អន្តរជាតិ
លោក ប្រាយុទ្ធ ទាមទារឲ្យ Facebook គោរពច្បាប់ថៃជុំវិញការផ្សព្វផ្សាយប៉ះពាល់របបរាជានិយម
លោកប្រាយុទ្ធ ចាន់អូចា នាយករដ្ឋមន្ត្រីថៃ៕ រូបភាព៖ AFP
×![]()
លោក ប្រាយុទ្ធ ចាន់អូចា នាយករដ្ឋមន្ត្រីថៃ នៅថ្ងៃទី២៥ ខែសីហា បានទទូចឲ្យក្រុមហ៊ុន Facebook គោរពច្បាប់ថៃ ហើយថា លោកក៏មិនបារម្ភឡើយចំពោះការគំរាមប្តឹងពីក្រុមហ៊ុនមកលើរដ្ឋាភិបាលរបស់លោក។ លោក ប្រាយុទ្ធ បញ្ជាក់បែបនេះ ក្រោយ Facebook ដែលត្រូវបានរដ្ឋាភិបាលថៃចាប់បង្ខំឲ្យបិទគ្រុបមួយមានសមាជិកមួយលាននាក់ដែលចែកចាយព័ត៌មានពីមហាក្សត្រ គំរាមតបតតាមផ្លូវច្បាប់លើរដ្ឋាភិបាលថៃវិញពាក់ព័ន្ធការបង្ខំខ្លួនបែបនេះ។ 
កាលពីថ្ងៃទី២៤ ខែសីហា Facebook បានរាំងខ្ទប់មិនឲ្យអ្នកប្រើប្រាស់ក្នុងប្រទេសថៃ អាចចូលទៅមើលគ្រុប (Group) មួយដែលសមាជិក១លាននាក់។ វិធានការរបស់ Facebook នេះ ធ្វើឡើងបន្ទាប់ពីរដ្ឋាភិបាលថៃ គំរាមចាត់វិធានការផ្លូវច្បាប់លើក្រុមហ៊ុនបច្ចេកវិទ្យាយក្សមួយនេះ ដែលមិនលុបចោលមាតិកាដែលប៉ះពាល់មហាក្សត្រ។ ប៉ុន្តែ Facebook អះអាងថា ខ្លួននឹងតទល់តាមផ្លូវច្បាប់ដើម្បីការពារអ្នកប្រើប្រាស់របស់ខ្លួន។
នាយករដ្ឋមន្ត្រីថៃ ប្រាយុទ្ធ ចន្ទអូចា មិនព្រឺនឹងការលើកឡើងបែបនោះឡើយ។ ពីខេត្ត Rayong លោក ប្រាយុទ្ធ និយាយថាភាគីទាំងអស់ត្រូវគោរពច្បាប់ថៃ។ និយាយបែបនេះ លោក ប្រាយុទ្ធ មិនត្រឹមសំដៅហ្វេសប៊ុកឡើយតែមួយឡើយ តែក៏សំដៅគ្រុប Royalist Marketplace ដែលគ្រប់គ្រងដោយលោកPavin Chachavalpongpun និងគ្រុបមួយទៀតរបស់លោក Somsak Jeamteerasakul ។ អ្នកទាំងពីរសុទ្ធតែភៀសខ្លួននៅបរទេស ខណៈគ្រុបរបស់ពួកគេមានមាតិកាប៉ះពាល់របបរាជានិយម។
លោក Somsak ជាសាស្ត្រាចារ្យកំពុងនិរទេសខ្លួននៅបារាំង ចំណែកឯលោក Pavin ជាសាស្ត្រាចា្យនៅសាកលវិទ្យាល័យមួយនៅប្រទេសជប៉ុន។ បុគ្គលទាំង២ រូបខាងលើ បានបំពានច្បាប់ប្រមាថព្រះមហាក្សត្រ ដែលដោយរដ្ឋាភិបាលថៃកំពុងតាមចាប់។ នេះបើតាមកាសែតថៃបាងកកប៉ុស្តិ៍។
លោក ប្រាយុទ្ធ បានអះអាងនៅថ្ងៃទី២៥ ខែសីហា ថា រាល់សកម្មភាពប្រឆាំងទំព័រ Facebook ណាមួយដែលមានលក្ខណៈប្រមាថស្ដេច សុទ្ធសឹងតែស្របតាមច្បាប់។ លោកបន្ថែមថា លោកមិនបានប្រើប្រាស់អំណាចផ្តាច់ការឡើយ ព្រោះសកម្មភាពទាំងនោះផ្អែកតាមសេចក្តីបង្គាប់របស់តុលាការទាំងអស់។ លោក ប្រាយុទ្ធ ក៏ចោទជាសំណួរផងដែរថា ៖«តើអ្នកណាទទួលខុសត្រូវចំពោះផលប៉ះពាល់ក្នុងប្រទេស? បើទោះបីជាមានអ្វីកើតឡើងនៅក្នុងប្រទេសថៃ ពួកគេនឹងមិនប៉ះពាល់អ្វីដែរ។ បញ្ហាគឺនៅក្នុងប្រទេសថៃ។»
ចំណែកឯ លោក Pavin វិញ បានបង្កើតគ្រុបថ្មីប៉ុន្មានម៉ោងក្រោយត្រូវ Facebook បិទគ្រុបចោល និងមានសមាជិកកន្លះលាននាក់ត្រឹមមួយថ្ងៃ។ លោក Pavin អះអាងថា៖ «បើអ្នកបិទវាម្តងទៀត ខ្ញុំនឹងបង្កើតគ្រុបថ្មីមួយទៀត ខ្ញុំនឹងធ្វើបែបនេះ ដើម្បីសេរីភាពនៃការបញ្ចេញមតិ។»
បើតាមបាងកកប៉ុស្តិ៍ លោក Paiboon Amonpinyokeat អ្នកជំនាញច្បាប់អ៊ីនធឺណិត និងដែលចូលរួមតែងច្បាប់បទល្មើសកុំព្យូទ័រ បានសង្កតធ្ងន់ថា Facebook មិនអាចប្តឹងរដ្ឋាភិបាលថៃឡើយ ដោយសារសេចក្តីបង្គាប់ឲ្យរាំងខ្ទប់មិនឲ្យចូលមើលគ្រុបនោះចេញដោយតុលាការ។ លោកបន្ថែមថា តុលាការជាអ្នកវិនិច្ឆ័យថា តើគេហទំព័រនោះ ចែកចាយមាតិកាខុសច្បាប់ ដែលអាចប៉ះពាល់ដល់សន្តិសុខជាតិ៕
Tag:
ថៃ
Facebook
© រក្សាសិទ្ធិដោយ thmeythmey.com
