ចាប់ពីថ្ងៃទី១១ ដល់ថ្ងៃទី២៨ខែសីហា KOICA បានទិញផលិតផលក្នុងស្រុក ដើម្បីរៀបចំជាកញ្ចប់ស្បៀង ចែកជូនប្រជាជនងាយរងគ្រោះចំនួន ២០០០គ្រួសារ ដោយក្នុងនោះមានប្រជាជនចំណាកស្រុក ប្រជាជនជួបការលំបាកនៅទីលានចាក់សំរាម និងប្រជាជនក្រីក្រ។ បើតាម KOICA ប្រជាជនងាយរងគ្រោះទាំង២០០០គ្រួសារ រស់នៅតំបន់គោលដៅចំនួន៦ខេត្តក្រុង រួមមាន រាជធានីភ្នំពេញ ខេត្តកំពង់ស្ពឺ ក្រចេះ ឧត្តមានជ័យ បាត់ដំបង និងខេត្តសៀមរាប។
 

ទីភ្នាក់ងារសហប្រតិបត្តិការអន្តរជាតិកូរ៉េ (KOICA) បញ្ជាក់ថា ការផ្តល់កញ្ចប់ស្បៀងនេះ ស្ថិតនៅក្រោមកិច្ចសហប្រតិបត្តិការរវាងអាជ្ញាធរមូលដ្ឋាន និងអង្គការក្រៅរដ្ឋាភិបាលរបស់សាធារណរដ្ឋកូរ៉េ។ បើតាមទំព័រហ្វេសប៊ុក KOICA ក្នុងកញ្ចប់ជំនួយនោះ មានដូចជា ម្ហូបអាហារ និងផលិតផលសុខភាពចំនួន ១២មុខ។ 
 

ទាក់ទងនឹងជំនួយសន្តិសុខស្បៀងនេះ លោក ផាក ហ៊ឹងខ្យង់ ឯកអគ្គរដ្ឋទូតសាធារណរដ្ឋកូរ៉េប្រចាំនៅប្រទេសកម្ពុជា បានលើកឡើងថា៖ «យើងបានព្យាយាមប្រើប្រាស់ផលិតផលក្នុងស្រុកឲ្យបានច្រើន ដែលផលិតដោយសហគ្រាសសង្គម និងផលិតដោយជនងាយរងគ្រោះ ដូចនេះយើងមិនត្រឹមតែអាចជួយប្រជាជនស្ថិតនៅក្នុងគម្រោងជំនួយរបស់យើងប៉ុណ្ណោះទេ គឺយើងបានជួយដល់សេដ្ឋកិច្ចនិងប្រជាជនដែលកំពុងជួបការលំបាកបន្ថែមទៀត»។
 

សូមបញ្ជាក់ថា ទីភ្នាក់ងារសហប្រតិបត្តិការអន្តរជាតិកូរ៉េ (KOICA) ត្រូវបានបង្កើតឡើងនៅឆ្នាំ១៩៩១ ដើម្បីគាំទ្រដល់ការអភិវឌ្ឍសេដ្ឋកិច្ចនិងសង្គមកិច្ចរបស់ប្រទេសដៃគូ ហើយក៏ជា តំណាងរបស់អង្គភាពសហប្រតិបត្តិការណ៍អភិវឌ្ឍន៍ របស់សាធារណរដ្ឋកូរ៉េ ដែលអនុវត្តន៍កម្មវិធីថ្នាក់ជាតិ, កម្មវិធីជាសកល, ជំនួយមនុស្សធម៌ និងគម្រោងមូលនិធិសម្រាប់លុបបំបាត់ជំងឺឆ្លងជាអន្តរជាតិ៕