ជាតិ
ទាហានខ្មែរនៅតំបន់ជួរភ្នំដងរែក រីករាយ និងស្វាគមន៍វត្តមានទេសចរទៅកាន់ទីនោះ
× ឧត្តរមានជ័យ៖ កាលពីថ្ងៃទី១៦ ខែសីហាកន្លងទៅ ក្រុម Cambodia Amazing Trip Planner បានទៅកម្សាន្តនិងបោះជំរំតង់ «សួគ៌ាបព៌ត» នៅភ្នំដងរែកស្ថិតនៅភូមិអូរថ្ម ស្រុកអន្លង់វែង ខេត្តឧត្ដរមានជ័យ។ ដំណើរកម្សាន្តនេះ ត្រូវបានទទួលស្វាគមន៍យ៉ាងកក់ក្ដៅពីសំណាក់កងទ័ពដែលឈរជើងនៅព្រំប្រទល់កម្ពុជា-ថៃ ដោយមានការរៀបចំទទួលម្ហូបអាហារជាច្រើនមុខ និងការពារសុវត្ថិភាពដល់ភ្ញៀវទេសចរនាពេលយប់ផងដែរ។
លោក មាន ត្រេន កងទ័ពនៅព្រំប្រទល់កម្ពុជា-ថៃ ខេត្តឧត្តរមានជ័យ បានឱ្យដឹងថា នេះជាលើកទីមួយដែលមានភ្ញៀវទេសចរមកបោះជំរំតង់នៅលើភ្នំដងរែក ហើយលោកក៏ចង់ឱ្យភ្ញៀវទេសចរជាច្រើនទៀតមកកម្សាន្តនៅភ្នំដងរែកខេត្តឧត្តរមានជ័យ។ «ខ្ញុំចង់ឱ្យភ្ញៀវទេសចរមកលេងភ្នំដងរែកនេះ ដើម្បីឱ្យស្គាល់ថា នៅលើភ្នំដងរែកនេះ ពេលល្ងាចគឺចុះអ័ព្ទជាពិសេសពេលព្រឹកចុះអ័ព្ទងងឹតតែម្ដង ហើយអាកាសធាតុត្រជាក់ពេលយប់»។ នេះជាការបញ្ជាក់របស់លោក មាន ត្រេន។
លោកបានបន្ថែមថា ខេត្តជាយដែនមួយនេះ មានកន្លែងទេសចរណ៍ជាច្រើនដូចជា ភ្នំ២០០ រមណីយដ្ឋានប្រវត្តិសាស្ត្រផ្ទះតាម៉ុក ពើងតារួន និងកន្លែងដុតប៉ុល ពត ជាដើម។
ដើម្បីជ្រាប់ច្បាស់ សូមអញ្ជើញលោក-អ្នកនាងទស្សនាបទសម្ភាសរវាង កញ្ញា អ៊ុត រស្មី អ្នកសារព័ត៌មានថ្មីៗ២៥រាជធានី-ខេត្ត ជាមួយលោក មាន ត្រេន កងទ័ពនៅព្រំប្រទល់កម្ពុជា-ថៃ ដូចតទៅ៖
សូមបញ្ជាក់ថា កាលពីថ្ងៃទី១៦-១៨ ខែសីហា កន្លងទៅក្រុមកម្សាន្ត Cambodia Amazing Trip Planner បានរៀបចំជំរំតង់«សួគ៌ាបព៌ត» នាជួរភ្នំដងរែកនៅខេត្តឧត្តរមានជ័យ និងខេត្តព្រះវិហារ ដែលមានអ្នកចូលរួមជិត៥០នាក់។ ដំណើរកម្សាន្តនេះ ធ្វើឡើងក្នុងគោលបំណង លើកស្ទួយវិស័យទេសចរណ៍ក្នុងស្រុក ចូលរួមប្រើប្រាស់សេវាកម្មក្នុងស្រុក ជាពិសេសឱ្យភ្ញៀវទេសចរស្គាល់ពីសក្ដានុពលទេសចរណ៍ដ៏អស្ចារ្យក្នុងស្រុក។ Cambodia Amazing Trip Planner បានសហការជាមួយសារព័ត៌មានថ្មីៗ២៥រាជធានី-ខេត្ត ដើម្បីផ្សព្វផ្សាយពីតំបន់ទេសចរណ៍ក្នុងប្រទេសកម្ពុជា៕
Tag:
ឧត្តរមានជ័យ
ទេសចរណ៍
© រក្សាសិទ្ធិដោយ thmeythmey.com