បើតាមលោក គង់ វិបុល ក្នុងកម្មវិធីស្តីពី«ការផ្តល់សេវា និងបច្ចុប្បន្នភាពព្រឹត្តិការណ៍ថ្មី» របស់អគ្គនាយកដ្ឋានពន្ធដារ កាលពីព្រឹកថ្ងៃទី២៧សីហា ការយកពន្ធប្រាក់ចំណេញលើអចលនទ្រព្យ និងពន្ធប្រាក់ចំណេញមូលធននេះ គឺមិនមែនជាពន្ធថ្មីដែលទើបបង្កើតឡើយ។ 

 

អគ្គនាយកពន្ធដាររូបនេះ បានបញ្ជាក់ថា រដ្ឋាភិបាលបានបង្កើតពន្ធប្រភេទនេះ នៅក្នុងច្បាប់ថវិកាជាតិ តាំងឆ្នាំ២០១០ មកម្ល៉េះ ហើយឱ្យអនុវត្តការយកពន្ធនេះនៅក្នុង ឆ្នាំ២០២០។ ប៉ុន្តែ ដោយសារត្រូវការពេលវេលាផ្សព្វផ្សាយឱ្យបានទូលំទូលាយ ដល់អ្នកមានជាប់កាតព្វកិច្ចបង់ពន្ធនេះ រាជរដ្ឋាភិបាលសម្រេចពន្យារពេលអនុវត្តនៅដើមឆ្នាំ២០២១។

 

លោកគង់ វិបុល មានប្រសាសន៍ដូច្នេះ៖«តាមពិតរាជរដ្ឋាភិបាល បានអនុញ្ញាតឱ្យអគ្គនាយកដ្ឋានពន្ធដារប្រមូលពន្ធនេះ ចាប់តាំងពីថ្ងៃទី១កក្កដា ឆ្នាំ២០២០មកម្ល៉េះ។ ប៉ុន្តែដោយសារតែយើងខ្ញុំត្រូវការពេលវេលាដើម្បីផ្សព្វផ្សាយ ដូច្នេះមានការពន្យារពេលនៃការអនុវត្តលើពន្ធលើចំណេញមូលធននេះ ទៅថ្ងៃទី១មករា ឆ្នាំ២០២១វិញ»។

 

សូមបញ្ជាក់ថា ក្នុងរយៈពេល៧ខែដើមឆ្នាំ២០២០ អគ្គនាយកដ្ឋានពន្ធដារ ប្រមូលថ្លៃពន្ធអាករគ្រប់ប្រភេទ ចូលថវិកាជាតិ បានប្រមាណ១,៨៧៧លានដុល្លារ។ តួលេខនេះ បានកើនឡើង៩,៦០ភាគរយ បើធៀបនឹងរយៈពេលដូចគ្នា កាលឆ្នាំ២០១៩៕