COVID-19
ជាតិ
ក្រសួងសុខាភិបាលស្នើអាជ្ញាធរពង្រឹងកម្លាំងយាមនៅមណ្ឌលចត្តាឡីស័កដើម្បីទប់ស្កាត់ករណីលួចរត់
×![]()
ភ្នំពេញ៖ ទោះបី ស្ថានភាពជំងឺកូវីដ-១៩ នៅកម្ពុជាមានភាពធូរស្បើយក៏ពិតមែន ប៉ុន្តែវានៅតែជាបញ្ហាព្រួយបារម្ភ ខណៈប្រទេសដទៃហាក់មិនទាន់ធូរស្រាលនៅឡើយ ។ ដើម្បីទប់ស្កាត់ការរាលត្បាតជំងឺដ៏សាហាវនេះ ក្រសួងសុខាភិបាលបានគ្រប់គ្រងពលរដ្ឋ និងជនបរទេស ដែលបានធ្វើដំណើរចូលប្រទេសកម្ពុជា ឱ្យធ្វើចត្តាឡីស័កចំនួន១៤ថ្ងៃ នៅតាមមណ្ឌលចត្តាឡីស័កកម្រិត១ និង២ និងតាមសណ្ឋាគារដែលបានកំណត់។
លើសពីនេះ ក្រសួងសុខាភិបាលក៏បានស្នើរឱ្យអភិបាលរាជធានី-ខេត្តទាំងអស់ ចាត់កម្លាំងសមត្ថកិច្ចយាមនៅគ្រប់មណ្ឌលចត្តាឡីស័កជាប្រចាំ ដើម្បីការពារសុវត្ថិភាព និងកុំឱ្យមានអ្នករត់គេចពីមណ្ឌលចត្តាឡីស័កមុនថ្ងៃកំណត់។ សម្រាប់ក្រុមគ្រួសាររបស់អ្នកកំពុងធ្វើចត្តាឡីស័ក ត្រូវកំណត់ពេលវេលាសួរសុខទុក្ខតាមទូរស័ព្ទ នៅគ្រប់មណ្ឌលចត្តាឡីស័ក។ នេះបើតាមលិខិតរបស់ក្រសួងសុខាភិបាល នាថ្ងៃទី ២៩ ខែសីហា។
កាលពីខែកក្កដា និងដើមខែសីហាកន្លងទៅ ស្ត្រីខ្មែរ-អាមេរិក និងបុរស២នាក់នៅខេត្តព្រៃវែង បានរត់ចេញពីមណ្ឌលចត្តាឡីស័ក ហើយពួកគេក៏ត្រូវបានសមត្ថកិច្ចរកឃើញ និងដាក់នៅមណ្ឌលចត្តាឡីស័កវិញផងដែរ។
នៅថ្ងៃទី២៩ ខែសីហានេះ ក្រសួងសុខាភិបាលបានបញ្ជក់ថា មិនមានករណីឆ្លងថ្មី និងមិនមានអ្នកជាសះស្បើយ ខណៈអ្នកជំងឺនៅសល់តែ៨នាក់ប៉ុណ្ណោះ។
បើតាមក្រសួងសុខាភិបាល អ្នកជំងឺ នៅសល់៨នាក់ កំពុងព្យាបាលនៅមណ្ឌលសុខភាពចាក់អង្រែទាំងអស់។ គិតត្រឹមថ្ងៃទី២៩ ខែសីហានេះ ក្នុងចំណោមអ្នកជំងឺ២៧៣នាក់ មានអ្នកជាសះស្បើយចំនួន២៦៥នាក់ ដោយស្រី៥៤នាក់ បុរស២១១នាក់ ស្មើនឹង៩៧.០៧ភាគរយ៕
Tag:
ក្រសួងសុខាភិបាល
© រក្សាសិទ្ធិដោយ thmeythmey.com
