ក្រសួងដកបណ្ណសមធម៌ពីពលរដ្ឋជាង៧ពាន់គ្រួសារ ក្រោយរកឃើញបន្លំ និងមានជីវភាពប្រសើរឡើងវិញ

ជាតិ

ក្រសួងដកបណ្ណសមធម៌ពីពលរដ្ឋជាង៧ពាន់គ្រួសារ ក្រោយរកឃើញបន្លំ និងមានជីវភាពប្រសើរឡើងវិញ

25, Aug 2020 , 3:06 pm

រូបភាព

ក្រុមការងារចម្រុះរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា និងក្រសួងផែនការ បានចុះពិនិត្យស្ថានភាពជាក់ស្តែងនៃការធ្វើបណ្ណសមធម៌របស់គ្រួសារក្រីក្រ ដែលជាក្រុមគ្រួសារសាច់ញាតិរបស់លោកមេឃុំរលាំងគ្រើល ស្រុកសំរោងទង ខេត្តកំពង់ស្ពឺ កាលពីថ្ងៃ៣១ កក្កដា ២០២០។(រូបពីទំព័រហ្វេសប៊ុករបស់ក្រសួងសង្គមកិច្ច)

ដោយ: ឡាយ សុភាវតី

ភ្នំពេញ៖ ក្រសួងផែនការបានដកបណ្ណធម៌ពីពលរដ្ឋជាង៧ពាន់គ្រួសារវិញ ក្រោយរកឃើញថា ពួកគេបានបន្លំជាជនក្រីក្រ និងខ្លះទៀត មានជីវភាពប្រសើរឡើងវិញ។ ពលរដ្ឋជាង៧ពាន់គ្រួសារនេះ បានបើកប្រាក់ឧបត្ថមក្នុងខែដំបូងប៉ុណ្ណោះ មុននឹងត្រូវដកបណ្ណវិញ។

អ្នកនាំពាក្យក្រសួងផែនការលោក ស្រី ដា បានបញ្ជាក់ប្រាប់សារព័ត៌មានថ្មីៗថា ភាពមិនប្រក្រតីជាង៧ពាន់បណ្ណនេះ កើតឡើងដោយសារការយោគយល់និងខ្វះការពិនិត្យពីសំណាក់អាជ្ញាធរ ។ បើតាមលោក ស្រី ដា ក្រសួងក៏បានការព្រមាននិងណែនាំអាជ្ញាធរលើបញ្ហាការងារទាំងនេះហើយ។

«យើងសង្កេតឃើញមានភាពមិនប្រក្រតីជាច្រើនបានកើតឡើង ដោយសារគ្រួសារដែលមានជីវភាពធូរធារ មានភាពច្រណែននឹងការទទួលបានការឧបត្ថម្ភសាច់ប្រាក់ពីរាជរដ្ឋាភិបាល មានការកើនឡើងបន្តទៅធ្វើការដាក់ពាក្យសម្ភាស ដែលបានធ្វើការរំខានដល់អាជ្ញាធរមូលដ្ឋាន ក៏ដូចជាក្រុមការងាររបស់មន្ទីរផែនការរាជធានីខេត្តក្រុងទូទាំងប្រទេស ដែលកំពុងតែមមាញឹកស្វែងរកគ្រួសារក្រីក្រពិតប្រាកដ ក៏ដូចជាដកចេញគ្រួសារដែលមានជីវភាពធូរធារឬក៏បន្លំ»។ នេះបើតាមបញ្ជាក់របស់លោក ស្រី ដា ដែលបានសង្កេតឃើញពីភាពមិនប្រក្រតី ក្នុងដំណើរការធ្វើបណ្ណសមធម៌ជុំទី៣។

ចំពោះគ្រួសារដែលមានបណ្ណសមធម៌ជាង៧ពាន់នោះ បានបើកប្រាក់ឧបត្ថម្ភតែលើកដំបូងនៅក្នុងខែទី១តែប៉ុណ្ណោះ ហើយក៏ត្រូវបានហូតបណ្ណវិញតែម្ដង។ នេះបើតាមការអះអាងរបស់លោក តូច ចាន់នី អ្នកនាំពាក្យក្រសួងសង្គមកិច្ច ដែលបានបន្ថែមថា ប្រាក់ដែលពលរដ្ឋបន្លំជាជនក្រីក្រ បើកយកទៅប្រើប្រាស់នោះ គឺក្រុមការងារមិនប្រមូលត្រឡប់យកវិញឡើយ ដើម្បីកុំឲ្យមានបញ្ហាតវ៉ាណាមួយកើតឡើង។

បើតាមលោក តូច ចាន់នី បញ្ហាប្រឈមដែលតែងតែកើតមានពាក់ព័ន្ធនឹងការបើកប្រាក់ឧបត្ថម្ភនេះ ភាគច្រើនមកពីពលរដ្ឋបន្លំជាជនក្រីក្រ, កន្លែងដកប្រាក់បន្លំដកសេវាកម្ម ,បាត់បណ្ណសមធម៌ និងពលរដ្ឋខ្លះផ្លាស់ប្តូរជីវភាពប្រសើរឡើងវិញជាដើម។

អ្នកនាំពាក្យក្រសួងទាំងពីរនេះ សុទ្ធតែបានអះអាងថា ក្រុមការងារក្រសួងទាំង២ បានដោះស្រាយជាប្រចាំ រាល់ពេលទទួលបានព័ត៌មានជុំវិញភាពមិនប្រក្រតីណាមួយ ពាក់ព័ន្ធបណ្ណសមធម៌នេះ ដើម្បីបញ្ឈប់ភាពខ្វះចន្លោះនិងសម្រួលបញ្ហាដល់ពលរដ្ឋ។

នៅអំឡុងពេលកូវីដ-១៩នេះ ក្រសួងផែនការបានចុះធ្វើបណ្ណសមធម៌បាន៣ជុំហើយ សម្រាប់ពលរដ្ឋក្រីក្របើកប្រាក់ឧបត្ថម្ភប្រចាំខែមិថុនា កក្កដា និងសីហា។ សរុបទាំងបីជុំនេះ មានគ្រួសារក្រីក្រសរុបជិត៦៧ម៉ឺនគ្រួសារ ស្មើនឹងប្រជាជនក្រីក្រ ២លាន៦សែននាក់។ នេះបើតាមរបាយការណ៍របស់ក្រសួងផែនការ។

នៅថ្ងៃទី២៤សីហានេះ ក្រសួងសង្គមកិច្ចបានបញ្ចប់ការបើកប្រាកឧបត្ថម្ភជុំទី១ ដែលមានរយៈពេល២ខែ ដោយចំណាយទឹកប្រាក់ប្រមាណ២០សែនលានរៀល ដល់គ្រួសារជាង៥៩ម៉ឺនគ្រួសារ៕