១០០ថ្ងៃ ក្រសួងយុត្តិធម៌ដោះស្រាយសំណុំរឿងដែលកកស្ទះបានជាង៨០០០សំណុំរឿង

ជាតិ

១០០ថ្ងៃ ក្រសួងយុត្តិធម៌ដោះស្រាយសំណុំរឿងដែលកកស្ទះបានជាង៨០០០សំណុំរឿង

29, Aug 2020 , 12:03 pm

រូបភាព

លោក កើត រិទ្ធ រដ្ឋមន្រ្តីក្រសួងយុត្តិធម៌ និងជាប្រធានគណៈកម្មការដឹកនាំយុទ្ធនាការដោះស្រាយការកកស្ទះសំណុំរឿងតាមតុលាការ (រូបពីក្រសួងយុត្តិធម៌)

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ រយៈពេល១០០ថ្ងៃ នៃការអនុវត្តយុទ្ធនាការដោះស្រាយការកកស្ទះសំណុំរឿង ក្រសួងយុត្តិធម៌ បានដោះស្រាយសំណុំរឿងព្រហ្មទណ្ឌដែលបានជំនុំជម្រះរួចនៅតាមសាលាដំបូងរាជធានី-ខេត្ត បានជាង ៨ពាន់សំណុំរឿង។ បើតាមសេចក្ដីជូនដំណឹងរបស់ក្រសួងយុត្តិធម៌ ចេញផ្សាយថ្ងៃទី២៨ សីហា សំណុំរឿងដែលបានកកស្ទះនាពេលកន្លងមក នឹងបន្តដោះស្រាយឲ្យចប់សព្វគ្រប់នៅត្រឹមដំណាច់ឆ្នាំ២០២០នេះ។

ក្រោយប្រកាសដាក់ចេញ «យុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី ខេត្ត» កាលពីថ្ងៃទី១៨ ឧសភាកន្លងទៅ ក្រសួងយុត្តិធម៌ បានដោះស្រាយសំណុំរឿងដែលកកស្ទះនៅតាមសាលាដំបូង បានចំនួន ៨,១១៣សំណុំរឿង ស្មើនឹង ៦៣ភាគរយ នៃសំណុំរឿងកកស្ទះ។ សេចក្ដីជូនដំណឹងរបស់ក្រសួងយុត្តិធម៌ បញ្ជាក់ថា ការខិតខំដោះស្រាយបញ្ហាប្រឈមនានា នៅតាមបណ្ដាសាលាដំបូងរាជធានី-ខេត្ត ជាការចូលរួមយ៉ាងសកម្មប្រកបដោយឆន្ទៈ និងស្មារតីទទួលខុសត្រូវ។

អត្ថបទទាក់ទង

លោក កើត រិទ្ធ៖ មន្ត្រីយុត្តិធម៌ កុំធ្វើជា «ត្រីងៀតឆ្លៀតពង» នៅក្នុងយុទ្ធនាការដោះស្រាយការកកស្ទះសំណុំរឿង

តាមរយៈលទ្ធផលនៃការដោះស្រាយសំណុំរឿង ក្នុងរយៈពេល ១០០ថ្ងៃនេះ គណៈកម្មការដឹកនាំយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត រំពឹងថា សាលាដំបូងរាជធានី-ខេត្ត នឹងបន្តខិតខំដោះស្រាយការកកស្ទះសំណុំរឿងនៅតាមអង្គភាពឲ្យចប់សព្វគ្រប់នៅត្រឹមដំណាច់ឆ្នាំ២០២០នេះ ដោយប្រកាន់ខ្ជាប់នូវអភិក្រមការងារក្នុងយុទ្ធនាការ គឺ «លឿន ត្រឹមត្រូវ យុត្តិធម៌ និងមិនពុករលួយ»៕