ភ្នំពេញ៖ កន្លងមក ឪពុកម្តាយ១៥គ្រួសារ បានដាក់ពាក្យបណ្តឹងលើម្ចាស់ផលិតម្សៅទឹកដោះគោម៉ាក Nutrilatt ដោយសារតែកូនរបស់ពួកគាត់មានអាការស្លេកស្លាំង ក្រោយប្រើប្រាស់ផលិតផលនេះ។ អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ នៃក្រសួងពាណិជ្ជកម្ម បានយកសំណាកទឹកដោះគោទៅពិសោធ ហើយលទ្ធផលបង្ហាញថា ម្សៅទឹកដោះគោ ពិតជាមានសារធាតុដែកទាប ដែលអាចប៉ះពាល់ដល់សុខភាពកុមារ។
អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំនៃក្រសួងពាណិជ្ជកម្ម (ក.ប.ប.) បានបង្ហាញលទ្ធផលការធ្វើតេស្តនៃម្សៅទឹកដោះគោ Nutrilatt ដែលមានលេខកូដ ៤៨៧,៤៨៨,៥៣៦,៥៣៧,៥៣៨ និង៥៣៩ ថាម្សៅប្រភេទដែលឲ្យទារកអាយុ០ទៅ៦ខែ និង៦ទៅ១២ខែ ប្រើប្រាស់ គឺមានកម្រិតជាតិដែក និងជាតិស័ង្កសីទាប ដែលខុសពីបរិមាណដែលបានបញ្ជាក់នៅក្នុងស្លាកសញ្ញាផលិតផលថាមានជាតិដែកជិត៦មីលីក្រាម ហើយជាតិស័ង្កសីមានជិត៥មីលីក្រាម។ លទ្ធផលជាក់ស្តែងបង្ហាញថា មានជាតិដែកតែត្រឹម០.២៥មីលីក្រាម និងជាតិស័ង្កសីតែ២.២៧ និង២.៤តែប៉ុណ្ណោះ។
«ផលិតផលនេះស្ទើរតែគ្មានជាតិដែកសោះ ពោលគឺកម្រិតជាតិដែកមានត្រឹមតែ០,២៥មីលីក្រាម/១០០ក្រោមប៉ុណ្ណោះ បើប្រៀបធៀបទៅនឹងតម្រូវការយ៉ាងតិចគឺ២.២៨៦មីលីក្រាម/១០០ក្រាម។ ផលិតផលត្រូវតែផលិតតាមស្តង់ដាសុវត្ថិភាពយ៉ាងតឹងរ៉ឹង និងមានសមាសភាពផ្សំជាក់លាក់។ ហើយក្នុងនោះបានកំណត់ពីតម្រូវការអប្បបរមាសម្រាប់ជាតិដែកនៅក្នុងទឹកដោះគោម្សៅផ្សំតាមរូបមត្តសម្រាប់ទារក គឺមានបរិមាណចំនួន០.៤៥មីលីក្រាម/១០០គីឡូកាឡូរី។ កម្រិតជាតិស័ង្កសីអប្បបរមាដែលអាចអនុញ្ញាបានគឺមានបរិមាណ០.៥ មីលីក្រាម/១០០គីឡូកាឡូរី»។ នេះបើតាមសេចក្តីប្រកាសព័ត៌មានរបស់ក.ប.ប.នៃក្រសួងពាណិជ្ជកម្ម។
ទាក់ទងនឹងផលិតផលនេះ ក្រុមហ៊ុនម្សៅទឹកដោះគោ Nutrilatt បានចេញលិខិតបដិសេធទៅលើលទ្ធផលនៃការប្រកាសរបស់ក.ប.ប.នៃក្រសួងពាណិជ្ជកម្មដែលថាផលិតផលនេះផលិតដោយខុសពីការបញ្ជាក់នៅក្នុងស្លាកសញ្ញាផលិតផល ដែលបណ្តាលឲ្យប៉ះពាល់ដល់សុខភាពទារក។
ក្នុងលិខិតបដិសេធរបស់ក្រុមហ៊ុនម្សៅទឹកដោះគោនេះ បានសរសេរដូច្នេះថា៖«ក្រុមហ៊ុនបានសង្កេតឃើញពីភាពប្រក្រតីជាច្រើននៅក្នុងការប្រកាសរបស់ក.ប.ប.នៃក្រសួងពាណិជ្ជកម្ម ដែលលទ្ធផលនេះមានភាពខុសគ្នាយ៉ាងខ្លាំងពីលទ្ធផលដែលក្រុមហ៊ុនទទួលបានពីមន្ទីរពិសោធន៍BVAQ និងមន្ទីរពិសោធន៍ALSនៃប្រទេសសឹង្ហបុរី ដែលមានលេខកូដ៥៣៧,៥៦២,៥៦៣ និង៥៦៨ ដែលអគ្គនាយកដ្ឋានក.ប.ប. តែងតែយកទៅធ្វើពិសោធ និងទទួលស្គាល់ជាផ្លូវការ»។
ទាក់ទិននឹងបញ្ហានេះ លោក ផាន អូន អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ(ក.ប.ប.) បានបញ្ជាក់ថា ក.ប.ប.នឹងប្រមូលផលិតផលម្សៅនេះពីទីផ្សារ និងអ្នកប្រើប្រាស់។ ប៉ុន្តែត្រូវរង់ចាំការសម្រេចរបស់រដ្ឋមន្ត្រីក្រសួងពាណិជ្ជកម្មជាមុនសិន។
បើតាមលោក ផាន អូន ដើម្បីដោះស្រាយបញ្ហានេះ ក.ប.ប.នឹងហៅជួបឪពុកម្តាយដែលដាក់ពាក្យបណ្តឹងលើការប្រើប្រាស់ផលិតផលនេះ និងតំណាងក្រុមហ៊ុនម្សៅទឹកដោះគោ Nutrilatt នៅថ្ងៃទី៣ ខែកញ្ញាខាងមុខនេះ៕