នៅថ្ងៃទី២៤ ខែសីហា ក្រុមហ៊ុន TikTok និងបុគ្គលិករបស់ខ្លួនម្នាក់បានដាក់បណ្តឹងដោយឡែកពីគ្នា ដោយប្តឹងរដ្ឋបាលប្រធានាធិបតី ដូណាល់ ត្រាំ ដែលបានចេញបញ្ជាប្រតិបត្តិហាមកម្មវិធីកម្សាន្តវីដេអូខ្លីៗនេះ ធ្វើប្រតិបត្តិការក្នុងទឹកដីអាមេរិក។ ក្រុមហ៊ុន TikTok និងបុគ្គលិកខ្លួន បានចាត់ទុកបញ្ជានេះជាលេសរបស់លោក ត្រាំ ដើម្បីជាប់ឆ្នោតជាថ្មី។ ទីក្រុងប៉េកាំងវិញ បានគាំទ្រចំណាត់ការផ្លូវច្បាប់បែបនេះ។
ក្រុមហ៊ុនTikTok និង ByteDance បានដាក់ពាក្យបណ្តឹងទៅតុលាការសហព័ន្ធក្នុងរដ្ឋកាលីហ្វ័រនីញ៉ា ឲ្យចេញសេចក្តីបង្គាប់មួយផ្អាកអនុវត្តបញ្ជាប្រតិបត្តិរបស់លោក ដូណាល់ ត្រាំ ដែលចេញនៅកាលពីថ្ងៃទី៦ សីហា។ ក្រុមហ៊ុន TikTok បានអះអាងថា រដ្ឋបាលលោក ត្រាំ បានបំពានសិទ្ធិធម្មនុញ្ញរបស់ខ្លួនក្នុងការចូលរួមក្នុងនីតិវិធី ព្រោះមិនបានផ្តល់ឱកាសឲ្យក្រុមហ៊ុនបានបកស្រាយចំពោះការចោទប្រកាន់។
បន្ថែមពីនេះ TikTok ក៏បានចោទលោក ត្រាំ ផងដែរថា គ្មានមូលដ្ឋានត្រឹមត្រូវក្នុងការចេញបញ្ជាប្រតិបត្តិខាងលើឡើយ។ ម្យ៉ាងទៀត លោក ត្រាំ ក៏បានប្រើប្រាស់ច្បាប់ International Emergency Economic Powers ដែលអនុញ្ញាតឲ្យប្រធានាធិបតី ចាត់វិធានការលើពាណិជ្ជកម្មអន្តរជាតិ នៅពេលមានអាសន្នជាតិ ដោយមិនត្រឹមត្រូវដែរ។ នេះបើតាមការផ្សាយរបស់ទីភ្នាក់ងារព័ត៌មាន Reuters ។
ក្នុងបណ្ដឹងដាក់ទៅកាន់តុលាការទីក្រុង Los Angeles ឈ្មោះលោក ត្រាំ ក្រសួងពាណិជ្ជកម្ម និងរដ្ឋមន្ត្រីពាណិជ្ជកម្ម Wilbur Ross ជាចុងចោទ។
បញ្ជាប្រតិបត្តិរបស់លោកត្រាំ កាលពីថ្ងៃទី៦ សីហា បានហាមមិនឲ្យ TikTok បន្តប្រតិបត្តិការនៅរយៈពេល៤៥ថ្ងៃខាងមុខ ពោលគឺនៅថ្ងៃទី១៥ កញ្ញាទៅត បើក្រុមហ៊ុនមិនផ្លាស់ប្ដូរម្ចាស់ទេនោះ។ លោកត្រាំ អះអាងថា TikTok ជាការគំរាមសន្តិសុខជាតិ ព្រោះពួកគេអាចចែករំលែកព័ត៌មានរបស់អ្នកប្រើប្រាស់ជាមួយរដ្ឋាភិបាលចិន។
ក្រៅតែពីខាងក្រុមហ៊ុន បុគ្គលិក TikTok ក៏បានដាក់ពាក្យបណ្តឹងដែរ។ លោក Patrick Ryan ដែលជាអ្នកចាត់ការកម្មវិធីរបស់ TikTok ដោយលើកឡើងពីការបារម្ភចំពោះការបាត់បង់ការងាររបស់ខ្លួន និងរបស់បុគ្គលិកជាង១,៥០០នាក់ទៀត បើសិនជាបញ្ជាប្រតិបត្តិនេះនឹងត្រូវបានយកទៅអនុវត្ត។ ភាគច្រើននៃបុគ្គលិកទាំងនេះ កាន់ទិដ្ឋាការការងារផងដែរ។
TikTok មិនមែនជាក្រុមហ៊ុនចិនដំបូងឡើយ ដែលត្រូវរដ្ឋបាលលោក ត្រាំ ចាត់ទុកជាការគំរាមដល់សន្តិសុខជាតិអាមេរិក។ ក្រុមហ៊ុនទូរគមនាគមន៍ Huawei និងកម្មវិធីសន្ទនា WeChat របស់ចិន ក៏កំពុងជួបជោគវាសនាដូចគ្នាដែរ ជាពិសេសក្នុងបរិបទដែលទំនាក់ទំនងរវាងចិន និងអាមេរិកកាន់តែប្រេះឆាខ្លាំង។
ក្រោយលោក ត្រាំ ចេញបញ្ជាខាងលើ ក្រុមហ៊ុន ByteDance ដែលជាក្រុមហ៊ុនមេរបស់ TikTok បានបើកការចរចាជុំវិញការលក់ប្រតិបត្តិការរបស់ TikTok នៅអាមេរិកខាងជើង អូស្ត្រាលី និងនូវែលសេឡង់ ជាមួយក្រុមហ៊ុន Microsoft Corp និង Oracle Corp ។ យ៉ាងណាមិញ គេមិនទាន់ឃើញមានរបាយការណ៍ទាក់ទងការចរចាឡើយ។
ចំពោះការប្តឹងប្ដល់ប្រឆាំងរដ្ឋបាលលោក ត្រាំ នេះដែរ លោក Zhao Lijian អ្នកនាំពាក្យក្រសួងការបរទេសចិន បានអះអាងថា ចិនគាំទ្រក្រុមហ៊ុនដែលពាក់ព័ន្ធក្នុងការប្រើប្រាស់ផ្លូវច្បាប់ ដើម្បីការពារសិទ្ធិ និងប្រយោជន៍ស្របច្បាប់ និងបន្តយ៉ាងរឹងមាំក្នុងការចាត់វិធានការការពារសិទ្ធិ និងប្រយោជន៍របស់ក្រុមហ៊ុនចិន។ លោក Zhao និយាយបែបនក្នុងការសន្និសីទព័ត៌មានថ្ងៃទី២៤ ខែសីហា។