ស្ត្រីអូស្ត្រាលីម្នាក់ ត្រូវដាក់ទោសឲ្យជាប់គុក៦ខែ ក្រោយល្មើសច្បាប់ចត្តាឡីស័ក

COVID-19

អន្តរជាតិ

ស្ត្រីអូស្ត្រាលីម្នាក់ ត្រូវដាក់ទោសឲ្យជាប់គុក៦ខែ ក្រោយល្មើសច្បាប់ចត្តាឡីស័ក

26, Aug 2020 , 4:52 pm

រូបភាព

នាង Asher Faye Vander Sanden អាយុ២៨ឆ្នាំ (សារព័ត៌មានabc.net.au)

ដោយ:

ស្ត្រីអាយុ២៨ឆ្នាំ នៅថ្ងៃទី២៥ ខែសីហា ត្រូវបានដាក់ទោសឲ្យជាប់គុករហូតដល់៦ខែក្នុងប្រទេសអូស្ត្រាលី ក្រោយបំពានច្បាប់ចត្តាឡីស័ក COVID-19 ។ ស្ត្រីរូបនេះជាមនុស្សទី៤ហើយក្នុងប្រទេសអូស្ត្រាលីដែលត្រូវជាប់គុកដោយសារការបំពាននេះ។

ស្ត្រីឈ្មោះ Asher Faye Vander Sanden បានចំណាយពេលមួយខែក្នុងរដ្ឋ Victoria ដែលរងគ្រោះខ្លាំងបំផុតដោយសារជំងឺរាតត្បាតសកល COVID-19 ។ នាងត្រូវបានអនុញ្ញាតឲ្យធ្វើដំណើរតាមយន្តហោះមកកាន់ផ្ទះរបស់នាងវិញ ក្នុងរដ្ឋ Perth ភាគខាងលិចនៃប្រទេសអូស្ត្រាលី ហើយត្រូវធ្វើចត្តាឡីស័កក្នុងសណ្ឋាគារ១៤ថ្ងៃ ដោយចាយលុយខ្លួនឯង។

ក៏ប៉ុន្តែ នាងបែរជាបានធ្វើដំណើរស្ងាត់ៗដោយលាក់ខ្លួនក្នុងរថយន្តធុនធំមួយ ហើយនាងបានទៅស្នាក់នៅផ្ទះរបស់ឪពុកម្ដាយនាង។ ក្រោយមក នាងត្រូវបានប៉ូលិសចាប់ខ្លួននៅក្នុងផ្ទះនេះ។ នៅរដ្ឋភាគខាងលិចនៃប្រទេសអូស្ត្រាលី មនុស្សដែលត្រូវបានរកឃើញថា បំពានច្បាប់ចត្តាឡីស័ក ប្រឈមជាប់គុករហូតដល់១២ខែ ឬបង់ពិន័យជាលុយរហូតដល់៥ម៉ឺនដុល្លារ។

តាមការចុះផ្សាយរបស់សារព័ត៌មាន BBC នៅថ្ងៃទី២៦ ខែសីហា មេធាវីរបស់នាង Vander Sanden លោក John Hammond បានអះអាងថា កូនក្តីលោកបានធ្វើដំណើរទៅកាន់រដ្ឋ Victoria ដើម្បីមើលថែប្អូនស្រីនាងដែលមិនស្រួលខ្លួន តែបានសម្រេចត្រលប់មកវិញ ព្រោះនាងមិនអាចជួយអ្វីបានច្រើន។ មេធាវីរូបនេះបន្តទៀតថា នាង Sanden បានធ្វើចត្តាឡីស័កខ្លួនឯងក្នុងផ្ទះរបស់ឪពុកម្ដាយនាង ហើយពុំមានប៉ះពាល់ជាមួយនរណាផ្សេងឡើយ។

រដ្ឋមួយចំនួនរបស់អូស្ត្រាលី បានអនុវត្តវិធានការរឹតត្បិតតឹងរ៉ឹងលើការឆ្លងព្រំដែនរវាងរដ្ឋនិងរដ្ឋ ក្រោយករណី COVID-19 បានស្ទុះឡើងជាថ្មី។ តែក៏មានករណីលើកលែងដូចករណីនាង Vander Sanden ។ ច្បាប់តឹងរ៉ឹងទាំងនេះ បានបង្ខំឲ្យប្រជាជនអូស្ត្រាលីរាប់ពាន់នាក់ជាប់គាំង ខណៈអ្នកខ្លះមិនអាចសូម្បីតែចូលរួមពិធីបុណ្យសពមនុស្សដែលពួកគេស្រលាញ់។

មកទល់បច្ចុប្បន្ន យ៉ាងហោចណាស់មនុស្ស៣នាក់ផ្សេងទៀត ត្រូវបានដាក់ទោសឲ្យជាប់គុកសម្រាប់ការល្មើសច្បាប់ចត្តាឡីស័ក។ តួយ៉ាង ក្នុងខែមេសាកន្លងទៅ បុរសអូស្ត្រាលីឈ្មោះ Jonathan David ត្រូវបានដាក់ទោសឲ្យជាប់គុក៦ខែ និង២សប្តាហ៍ ក្រោយចាកចេញពីសណ្ឋាគារដែលជាកន្លែងធ្វើចត្តាឡីស័ក ទៅកាន់ផ្ទះមិត្តស្រីខ្លួន៕