អន្តរជាតិ
នយោបាយអន្តរជាតិ
Facebook បិទមិនចូលមើល Group មួយដែលរិះគន់រាជានិយមថៃ ក្រោយមានសំណើពីរដ្ឋាភិបាល បណ្តាញសង្គម Facebook។រូបភាព៖ AFP
× ក្រុមហ៊ុន Facebook នៅថ្ងៃទី២៤ ខែសីហា បានរាំងខ្ទប់មិនឲ្យអ្នកប្រើប្រាស់ក្នុងប្រទេសថៃ អាចចូលទៅមើលគ្រុប (Group) មួយដែលសមាជិក១លាននាក់។ វិធានការរបស់ Facebook នេះ ធ្វើឡើងបន្ទាប់ពីរដ្ឋាភិបាលថៃ គំរាមចាត់វិធានការផ្លូវច្បាប់លើក្រុមហ៊ុនបច្ចេកវិទ្យាយក្សមួយនេះ ដែលមិនលុបចោលមាតិកាដែលប៉ះពាល់មហាក្សត្រ។ ប៉ុន្តែ Facebook អះអាងថា ខ្លួននឹងតទល់តាមផ្លូវច្បាប់ដើម្បីការពារអ្នកប្រើប្រាស់របស់ខ្លួន
ការទាមទារ របស់រដ្ឋាភិបាលថៃទៅលើក្រុមហ៊ុន Facebook ឲ្យដកចេញការផ្សព្វផ្សាយដែលប៉ះពាល់ព្រះមហាក្សត្រ មហា វជិរាលង្ករណ៍ ធ្វើឡើង បន្ទាប់ពីមានបាតុកម្មសឹងតែរៀងរាល់ថ្ងៃដែលរៀបចំដោយយុវជនដែលប្រឆាំងទៅនឹងរដ្ឋាភិបាល និងទាមទារឲ្យមានកំណែទម្រង់របបរាជានិយមដែលជារឿងកម្រមានពីមុនមក។
បើតាមទីភ្នាក់ងារព័ត៌មាន Reuters គ្រុបនៅក្នុងបណ្តាញសង្គម Facebook ដែលត្រូវបានបិទមិនឲ្យអ្នកប្រើប្រាស់នៅថៃចូលទៅបាន មានឈ្មោះថា Royalist Marketplace ។ ក្រុមនេះបានបង្កើតឡើងនៅខែមេសា ឆ្នាំ២០២០ ដោយលោក Pavin Chachavalpongpun អ្នករិះគន់របបរាជានិយមថៃ និងកំពុងនិរទេសខ្លួននៅក្រៅប្រទេស។
គ្រុបនេះ ត្រូវបាន Facebook បិទ នៅយប់ថ្ងៃទី២៤ សីហា ជាមួយនឹងការអះអាងថា ធ្វើតាមការសំណើរផ្លូវច្បាប់របស់ក្រសួងសេដ្ឋកិច្ចឌីជីថល និងសង្គមរបស់ថៃ។ លោក Pavin ដែលជាអ្នកបង្កើតក្រុមនេះបានប្រតិកម្មថា Facebook កំពុងធ្វើតាមសម្ពាធរបស់រដ្ឋាភិបាលថៃ។ សកម្មជនរូបនិយាយការពារថា គ្រុបក្នុង Facebook នេះជាផ្នែកមួយនៃដំណើរការលទ្ធិប្រជាធិបតេយ្យ និងជាលំហនៃសេរីភាពបញ្ចេញមតិផងដែរ។
ទោះបីបានរាំងខ្ទប់មិនឲ្យចូលមើលនៅពេលនេះក្តី Facebook បានចេញសេចក្តីថ្លែងការណ៍មួយថា ការទាមទាររបស់ថៃ គឺធ្ងន់ធ្ងរ ផ្ទុយទៅនឹងច្បាប់សិទ្ធិមនុស្សអន្តរជាតិ និងមានផលប៉ះពាល់ដល់ការបញ្ចេញមតិរបស់អ្នកប្រើប្រាស់។ Facebook បន្ថែមថា ខ្លួនកំពុងធ្វើការដើម្បីការពារសិទ្ធិអ្នកប្រើប្រាស់អ៊ីនធឺណិតគ្រប់រូប និងរៀបចំតទល់នឹងការទាមទាររបស់រដ្ឋាភិបាលថៃតាមផ្លូវច្បាប់ផងដែរ។
សូមបញ្ជាក់ថា នៅដើមខែសីហានេះ រដ្ឋមន្ត្រីក្រសួងសេដ្ឋកិច្ចឌីជីថល និងសង្គមថៃ បានចោទ Facebook ថា មិនគោរពតាមសំណើក្នុងការរឹតត្បិតការផ្សព្វផ្សាយព័ត៌មានខ្លះ ដោយរួមបញ្ចូលព័ត៌មានដែលប្រមាថរបបរាជានិយមផងដែរ។ នៅថ្ងៃទី១០ រដ្ឋមន្ត្រីក្រសួងដដែល ទុកពេលឲ្យ Facebook ១៥ថ្ងៃក្នុងការអនុវត្តបញ្ជារបស់តុលាការ ឬក៏ត្រូវចោទប្រកាន់ក្រោមច្បាប់បទល្មើសកុំព្យូទ័រ ដែលអាចរងការពិន័យទឹកប្រាក់២សែនបាតស្មើនឹង ៦៣៦៧ដុល្លារអាមេរិក ហើយបើមិនអនុវត្តតាម ត្រូវពិន័យ៥ពាន់បាតក្នុងមួយថ្ងៃ រហូតដល់ពេលអនុវត្ត។
ចំណែកឯកាលពីសប្តាហ៍មុន ក្រសួងសេដ្ឋកិច្ចឌីជីថល បានដាក់ពាក្យបណ្តឹងដោយឡែក ដោយបានប្តឹងលោក Pavin ដែលបានបង្កើតគ្រុប Facebook នេះ។ នៅថៃ ការប្រមាថព្រះមហាក្សត្រអាចនឹងត្រូវកាត់ទោសឲ្យជាប់ពន្ធនាគារដល់ទៅ១៥ឆ្នាំ៕
© រក្សាសិទ្ធិដោយ thmeythmey.com