ជាតិ
លោក ទេព សុគន្ធ អតីតនាយករងវិទ្យាល័យព្រះស៊ីសុវត្ថិទទួលមរណភាពក្នុងអាយ៧៥ឆ្នាំ
× លោក ទេព សុគន្ធ អតីតនាយករងវិទ្យាល័យព្រះស៊ីសុវត្ថិ បានទទួលមរណភាពកាលពីវេលាម៉ោង០០ និង៤៥នាទីរំលងអធ្រាត្រឈានចូលថ្ងៃពុធ ទី២៦ ខែសីហា ឆ្នាំ២០២០ ក្នុងអាយុ៧៥ឆ្នាំ ដោយយរោគាពាធ។ នេះបើតាមការអះអាងរបស់អ្នកស្រី ម៉ក់ ដានី នាយិការងបច្ចុប្បន្ន។
លោក ទេព សុគន្ធ បានរួមចំណែកបណ្តុះបណ្តាលធនធានជាច្រើនក្នុងតួនាទីលោកក្នុងគណៈគ្រប់គ្រងនៃវិទ្យាល័យព្រះស៊ីសុវត្ថិ កណ្តាលរាជធានីភ្នំពេញ។ អ្នកស្រី ម៉ក់ ដានី បានបញ្ជាក់ថា លោក ទេព សុគន្ធ ធ្វើជាគ្រូភូមិវិទ្យានៅវិទ្យាល័យព្រះស៊ីសុវត្ថិ តាំងពីឆ្នាំ១៩៨៣ដល់ឆ្នាំ១៩៨៥។ ចាប់ពីឆ្នាំ១៩៨៥ដល់ឆ្នាំ២០០៩ លោកមានតួនាទីជានាយករង។
«តាមពិតទៅអណត្តិរបស់គាត់ជានាយករង គឺរហូតដល់ឆ្នាំ២០១១ ប៉ុន្តែដោយសារគាត់មានជំងឺទើបសម្រេចចិត្តសុំចូលនិវត្តន៍នៅឆ្នាំ២០០៩»។ នេះបើតាមការអះអាងរបស់អ្នកស្រី ម៉ក់ ដានី។
សុខភាពលោកបានធ្លាក់ដុនដាបកាលពីអំឡុងខែមេសា កន្លងមក ដែលត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែត។ បើតាមអ្នកស្រី ម៉ី ទិន្នកា គ្រូមុខវិជ្ជាគីមី ដែលជាក្មួយម្នាក់របស់លោក ទេព សុគន្ធ អតីតគ្រូបង្រៀនរូបនេះ មានជំងឺរ៉ាំរៃអស់រយៈពេលប្រមាណ១៦ឆ្នាំហើយ ដោយមានជំងឺខួរក្បាល ក្រលៀន ហើយក្រោយមកតម្រងនោម ដែលធ្វើទុក្ខលោកកាន់តែខ្លាំងរហូតដល់ទទួលមរណភាព។ ថវិកាដែលព្យាបាលលោក ទេព សុគន្ធ កន្លងមក មួយផ្នែកធំ បានមកពីអតីតសិស្សវិទ្យាល័យព្រះស៊ីសុវត្ថិផ្ទាល់។
សពលោក ទេព សុគន្ធ ត្រូវតម្កល់ធ្វើបុណ្យ នៅផ្ទះលេខ ៥៦c ផ្លូវ ២០៤ សង្កាត់ទឹកល្អក់ ៣ ខណ្ឌ ទួលគោក រាជធានីភ្នំពេញ ៕
© រក្សាសិទ្ធិដោយ thmeythmey.com