បឹងកេត ណាហ្គាវើល និងកងយោធពលខេមរភូមិន្ទសុទ្ធតែបានបង្ហាញភាពជឿជាក់រៀងៗខ្លួនក្នុងការប្រជែងដណ្តើមជើងឯកក្របខណ្ឌមិត្តហ្វូនខេមបូឌានលីគ ទោះក្រុមខ្លះមានភាគរយតិចតួចក៏ដោយ។ ក្លិបទាំងបីសុទ្ធតែជឿជាក់ថា ការប្រជើងទីពីរវគ្គ៦ក្រុម ដែលមានពិន្ទុខ្ពស់ជាងគេក្នុងជើងទី១(Top 6)នឹងមានភាពតានតឹងជាងជើងទី១។ តាមរយៈការចាប់ឆ្នោតនៅព្រឹកថ្ងៃទី២៥ ខែសីហា បឹងកេតប៉ះវិសាខា រីឯព្រះខ័នរាជស្វាយរៀងជួបភ្នំពញេក្រោន ខណៈណាហ្គាវើលប៉ះទ័ព។
លោក បែ មករា អ្នកចាត់ការទូទៅក្លិបបឹងកេត បានបង្ហាញក្តីរំពឹងខ្ពស់ក្នុងការប្រកួតជើងទីពីរនៃពានរង្វាន់ក្រមខណ្ឌមិត្តហ្វូនខេមបូឌានលីគថា ក្រុមលោកនឹងធ្វើបានល្អដូចជើងទី១ ដែលបានបញ្ចប់ក្នុងចំណាត់ថ្នាក់លេខ១។ បច្ចុប្បន្នបឹងកេតកំពុងឈរកំពូលជាមួយជ័យជម្នះ១០លើក និងស្មើ១លើក ដែលមានគម្លាត១ពិន្ទុជាមួយព្រះខ័នរាជស្វាយរៀង និង៩ពិន្ទុជាមួយវិសាខា និងកងយោធពលខេមរភូមិន្ទ និងគម្លាត១០ពិន្ទុជាមួយភ្នំពេញក្រោន និងណាហ្គាវើល។
តែយ៉ាងណាលោក បែ មករា ជឿជាក់ថា នៅជើងទីពីរនេះ បឹងកេត នឹងមានការប្រកួតប្រជែងកាន់តែខ្លាំង ដ្បិតក្រុមទាំង៥សុទ្ធសឹងជាក្រុមមានសមត្ថភាពខ្ពស់ និងមានការរៀបចំបានល្អ។
លោក បែ មករា (ស្តាំ) ពេលឡើងចាប់ឆ្នោតជើងទីពីរលីគកំពូល
ក្នុងបទសម្ភាសជាមួយអ្នកសារព័ត៌មានក្រោយការចាប់ឆ្នោតអ្នកចាត់ការទូទៅរូបនេះបានបញ្ចាក់យ៉ាងដូច្នេះថា៖«នៅជុំទី១ក្រុមយើងទទួលបានលទ្ធផលល្អ ដោយបញ្ចប់ក្នុងចំណាត់លេខ១ ប៉ុន្តែខ្ញុំជឿជាក់ថា នៅជុំទីពីរ គឺយើងនឹងមានការប្រកួតប្រជែងរឹតខ្លាំង ព្រោះសុទ្ធជាក្រុមកំពូលៗ ហើយក្រុមទាំងអស់សុទ្ធតែនៅមានឱកាសក្នុងការដណ្តើមជើងឯក ដូច្នេះខ្ញុំគិតថា ការប្រកួតនឹងមានភាពស្វិញស្វាញ និងតានតឹងជាងជើងទី១»។
ការប្រកួតក្រៅទឹកដីច្រើនជាងក្នុងដីនៅជើងទីពីរនេះ កំពុងក្លាយជាក្តីបារម្ភសម្រាប់ក្រុមជើងឯកពីរសម័យកាលមួយនេះ ក្នុងការប្រជែងដណ្តើមយកជ័យជម្នះ។ បឹងកេតត្រូវប្រកួតក្រៅទឹកដីជាមួយវិសាខា ភ្នំពេញក្រោន ណាហ្គាវើល និងកងយោធពលខេមរភូមិន្ទ បន្ទាប់មកពួកគេត្រូវបើកទ្វារកីឡដ្ឋានខេមបូឌាអ៊ែរវ៉េទទួលព្រះខ័នរាជស្វាយរៀង។
លោក បែ មករា បានបង្ហាញក្តីកង្វល់យ៉ាងដូច្នេះថា៖«ការប្រកួតជើងទីពីរនេះ បញ្ហាយើងប្រកួតក្រៅដីច្រើន ដូច្នេះវាជាបញ្ហាដែរសម្រាប់យើង។ ប៉ុន្តែទោះជាយ៉ាងណា ខ្ញុំជឿជាក់លើក្រុមរបស់ខ្ញុំ ទាំងក្រុមការងារ និងកីឡាករ គាត់នឹងប្រឹងប្រែងស្វែងរកជ័យជម្នះជូនអ្នកគាំទ្ររបស់យើង»។
ជាមួយគ្នានេះ លោក មាស ចាន់ណា គ្រូបង្វឹកក្រុមណាហ្គាវើល ហាក់មិនហ៊ានដាក់ក្តីរំពឹងខ្ពស់ក្នុងការប្រជែងដណ្តើមជើងឯកនោះទេ ដ្បិតក្រុមខ្លួនមានពិន្ទុដាច់ឆ្ងាយពីក្រុមកំពូលតារាងខ្លាំងពេក។ បច្ចុប្បន្ន ណាហ្គាវើល ឈរលេខរៀងទី៦មាន២២ពិន្ទុ រីឯក្រុមកំពូលតារាងបឹងកេតមាន៣២ពិន្ទុ ដូច្នេះវាជារឿងលំបាកមួយសម្រាប់ណាហ្គាក្នុងការប្រជែងដណ្តើមពាន។ សម្រាប់លោក មាស ចាន់ណា ការបញ្ចប់ត្រឹមចំណាត់ថ្នាក់លេខ៣ វាជាជោគជ័យមួយដ៏ធំធេងសម្រាប់ណាហ្គាវើលនៅរដូវកាលនេះ។
(រូបទី២)
លោក មាស ចាន់ណា គ្រូបង្វឹកណាហ្គាវើលពេលឡើងចាប់ឆ្នោត
ក្នុងបទសម្ភាសជាមួយអ្នកសារព័ត៌មាន លោក មាស់ ចាន់ណា បាននិយាយដូច្នេះថា៖«ខ្ញុំគិតថា សម្រាប់ណាហ្គាឱកាសប្រជែងដណ្តើមយកពាននៅឆ្ងាយមែនទែន ដោយសារគម្លាត(ពិន្ទុ)រវាងក្រុមលេខ១និងលេខ៦មានរហូតដល់១០ពិន្ទុ ហើយលេងតែ៥ប្រកួតទៀត ដូច្នេះវាលំបាកមែនទែនសម្រាប់ក្រុមខ្ញុំ។ បើខ្ញុំរំពឹងថាបានពានលុះត្រាខ្ញុំឈ្នះ៥ប្រកួត ហើយក្រុមផ្សេងៗចាញ់»។
គ្រូបង្វឹករូបនេះ ហាក់បង្ហាញការមិនពេញចិត្តជាមួយការកែប្រែរូបមន្តរបស់គណៈកម្មការប្រកួតបាល់ទាត់ជាតិកម្ពុជា(CNCC) ដែលបែងចែងឲ្យមានការប្រកួតជាពីរក្រុមនៅជើងទីពីរ។ តែយ៉ាងណាលោក ក៏នៅតែជឿជាក់ថា ការប្រកួតនៅជើងទីពីរនេះ ក្រុមខ្លួននឹងបានល្អជាងជើងទី១ ឬអាចឈានទៅកាន់ចំណាត់ថ្នាក់ល្អក៏អាចថាបាន។
មិនខុសគ្នាពីលោក មាស ចាន់ណា នោះទេ លោក ថោង ឧត្តម អ្នកចាត់ការទូទៅក្រុមកងយោធពលខេមរភូមិន្ទ ក៏បានបង្ហាញក្តីបារម្ភក្នុងការប្រជែងដណ្តើមជើងឯកផងដែរ ក្បិតក្រុមខ្លួនមានគម្លាតពិន្ទុដាច់ឆ្ងាយពីក្រុមកំពូលតារាង។ ទោះយ៉ាងនេះក្តីក្រុមខ្លួននឹងកែប្រែកំហុសក្នុងជើងទី១ ដើម្បីប្រើឱកាសតិចតួចរបស់ខ្លួនក្នុងការស្វែងរកពិន្ទុមួយដ៏ល្អប្រសើរជូនអ្នកគាំទ្រ។
(រូបទី៣)
លោក ថោង ឧត្តម (ខាងក្រោយ)អ្នកចាត់ការទូទៅក្រុមកងយោធពលខេមរភូមិន្ទ
«សម្រាប់ការប្រកួតនៅ Top 6 យើងសង្កេតឃើញថា ក្រុមទាំងអស់សុទ្ធតែខ្លាំង។ ពីមុនយើងគិតថា មានឱកាសតិចតួចក្នុងការឡើងមកកាន់ Top 6 ហើយឥឡូវនេះ បើគិតពីពិន្ទុក្រុមឈរកំពូលតារាងយើងខុសគ្នាជិត១០ពិន្ទុ។ ប៉ុន្តែយើងនៅតែមានឱកាស ទោះឱកាសតិចតួចយ៉ាងយើងនឹងប្រឹងឲ្យអស់ពីសមត្ថភាព ឲ្យអស់ពីបេះដូង ដើម្បីថ្នាក់ដឹកនាំ និងអ្នកគាំទ្រ»។ នេះជាការលើកឡើងរបស់លោក ថោង ឧត្តម។
សម្រាប់ការប្រកួតជើងទីពីរនេះ CNCC បានបែងចែកការប្រកួតជាពីរ គឹក្រុមដែលមានពិន្ទុខ្ពស់ជាងគេទាំង៦នៅជើងទី១ត្រូវប្រជែងគ្នាដណ្តើមយកជើងឯក ខណៈក្រុមដែលមានចំណាត់ថ្នាក់ពី៧ដល់លេខ១៣ ត្រូវប្រជែងគ្នាដើម្បីគេចចេញពីតំបន់កាត់ចេញ។ នៅរដូវកាលនេះដែរ ក្រុមដែលមានពិន្ទុទាបជាងគេ នឹងត្រូវកាត់ចេញពីក្របខណ្ឌឲ្យទៅលេងនៅក្របខណ្ឌលីគទីពីរ។
ប៉ុន្តែក្នុងករណីក្រុមយុវជនអាយុក្រោម១៨ឆ្នាំបាទីមានពិន្ទុទាបជាងគេ នោះក្រុមដែលឈរលេខរៀងក្រោមបន្ទាប់នឹងត្រូវកាត់ចេញទៅលេងលីគពីរ។ ព្រោះក្រុមសាលាបាល់ទាត់ជាតិបាទីជាក្រុមដែលសហព័ន្ធដាក់ឲ្យប្រកួត ដើម្បីត្រៀមឆ្ពោះទៅស៊ីហ្គេមឆ្នាំ២០២៣ ដែលជាផែនការយុទ្ធសាស្ត្ររបស់សហព័ន្ធកីឡាបាល់ទាត់កម្ពុជា។
សម្រាប់ការប្រកួត Top 6 ធ្វើឡើងតែមួយជើងប៉ុណ្ណោះ ដោយក្រុមនីមួយៗត្រូវជួបគ្នាមួយប្រកួតរៀងៗខ្លួន។ ចំណែកពិន្ទុត្រូវបូកបន្តពីជើងទី១ បើក្រុមណាមានពិន្ទុខ្ពស់ជាងគេ នឹងក្លាយជាម្ចាស់ជើងឯកប្រចាំរដូវកាលនេះតែម្តង។
យោងតាមការចាប់ឆ្នោត Top 6 នៅថ្ងៃទី២៥ ខែសីហា ឆ្នាំ២០២០ ក្រុមបឹងកេតប៉ះវិសាខា រីឯព្រះខ័នរាជស្វាយរៀងជួបភ្នំពេញក្រោន ខណៈណាហ្គាវើលតទល់ជាមួយកងយោធពលខេមរភូមិន្ទ។ ចំណែកក្រុមនគរបាលជាតិប៉ះអង្គរថាយហ្គឺរ រីឯគីរីវង់សុខសែនជ័យជួបយុវជនអាយុក្រោម១៨ឆ្នាំបាទី ខណៈអគ្គិសនីកម្ពុជាប៉ះសូលទីឡូអង្គរ។ ការប្រកួតនឹងប្រព្រឹត្តទៅចាប់ពីថ្ងៃទី៥ ខែកញ្ញា ឆ្នាំ២០២០៕