោមហេតុផលបារម្ភពីជំងឺ COVID-19 ។ «ពួកគេព្យាយាមលួចការបោះឆ្នោតនេះ។ វិធីតែមួយគត់ដែលពួកគេអាចយកការបោះឆ្នោតពីយើងបាន គឺការបោះឆ្នោតនេះត្រូវរៀបចំជាស្រេច។» នេះជាការលើកឡើងរបស់លោក ត្រាំ ទៅកាន់សមាជិកបក្សសាធារណរដ្ឋដែលភាគច្រើនចូលរួមសន្និបាតនេះតាមរយៈប្រព័ន្ធវីដេអូពីចម្ងាយ។
ខណៈបក្សប្រជាធិបតេយ្យលើកយក COVID-19 ដើម្បីការពារការបោះឆ្នោតតាមសំបុត្រ លោក ត្រាំ ចង់ឲ្យអ្នកបោះឆ្នោតទាំងអស់ទៅបោះឆ្នោតដោយផ្ទាល់វិញ សំដៅធានាសុក្រឹត្យភាព។ មានម្ដងនោះ លោក ត្រាំ និយាយថា បើពលរដ្ឋអាមេរិកចូលរួមបាតុកម្មបាន ពួកគេក៏អាចទៅបោះឆ្នោតដោយផ្ទាល់បានដែរ។
ទាំងបក្សប្រជាធិបតេយ្យ ទាំងក្រុមប្រឆាំងលោក ត្រាំ ចាត់ទុកការជំទាស់របស់លោកប្រធានាធិបតីទៅនឹងការពង្រីកលទ្ធភាពបោះឆ្នោតតាមសំបុត្រ ជាការគាបសង្កត់ចំនួនអ្នកទៅបោះឆ្នោត ខណៈការបោះឆ្នោតរបៀបនេះត្រូវបានអនុវត្តយ៉ាងទូលាយនៅអាមេរិករួចទៅហើយ។ ម្យ៉ាង គេក៏ជឿថា លោក ត្រាំ កំពុងរៀបក្រឡាទុកមុនដើម្បីតវ៉ា បើលោកចាញ់ឆ្នោតខែវិច្ឆិកាមែននោះ។ លទ្ធផលស្ទង់មតិកន្លងមកបង្ហាញថា លោក បៃឌិន នឹងឈ្នះលោក ត្រាំ ៕
Tag:
អាមេរិក
ដូណាល់ ត្រាំ
បក្សសាធារណរដ្ឋ
© រក្សាសិទ្ធិដោយ thmeythmey.com