កីឡាអន្តរជាតិ
អន្តរជាតិ
Chelsea ទិញខ្សែការពារ Chilwell ពី Leicester តម្លៃ៥៩លានដុល្លារ
× Chelsea បានចាយលុយ៤៥លានផោន (៥៩លានដុល្លារអាមេរិក) ដើម្បីទិញយកខ្សែការពារស្លាប Ben Chilwell ពី Leicester City។ Chilwell ជាកីឡាករទី៣ហើយ ដែលតោខៀវទិញចូលក្នុងរដូវកាល២០២០-២១នេះ បន្ទាប់ពីយកបាន Hakim Ziyech និង Timo Werner។
ខ្សែការពារសញ្ជាតិអង់គ្លេស វ័យ២៣ឆ្នាំ ដែលបានខកខានចំនួន៥ប្រកួតចុងក្រោយដើម្បីជួយក្រុម Leicester ប្រជែងកៅអី Champions League កាលពីរដូវកាលមុន ដោយសារបញ្ហារបួសជើង បានយល់ព្រមចុះកិច្ចសន្យារយៈពេល៥ឆ្នាំនៅ Stamford Bridge ពោលគឺរហូតដល់ឆ្នាំ២០២៥។ នេះបើតាមការប្រកាសរបស់ក្លិប Chelsea តាមរយៈវេបសាយរបស់ខ្លួន។
Leicester មិនអាចទទួលបានកៅអីក្របខណ្ឌអឺរ៉ុបឡើយក្រោយចាញ់ Chelsea នៅជំនួបចុងក្រោយលីគ Premier League។ តោខៀវក្រោមការដឹកនាំរបស់អ្នកចាត់ការ Frank Lampard បញ្ចប់ទៅក្នុងចំណាត់ថ្នាក់ទី៤ ដោយបានសិទ្ធិលេង Champions League ។
ដោយសារត្រូវមានភារកិច្ចសំខាន់ទាំងក្នុងលីគ និងក្របខណ្ឌអឺរ៉ុប Chelsea បានផ្តល់កញ្ចប់លុយឲ្យលោក Lampard ដើម្បីទិញចូលកីឡាករល្អៗមកពង្រឹងក្រុមបន្ថែម។ មុនការមកដល់របស់ Chilwell ក្រុមមានមូលដ្ឋានក្នុងក្រុងឡុងដ៏មួយនេះបានទិញចូលកីឡាករពីររូបរួចហើយរួមមាន ខ្សែបម្រើ Hakim Ziyech ពី Ajax និង ខ្សែប្រយុទ្ធ Timo Werner ពី RB Leipzig។
Chilwell ជាកីឡាករចំណូលថ្មីទី៣ដែល Chelsea ទិញពី Leicester បន្ទាប់ពី N'Golo Kante និង Danny Drinkwater។ អ្វីដែលគួរចាប់អារម្មណ៍ ចាប់តាំងពីក្រុមរហស្សនាមកញ្ជ្រោងលើកពានកំពូលអង់គ្លេសកាលពីឆ្នាំ២០១៦មកទល់ឥឡូវ ក្លិបនេះលក់បានកីឡាករជាច្រើនក្នុងតម្លៃថ្លៃៗ ដែលរួមមានខ្សែការពារ Harry Maguire, Riyad Mahrez និង Chilwell នេះ៕
Tag:
Ben Chilwell
Leicester City
Chelsea
© រក្សាសិទ្ធិដោយ thmeythmey.com