COVID-19
អន្តរជាតិ
លោកស្រី គ្លីនតុន ប្រាប់លោក បៃឌិន កុំទាន់ចុះចាញ់ បើសំឡេងឆ្នោតប្រទាញប្រទង់
× អតីតបេក្ខជនប្រធានាធិបតីអាមេរិក លោកស្រី ហ៊ីឡារី គ្លីនតុន នៅថ្ងៃទី២៥ ខែសីហា បានលើកជាយោបល់ឲ្យលោក ចូ បៃឌិន មិនត្រូវចុះចាញ់ជាដាច់ខាតក្នុងការបោះឆ្នោតខែវិច្ឆិកាខាងមុខ ពិសេសនៅរដ្ឋដែលមានសំឡេងប្រកៀកប្រកិតគ្នា។ បើតាមលោកស្រី គ្លីនតុន លោក បៃឌិន ត្រូវរង់ចាំឲ្យការរាប់សន្លឹកចប់សព្វគ្រប់សិន ខណៈលទ្ធផលសម្រាប់ការបោះឆ្នោតលើកនេះ ទំនងជាមិនត្រូវបានប្រកាសភ្លាមៗនៅថ្ងៃបោះឆ្នោតដូចរាល់ដងឡើយ។
លោកស្រី ហ៊ីឡារី គ្លីនតុន ដែលចាញ់លោក ដូណាល់ ត្រាំ ក្នុងការបោះឆ្នោតប្រធានាធិបតីឆ្នាំ២០១៦ បានអះអាងក្នុងកិច្ចសម្ភាសមួយថា លទ្ធផលនៃការបោះឆ្នោតប្រធានាធិបតីថ្ងៃទី៣ ខែវិច្ឆិកាឆ្នាំនេះ ទំនងជាមិនអាចចេញភ្លាមៗនៅថ្ងៃបោះឆ្នោតដដែលឡើយ ព្រោះសន្លឹកឆ្នោតមួយភាគធំ ដែលនឹងផ្ញើតាមសំបុត្រ អាចត្រូវបានរាប់យឺត។ ក្នុងន័យនេះ លោកស្រី គ្លីនតុន ប្រាប់លោក ចូ បៃឌិន បេក្ខជនតំណាងបក្សប្រជាធិបតេយ្យឲ្យរក្សាជំហរមិនទទួលយកលទ្ធផលដែលរាប់ភ្លាមៗ។
ការបោះឆ្នោតតាមសំបុត្រនេះ ត្រូវបានលោក ត្រាំ ប្រឆាំងយ៉ាងខ្លាំង ដោយលោកអះអាងថា នឹងនាំឲ្យមានការបោះឆ្នោតមិនត្រឹមត្រូវ ហើយចង់ឃើញអ្នកបោះឆ្នោតអាមេរិកទៅបោះឆ្នោតដោយផ្ទាល់វិញ។ សម្រាប់លោក ត្រាំ ការចេញទៅបោះឆ្នោតដោយផ្ទាល់ នឹងជួយលោកកាន់តែច្រើន។ ប៉ុន្តែបក្សប្រជាធិបតេយ្យចង់បានការបោះឆ្នោតរបៀបនេះដែលបច្ចុប្បន្នត្រូវបានប្រើប្រាស់ស្រាប់ហើយនោះ ដោយលើកឡើងពីការរាលដាលជំងឺ COVID-19 ។
«លោក ចូ បៃឌិន មិនគួរដកថយឡើយទោះក្នុងកាលៈទេសៈណាមួយ ព្រោះខ្ញុំគិតថា លទ្ធផល នឹងអូសបន្លាយ ហើយខ្ញុំជឿថា លោកនឹងឈ្នះ ប្រសិនបើយើងមិនថយសូម្បីមួយអ៊ីញ...។» នេះជាការលើកឡើងរបស់លោកស្រី គ្លីនតុន ក្នុងកិច្ចសម្ភាសជាមួយកម្មវិធី The Circus. នៅថ្ងៃទី២៥ ខែសីហា។ ការប្រកួតប្រជែងនៅតាមរដ្ឋដែលមានសំឡេងប្រទាញប្រទង់ ជាអ្វីដែលលោកស្រី គ្លីនតុន ប្រាប់លោក បៃឌិន ឲ្យរក្សាភាពរឹងមាំ មុនលទ្ធផលផ្លូវការប្រកាស។
តាមពិតទៅ ក្ដីបារម្ភទាក់ទងនឹងការពន្យារពេលចេញលទ្ធផលឆ្នោតនេះ ត្រូវបានបក្សទាំងពីរលើកឡើងដូចគ្នា។ គេរំពឹងថា ការបោះឆ្នោតតាមសំបុត្រ នឹងកើនឡើងក្នុងការបោះឆ្នោតខែវិច្ឆិកាខាងមុខ ព្រោះ COVID-19 នៅបន្តរាលដាលមិនទាន់ស្រាកស្រាន្តនៅឡើយ។ ចំណែកលោក ត្រាំ វិញ បានប្រឆាំងការផ្ដល់លុយបន្ថែមសម្រាប់សេវាកម្មប្រៃសណីយ៍អាមេរិក ព្រោះលោកដឹងថា លុយទាំងនោះ នឹងត្រូវប្រើក្នុងការការដឹកជញ្ជូនសន្លឹកឆ្នោត។
ម្ដងជាពីរដង លោក ត្រាំ និយាយដោយគ្មានព័ស្តុតាងថា ការបោះឆ្នោតលើកនេះ ត្រូវបានកំណត់ទុកមុនហើយតាមរយៈការបោះឆ្នោតតាមសំបុត្រ ដែលនេះជាអ្វីដែលបក្សប្រជាធិបតេយ្យចង់បានដើម្បីផ្ដួលរូបលោក។ កន្លងទៅ លោក ត្រាំ ក៏បដិសេធប្រកាសទទួលស្គាល់លទ្ធផលដែរ បើលោកចាញ់ឆ្នោតនោះ ស្របពេលលទ្ធផលស្ទង់មតិបង្ហាញថា លោក ត្រាំ នឹងចាញ់លោក បៃឌិន ៕
Tag:
អាមេរិក
ដូណាល់ ត្រាំ
ហ៊ីឡារី គ្លីនតុន
ចូ បៃឌិន
© រក្សាសិទ្ធិដោយ thmeythmey.com