ភ្នំពេញ៖ អ្នករាយការណ៍ពិសេសអង្គការសហប្រជាជាតិទទួលបន្ទុកស្ថានភាពសិទ្ធិមនុស្សនៅកម្ពុជាលោកស្រី រ៉ូណា ស្មីត បារម្ភពីការរឹត្បិតសេរីភាពបញ្ចេញមតិនិងការជួបជុំតវ៉ារបស់នៅកម្ពុជា ។ ប៉ុន្តែលោកស្រី មិនគាំទ្រការជួបជុំបញ្ចេញមតិបំពានច្បាប់ សិទ្ធិសេរីភាពអ្នកដទៃ និងសណ្ដាប់ធ្នាបសាធារណៈឡើយ។ នេះបើតាមសេចក្ដីប្រកាសព័ត៌មានរបស់គណៈកម្មាធិការសិទ្ធិមនុស្សកម្ពុជា(គ.ស.ម.ក)។
ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី និងលោកស្រី រ៉ូណា ស្មីត អ្នករាយការណ៍ពិសេសអង្គការសហប្រជាជាតិទទួលបន្ទុកស្ថានភាពសិទ្ធិមនុស្សនៅកម្ពុជា បានរៀបកិច្ចប្រជុំតាមប្រព័ន្ធវីដេអូមួយ នៅថ្ងៃទី២៦ សីហា ដើម្បីពិភាក្សាការងារពីស្ថានភាពសិទ្ធិមនុស្សនៅកម្ពុជា ។ ការពិភាក្សាពីស្ថានភាពសិទ្ធិមនុស្សនៅកម្ពុជានេះ ធ្វើឡើងមុនពេលលោកស្រី រ៉ូណា ស្មីត ឡើងថ្លែងការណ៍អំពីរបាយការណ៍របស់ខ្លួននៅខែតុលាខាងមុន នៅទីក្រុងហ្សីណែវ ក្នុងក្រុមប្រឹក្សាសិទ្ធិមនុស្ស។
ក្នុងកិច្ចប្រជុំតាមប្រព័ន្ធវីដេអូនេះ អ្នករាយការណ៍ពិសេសអង្គការសហប្រជាជាតិលោកស្រី រ៉ូណា ស្មីត បានបង្ហាញក្តីព្រួយបារម្ភពីការបិទសិទ្ធិសេរីភាពបញ្ចេញមតិនិងការជួបជុំតវ៉ា និងភាពចង្អៀតណែនក្នុងពន្ធនាគារ ពិសេសអំឡុងពេលការរីករាលដាលនៃជំងឺកូវី-១៩។ ដ្បិតលោកស្រី ព្រួយបារម្ភពីបញ្ហាទាំងនេះក្តី ប៉ុន្តែអ្នករាយការណ៍រូបនេះ ក៏មិនគាំទ្រការជួបជុំបញ្ចេញមតិណា ដែលបំពានច្បាប់ ប៉ះពាល់សិទ្ធិសេរីភាពអ្នកដទៃ បង្កឲ្យមានការរើសអើងពូជសាសន៍ ឬអំពើហិង្សា និងភាពចលាចលប៉ះពាល់ដល់សណ្ដាប់ធ្នាប់សាធារណៈនិងសន្តិសុខសង្គមឡើយ។ នេះបើតាមសេចក្ដីប្រកាសព័ត៌មានរបស់គណៈកម្មាធិការសិទ្ធិមនុស្សកម្ពុជា។
លោក កែវ រ៉េមី បានប្រាប់លោកស្រី រ៉ូណា ស្មីត វិញថា កម្ពុជាគោរពនូវសេរីភាពនៃការជួបជុំបញ្ចេញមតិ ដោយមិនមានការរឹតត្បិតសេរីភាពឡើយ។ លោក កែវ រ៉េមី អះអាងថា ការចាត់វិធានលើអ្នកបញ្ចេញមតិនិងជួបជុំកន្លងមក ដោយសារតែពួកគេបំពានរដ្ឋធម្មនុញ្ញ និងច្បាប់តែប៉ុណ្ណោះ។ ចំណែកសកម្មភាពអង្គការសង្គមស៊ីវិលនៅតាមមូលដ្ឋានមានភាពល្អប្រសើរធម្មតា ក៏មិនមានការរឹតត្បិតដែរ។
ជាមួយគ្នានេះលោក កែវ រ៉េមី បានបញ្ជាក់ថា ក្រុមការងារ គ.ស.ម.ក កំពុងពិគ្រោះយោបល់ជាមួយអង្គការសង្គមស៊ីវិលអំពីការធ្វើវិសោធនកម្មច្បាប់ ស្ដីពីការបង្កើតសមាគម និងអង្គការមិនមែនរដ្ឋាភិបាល។ ទន្ទឹមនឹងនេះ គ.ស.ម.ក ក៏បានលើកឡើងពីការយន្តការដោះស្រាយការកកស្ទះសំណុំរឿងនៅសាលាដំបូងធានីខេត្ត ក្នុងគោលដៅបង្កើនប្រសិទ្ធភាពនៃសេវាយុត្តិធម៌ និងរួមចំណែកក្នុងការដោះស្រាយភាពចង្អៀតណែនក្នុងពន្ធនាគារ។
លោកស្រី រ៉ូណា ស្មីត បានបញ្ជាក់ថា ខ្លួនរីករាយនឹងការចូលរួមផ្ដល់យោបល់លើការរៀបចំ និងវិសោធនកម្មនិងសេចក្ដីព្រាងច្បាប់ ពាក់ព័ន្ធនឹងគោលការណ៍សិទ្ធិមនុស្សអន្តរជាតិ។ ក្នុងន័យនេះ លោកស្រីផ្ដោតលើ ក្រមព្រហ្មទណ្ឌ ច្បាប់ស្ដីពីសមាគមនិងអង្គការមិនមែនរដ្ឋាភិបាល សេចក្ដីព្រាងច្បាប់ស្ដីពីសណ្ដាប់ធ្នាប់សាធារណៈ និងសេចក្ដីព្រាងច្បាប់ស្ដីពីការបង្កើតស្ថាប័នសិទ្ធិមនុស្សជាតិជាដើម។
ជុំវិញការចូលរួមផ្ដល់យោបល់លើកការធ្វើវិសោធនកម្មនិងសេចក្ដីព្រាងច្បាប់ លោកស្រី រ៉ូណា ស្មីត អាច ផ្ដល់យោបល់បានជុំវិញគោលការណ៍សិទ្ធិមនុស្ស ក្នុងដំណើរធ្វើវិសោធនកម្មនិងសេចក្ដីព្រាងច្បាប់បាន ប្រសិនបើការពិភាក្សានៃគ្រប់ភាគីពាក់ព័ន្ធយល់ថា ខ្វះខាតណាមួយតាមស្ថានភាពជាក់ស្ដែង។ នេះបើតាមលោក ជិន ម៉ាលីន អនុប្រធាននៃ គ.ស.ម.ក ថ្លែងប្រាប់សារព័ត៌មានថ្មីៗតាមទូរស័ព្ទ។
«យើងនឹងធ្វើការពិគ្រោះយោបល់គ្រប់ភាគីពាក់ព័ន្ធ រួមមានដៃគូជាតិ អន្តរជាតិ អង្គការសង្គមស៊ីវលជាតិនិងអន្តរជាតិ ដើម្បីពិគ្រោះយោបល់ប្រសិនមើលឃើញថាមិនគ្រប់គ្រាន់ ចាំបាច់ត្រូវការធាតុចូលពីគាត់(លោកស្រី រ៉ូណា ស្មីត) យើងប្រគល់ជូនគាត់សុំការពិនិត្យបន្ថែមទៀត តាមការជាក់ស្ដែង»។ នេះជាការលើកឡើងរបស់លោក ជិន ម៉ាលីន៕