​កម្មវិធី​ទូរ​សព្ទ TikTok ត្រូវបាន​ស្ថិតនៅត្រង់​ចំណុចកណ្ដាល​នៃ​ព្យុះភ្លៀង​ការទូត​រវាង​សហរដ្ឋអាមេរិក​និង​ចិន​។ ប្រធានាធិបតី ដូ​ណា​ល់ ត្រាំ បាន​ចុះហត្ថលេខា​លើ​បញ្ជា​ប្រតិបត្តិ​កាលពី​ថ្ងៃទី​៦ ខែសីហា ដើម្បី​ទុកពេល​៤៥​ថ្ងៃ​ឲ្យ​ក្រុមហ៊ុន​អាមេរិក​បញ្ឈប់​ការធ្វើ​អាជីវកម្ម​ជាមួយ​ក្រុមហ៊ុន​ចិន ByteDance ដែលជា​ម្ចាស់ TikTok ឬក៏​ចរចា​លក់​កម្មវិធី​នេះ​ឲ្យ​ក្រុមហ៊ុន​អាមេរិក​កាន់កាប់​វិញ​។ TikTok ប្រកាសថា ខ្លួន​នឹង​ជំទាស់​បញ្ជា​នេះ​។​

 

​ក្នុង​លិខិត​ផ្ញើ​ទៅ​ឲ្យ​បុគ្គលិក និង​ក្រុមហ៊ុន ByteDance លោក Kevin Mayer ដែល​ចូលកាន់​តំណែង​នៅ TikTok ចាប់តាំងពី​ខែឧសភា បាន​បញ្ជាក់ថា បរិយាកាស​នយោបាយ បាន​ប្រែប្រួល​លឿន​រហ័ស​ក្នុងពេល​ប៉ុន្មាន​សប្ដាហ៍​ចុងក្រោយ ហើយ​ជា​លទ្ធផល លោក​បាន​សម្រេចចិត្ត​ចាក​ចេញពី​ក្រុមហ៊ុន​នេះ​។  នេះ​បើតាម​ការចុះផ្សាយ​របស់​ទីភ្នាក់ងារ​ព័ត៌មាន AFP ។​

 

«​ខ្ញុំ​យល់ថា តួនាទី​ដែល​ខ្ញុំ​បាន​ចូលកាន់​នេះ រួម​មានការ​ដំណើរការ TikTok ទូទាំង​សកល  នឹងមាន​ការផ្លាស់ប្តូរ ដោយសារ​សកម្មភាពរ​បស់​រដ្ឋបាល​អាមេរិក​ដែល​ជំរុញ​ឲ្យ​លក់​ទៅ​ឲ្យ​ក្រុមហ៊ុន​អាមេរិក​»​។ លោក Mayer អះអាង​បែបនេះ​។ TikTok និយាយ​ក្នុង​សេចក្តីថ្លែងការណ៍​ថា ខ្លួន​គោរព​តាម​ការសម្រេចចិត្ត​រប​ស់លោក Mayer និង​អរគុណ​សម្រាប់​ពេលវេលា​របស់លោក​ជាមួយ​ក្រុមហ៊ុន​។ 

 

​ការសម្រេច​លាលែង​ពី​តំណែង​នៅ TikTok​របស់លោក Mayer កើតឡើង​ប៉ុន្មាន​ថ្ងៃ​ប៉ុណ្ណោះ​ក្រោយ TikTok ប្រកាសថា ខ្លួន​នឹង​ប្ដឹង​ជំទាស់​វិធានការ​របស់​ប្រធានាធិបតី​អាមេរិក ដូ​ណា​ល់ ត្រាំ មកលើ​ខ្លួន ក្រោម​ហេតុផល​ថា ប៉ះពាល់​សន្តិសុខ​អាមេរិក​។ 

​អ្វីដែល​អាមេរិក​បារម្ភ​ខ្លាំង​ពី TikTok ដែលមាន​អ្នកប្រើប្រាស់​ជាង​១០០​លាន​នាក់​នៅ​អាមេរិក និង​ជាង​១​ពាន់​លាន​នាក់​នៅ​ទូទាំង​ពិភពលោក គឺ​ទិន្នន័យ​អ្នកប្រើប្រាស់​ដែល​អាច​ធ្លាក់ចូល​ដល់ដៃ​រដ្ឋាភិបាល​ចិន ខណៈ​ចិន​មានច្បាប់​កំណត់​ឲ្យ​ក្រុមហ៊ុន​ខ្លួន​ផ្ដល់ព័ត៌មាន​សម្រាប់​ការស៊ើបអង្កេត​ណាមួយ​។ ទាំង​ទីក្រុង​ប៉េកាំង ទាំង ByteDance សុទ្ធតែ​បាន​ទាត់ចោល​ការចោទប្រកាន់​បែបនេះ​។​

 

​ទាក់ទង​ការលក់​ប្រតិបត្តិការ​វិញ ទីភ្នាក់ងារ​ព័ត៌មាន AFP ផ្សាយ​ថា ក្រុមហ៊ុន​បច្ចេកវិទ្យា​Microsoft និង Oracle ស្ថិតក្នុង​ការចរចា​ជាមួយ TikTok លើ​កិច្ចព្រមព្រៀង​ទិញ​លក់​ប្រតិបត្តិការ​នៅ​អាមេរិក​។ ដោយឡែក​ក្រុមហ៊ុន Oracle ក៏​ចង់​ទិញ​ប្រតិបត្តិការ TikTok នៅ​អូស្ត្រាលី នូ​វែ​ល​សេ​ឡង់ និង​កាណាដា​ផងដែរ​៕