Man City ត្រៀមកញ្ចប់លុយ១០០លានដុល្លារ និងកីឡាករ៣រូប ដើម្បីយក Messi

កីឡាអន្តរជាតិ

អន្តរជាតិ

Man City ត្រៀមកញ្ចប់លុយ១០០លានដុល្លារ និងកីឡាករ៣រូប ដើម្បីយក Messi

28, Aug 2020 , 5:59 pm

រូបភាព

ដោយ: ទេព ពិទូរ្យ

Manchester City ពិតជាបង្ហាញអារម្មណ៍ពេញចិត្តក្នុងការចង់បាន Lionel Messi ប្រសិនបើខ្សែបម្រើឆ្នើមរូបនេះចាកចេញពី Barcelona មែន។ មានបណ្តាញសារព័ត៌មានជាច្រើនដូចជា Sky Sport និង The Guardian ជាដើម ផ្សាយថា ក្លិបរហស្សនាមមេឃខៀវបានត្រៀមកញ្ចប់លុយជាង១០០លានដុល្លារ បូករួមទាំងកីឡាករ៣រូបផង ជាថ្នូរជាមួយក្លិបយក្សអេស្ប៉ាញដើម្បីទទួលបាន Messi ទៅរួមក្រុម។

តាមការផ្សាយរបស់ BBC កាលពីថ្ងៃទី២៥ ខែសីហា ខ្សែបម្រើសញ្ជាតិអាហ្សង់ទីន វ័យ៣៣ឆ្នាំរូបនេះ បានស្នើចាកចេញពី Camp Nou នៅរដូវកាលថ្មីនេះ។ Messi បានផ្ញើសារទៅកាន់ក្លិបអ្នកមានបុណ្យ ដោយស្នើក្លិបជួយសម្រួលកិច្ចសន្យាដែលនៅសល់ ដែលអាចអនុញ្ញាតឲ្យរូបគេអាចចាកចេញពីក្លិបដោយគ្មានបញ្ហា។

ក្រោយលេចលឺព័ត៌មាននេះ លោក Pep Guardiola អ្នកចាត់ការទូទៅ Man City បានបើកដំណើរការ ក្នុងការចរចាយកអតីតកូនក្រុមខ្លួនមករួមក្រុមជាថ្មីនៅលើទឹកដីអង់គ្លេសវិញ។

Man City ត្រូវបានគេជឿជាក់ថា បានត្រៀមខ្លួនរួចជាស្រេចក្នុងការផ្តល់ជូនទឹកប្រាក់ចំនួន ៨៩ លានផោន (១១៩ លានដុល្លារអាមេរិក) បូករួមទាំង Bernardo Silva, Gabriel Jesus និង Eric Garcia ជាថ្នូដើម្បីយកបាន Messi ពី Barcelona ។ ក្លិបនៅអង់គ្លេសមួយនេះ ពិតជាចង់បានម្ចាស់ពានរង្វាន់ Ballon d’Or ៦ សម័យកាលទៅរួមក្រុមយ៉ាងខ្លាំង ក្រោយខកខានប្រជែងយកពាន Premier League និង Champions League រដូវកាលមុន។

ក្រៅពី Man City ក្លិបដែលចង់បាន Messi ទៅរួមក្រុមរួមមាន Paris Saint-Germain, Inter Milan, Juventus, Chelsea និង Man Utd ជាដើម៕