«រដ្ឋាភិបាលសហរដ្ឋអាមេរិក មានការប្ដេជ្ញាចិត្តខ្ពស់ក្នុងការដោះស្រាយនូវរឿងរ៉ាវមួយចំនួនទាក់ទងនូវភាពងាយរងគ្រោះដោយសារអំពើជួញដូរមនុស្ស និងប្រាកដថា គ្រួសារទាំងនោះមានភាពរឹងមាំ (ជីវភាព)»។ នេះជាការលើកឡើងរបស់ លោកស្រី Veena Reddy ប្រធានទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្ដរជាតិប្រចាំកម្ពុជា ក្នុងដំណើរទស្សនកិច្ចទៅកាន់ភូមិបុស្សតាត្រាវ ឃុំស្វាយចេក ស្រុកអង្គរធំ ដើម្បីត្រួតពិនិត្យគម្រោង ក៏ដូចជាជួយសាងសង់ផ្ទះដល់គ្រួសារក្រីក្រ នាថ្ងៃទី២៨ សីហា។ 

  លោកស្រី Veena Reddy ប្រធានទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្ដរជាតិប្រចាំកម្ពុជា 
 

USAID បានគាំទ្រថវិការយៈពេល៥ឆ្នាំចាប់ពីឆ្នាំ២០១៥មក ដល់អង្គការ WINROCK លើការគាំទ្រផ្នែកមុខរបរដល់គ្រួសារក្រីក្រ និងងាយរងគ្រោះពីការជួញដូរមនុស្ស តាមរយៈការចំណាកស្រុកទៅប្រទេសថៃ។ លោកស្រី Ana Maria Dionela នាយិកាអង្គការ WINROCK ឱ្យដឹងថា លោកស្រីរីករាយដែលបានធ្វើការជាមួយអង្គការដៃគូ ដូចជាអង្គការលំនៅឋានមនុស្សជាតិកម្ពុជា ក្នុងការជួយគ្រួសារក្រីក្រនៅខេត្តសៀមរាប។ ជាមួយគ្នានោះ WINROCK បានផ្តល់មុខរបរដល់គ្រួសារក្រីក្របន្ថែមពីការទទួលបានផ្ទះថ្មី គឺមុខរបរខ្នាតតូចដូចជាការចិញ្ចឹមសត្វ និងវគ្គបណ្ដុះបណ្ដាលនានាលើមុខរបរផ្តល់ឱ្យ។ យ៉ាងណា នាយិកាអង្គការ WINROCK លើកទឹកចិត្តឱ្យគ្រួសារទាំងអស់ ត្រូវប្រឹងប្រែងជួយខ្លួនឯងបន្ថែមទៀត ដើម្បីសម្រេចគោលដៅដែលខ្លួនចង់បាន។

 

ចំណែកនាយិកាប្រចាំប្រទេសនៃអង្គការលំនៅឋានមនុស្សជាតិកម្ពុជា (Habitat for Humanity Cambodia)  លោកស្រី Bernadette Bolo-Duthy ផ្ទះគឺមានសារសំខាន់ណាស់ក្នុងកាលៈទេសៈជំងឺកូវីដ១៩នេះ ដើម្បីការការពារពីការរីតត្បាតនៃជំងឺមួយនេះ។ លោកស្រីបន្តថា ទោះវិបត្តិជំងឺកូវីដ១៩បានប៉ះពាល់ដល់គម្រោងសាងសង់ផ្ទះដល់ប្រជាពលរដ្ឋក្រីក្រមួយរយៈពេលយ៉ាងណាក្ដី តែអង្គការលោកស្រីមិនបញ្ឈប់សកម្មភាពទាំងនេះឡើយ ដោយយល់ថា ផ្ទះគឺមានសារសំខាន់សម្រាប់ពលរដ្ឋក្នុងកាលៈទេសៈនេះ។ តាមការបញ្ជាក់ពីលោកស្រីនាយិកា រយៈពេលជាង១៦ឆ្នាំ ចាប់ពីឆ្នាំ២០០៣មកនេះ អង្គការលំនៅឋានមនុស្សជាតិកម្ពុជា បានជួយសង់ផ្ទះ ទឹកស្អាត បង្គន់អនាម័យ និងវគ្គបណ្ដុះបណ្ដាលនានាដល់ដល់ពលរដ្ឋតាមសហគមន៍សរុបជាង១០ម៉ឺនគ្រួសារ៕