ជាតិ
ទឹកធ្លាក់ «បុស្សស្បូវ» រមណីយដ្ឋានធម្មជាតិដ៏ស្រស់បំព្រងនៅខេត្តព្រះវិហារ
× ព្រះវិហារ៖ ទឹកធ្លាក់ «បុស្សស្បូវ» ជារមណីយដ្ឋានទេសចរណ៍ដ៏គួរឲ្យទាក់ទាញ និងមានសម្រស់ស្រស់ស្អាត បានលាក់ខ្លួននៅជើងភ្នំដងរែក ខេត្តព្រះវិហារ ។ ធម្មជាតិស្រស់បំព្រង អមព្រៃឈើតូចធំ លាយឡំជាមួយនឹងផ្ទាំងថ្ម តូច-ធំ ភ្ញៀវទេសចរអាចអង្គុយទទួលទានអាហារ និងងូតទឹកត្រជាក់ ក្រោមម្លប់ ដើមឈើ យ៉ាងរីករាយរំសាយអស់នូវក្តីទុក្ខកង្វល់។ ទឹកធ្លាក់នេះ ក៏កំពុងរង់ចាំស្វាគមន៍ភ្ញៀវទេសចរមកទស្សនានៅទីនេះផងដែរ។
សូមអញ្ជើញទស្សនាវីដេអូដូចតទៅ៖
លោក អឿ សុភាព មគ្គុទេ្ទសក៍នៅតំបន់ទឹកធ្លាក់បុស្សស្បូវ បានប្រាប់ ThmeyThmey25 ថា កាលពីមុនទឹកធ្លាក់នេះ មានតែភ្ញៀវទេសចរក្នុងតំបន់ខេត្តព្រះវិហារប៉ុណ្ណោះ ដែលមកទស្សនានៅថ្ងៃបុណ្យទានធំៗ ព្រោះមិនសូវមាន អ្នក ស្គាល់ទឹកធ្លាក់មួយនេះ។ មគ្គុទ្ទេសក៍រូបនេះ បានបន្ថែមថានៅទីនេះក៏មានទឹកធ្លាក់នៅដំណាក់ខាងក្រោមមាន កម្ពស់ជាង២០ម៉ែត្រផងដែរ ប៉ុន្តែដោយផ្លូវពិបាកចូលទើបពុំមានភ្ញៀវទេសចរណាចូលទៅបានឡើយ។
សព្វថ្ងៃទឹកធ្លាក់ «បុស្សស្បូវ» បានទាក់ទាញភ្ញៀវទេសចរពីតំបន់ឆ្ងាយៗមកទស្សនានៅផងដែរ។ ក្រៅពីងូតទឹក ដែលធ្លាក់ពីលើភ្នំដងរែក លោក-អ្នក ក៏អាចទស្សនាសម្រស់ធម្មជាតិ និងសម្រស់ទឹកធ្លាក់ជាដំណាក់ៗលើថ្ម និងពិសាអាហារដ៏ឈ្ងុយឆ្ងាញ់ដែលចម្អិន ដោយប្រជាជននៅទីនោះទៀតផង។
ទឹកធ្លាក់នេះ មានទីតាំងនៅភូមិតេជោបុស្សស្បូវ ឃុំស្រអែម ស្រុកជាំក្សាន្ត ខេត្តព្រះវិហារ ។ ភ្ញៀវទេសចរអាចធ្វើដំណើរ ចូលតាមផ្លូវក្រួសក្រហម មានចម្ងាយប្រមាណ ១៦ គីឡូម៉ែត្រផ្លូវជាតិនៅត្រង់ចំណុចកណ្តាលនៃផ្លូវបំបែកឆ្ពោះទៅតំបន់ប្រាសាទព្រះវិហារ និងទៅកាន់ទីប្រជុំជនស្រុកជាំក្សាន្តនៃខេត្តព្រះវិហារ។
សូមបញ្ជាក់ថា កាលពីថ្ងៃទី១៦-១៨ ខែសីហា កន្លងទៅក្រុមកម្សាន្ត Cambodia Amazing Trip Planner បានរៀបចំជំរំតង់ «សួគ៌ាបព៌ត» នាជួរភ្នំដងរែកនៅខេត្តឧត្តរមានជ័យ និងខេត្តព្រះវិហារ ដែលមានអ្នកចូលរួមជិត៥០នាក់។ ដំណើរកម្សាន្តនេះ ធ្វើឡើងក្នុងគោលបំណង លើកស្ទួយវិស័យទេសចរណ៍ក្នុងស្រុក ចូលរួមប្រើប្រាស់សេវាកម្មក្នុងស្រុក ជាពិសេសឱ្យភ្ញៀវទេសចរ ស្គាល់ពីសក្ដានុពលទេសចរណ៍ដ៏អស្ចារ្យក្នុងស្រុក។ Cambodia Amazing Trip Planner បានសហការជាមួយសារព័ត៌មានថ្មីៗ២៥ រាជធានី-ខេត្ត ដើម្បីផ្សព្វផ្សាយពីតំបន់ទេសចរណ៍ ក្នុងប្រទេសកម្ពុជា៕
Tag:
តំបន់ទេសចរណ៍
ភ្នំដងរែក
ទឹកធ្លាក់បុស្សស្បូវ
© រក្សាសិទ្ធិដោយ thmeythmey.com