ជាតិ
សិស្សនិទ្ទេស A កញ្ញា តែ ស៊ូចេង ចាប់ជំនាញសារព័ត៌មាន ព្រោះចង់ក្លាយជាមន្ត្រីផ្នែកទំនាក់ទំនង
×![]()
កញ្ញា តែ ស៊ូចេង និស្សិតឆ្នាំទី២ នៃដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍។ នាងគឺសិស្សនិទ្ទេស A លេខរៀងទី៣ ក្នុងឆ្នាំ២០១៨។ នៅក្នុងបទសម្ភាសជាមួយសារព័ត៌មានថ្មីៗ កញ្ញា តែ ស៊ូចេង បានរំឭកថា នាងសម្រេចចិត្ដដាក់ពាក្យប្រឡងចូលរៀន នៅដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ (DMC) ដោយសារនាងចង់ក្លាយជាមន្ត្រីផ្នែកទំនាក់ទំនង។ដោយក្តីស្រឡាញ់ការងារពាក់ព័ន្ធនឹងសារព័ត៌មាននេះ កាលណោះ យុវសិស្ស តែ ស៊ូចេង បានបោះបង់ចោលឱកាសអាហារូបករណ៍ជាច្រើនកន្លែង ដែលអាចចូលរៀនដោយមិនចាំបាច់ប្រឡងប្រជែង មកប្រឡងដណ្តើមកៅអីនៅ DMC។
កញ្ញា តែ ស៊ូចេង បានរៀបរាប់ថា ដោយក្ដីស្រលាញ់ និងចូលចិត្តខាងផ្នែកទំនាក់ទំនង ព្រមទាំងមានការជំរុញចិត្តពីមជ្ឈដ្ឋានជុំវិញ បានធ្វើឱ្យកញ្ញាសម្រេចចិត្ដដាក់ពាក្យប្រឡងចូលរៀន នៅដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍(DMC) ក្រោយបញ្ចប់ការប្រឡងបាក់ឌុបឆ្នាំ២០១៨ ដោយទទួលបាននិទ្ទេសA និងមានលំដាប់ពិន្ទុ៩៩,៩៩៨។ បច្ចុប្បន្ន ស៊ូចេង គឺជានិស្សិតឆ្នាំទី២នៃដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍។ និស្សិត តែ ស៊ូចេង បានបញ្ជាក់ប្រាប់សារព័ត៌មានថ្មីៗថា៖ «ខ្ញុំមានឱកាសទទួលបានអាហារូបករណ៍ច្រើនកន្លែង នៅតាមបណ្ដាសាកលវិទ្យាល័យផ្សេងៗ ប៉ុន្តែមិនបានសម្រេចចិត្តចាប់យកឱកាសទាំងអស់នោះឡើយ ដោយសារតែការប្រឡងចូល DMC គឺជាគោលដៅធំរបស់ខ្ញុំ។»
មុននឹងបានចូលរៀននៅ DMC បេក្ខជនទាំងអស់ ត្រូវឆ្លងកាត់នូវការប្រឡងពីរដំណាក់កាល គឡឺការប្រឡងសរសេរ និងសម្ភាសផ្ទាល់។ ដូច្នេះអ្នកដែលចង់ចូលរៀននៅទីនេះ ត្រូវត្រៀមខ្លួនឱ្យបានល្អបំផុត ព្រោះមានតែសិស្ស៦០នាក់ប៉ុណ្ណោះ ដែលនឹងត្រូវជ្រើសរើសក្នុងមួយឆ្នាំៗ ទាំងថ្នាក់អាហាករូបករណ៍ និងបង់ថ្លៃ។ កញ្ញា តែ ស៊ូចេង បញ្ជាក់ មុននឹងបន្តពីចំណុចដែលសិស្សានុសិស្សត្រូវត្រៀមខ្លួនឲ្យរួចរាល់ មុនការប្រឡងប្រជែងមកដល់។
សម្រាប់ កញ្ញា តែ ស៊ូចេង ដើម្បីឲ្យការប្រឡងសរសេរ ជោគជ័យ បេក្ខជនចាំបាច់ត្រូវមានចំណេះដឹង និងវប្បធម៌ទូទៅទូលំទូលាយ, ភាសាអង់គ្លេស,ចាប់អារម្មណ៍ខ្ពស់ក្នុងវិស័យសារព័ត៌មាន។ ចំណែកឯដំណាក់កាលសម្ភាស ក៏មិនខុសគ្នាពេកពីការប្រឡងសរសេរដែរ ពោល គឺអ្នកត្រូវដឹងពីព្រឹត្តិការណ៍ដែលបាន និងកំពុងកើតឡើងនៅក្នុងសង្គម និងពិភពលោក។
នៅក្នុងការប្រឡងសរសេរ ហាក់មិនសូវលំបាកប៉ុន្មានទេ ប្រសិនបើយើងបានត្រៀមខ្លួនជាមុន។ រាល់សំណួរនៅក្នុងការប្រឡង សុទ្ធតែពាក់ព័ន្ធទៅនឹងស្ថានការណ៍ទូទៅទាំងក្នុង និងក្រៅស្រុក។ ដូច្នេះបេក្ខជនទាំងអស់ ចាំបាច់ត្រូវចេះ តាមដាន សង្កេត នូវអ្វីដែលកំពុងតែកើតមាននៅក្នុងសង្គម។»
និស្សិតឆ្នាំទី២រូបនេះ ថានាងនឹងចាប់យកអាជីពជាមន្ត្រីទំនាក់ទំនង ព្រោះវាគឺជាចំណង់ចំណូលចិត្ត ហើយក៏ស្ថិតក្នុងចំណោមការងារ ដែលមានតម្រូវខ្ពស់ក្នុងទីផ្សារដែរ៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
