COVID-19
ជាតិ
×![]()
ភ្នំពេញ៖ ក្រសួងសុខាភិបាលប្រកាសរកឃើញ១ករណីថ្មីនៃCOVID-19 លើបុរសជនជាតិបារាំង វ័យ៣០ឆ្នាំ ដែលបានធ្វើដំណើរពីប្រទេសបារាំង មកដល់កម្ពុជា កាលពីថ្ងៃទី៣០សីហា ឆ្នាំ២០២០។ ១ករណីថ្មីនៃ COVID-19នេះ បានធ្វើឱ្យកម្ពុជាមានអ្នកឆ្លងសរុប ២៧៤នាក់ ដោយក្នុងនោះមានអ្នកជាសះស្បើយចំនួន២៦៦នាក់។ នេះបើតាមសេចក្តីប្រកាសក្រសួងសុខាភិបាល នៅព្រឹកថ្ងៃទី៣១ សីហានេះ។
បុរសជនជាតិបារាំងដែលឆ្លងកូវីដ-១៩នេះ មានអាស័យដ្ឋាននៅរាជធានីភ្នំពេញ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។ ដោយឡែក អ្នកធ្វើដំណើរជាមួយបុរសនេះ ចំនួន៨០នាក់ទៀត ត្រូវបានក្រសួងសុខាភិបាលយកសំណាកទៅធ្វើតេស្តរកកូវីដ-១៩អស់ហើយ ដោយលទ្ធផលអវិជ្ជមាន។ បច្ចុប្បន្នអ្នកទាំងនេះ កំពុងធ្វើចត្តាឡីស័ក១៤ថ្ងៃ នៅមណ្ឌលចត្តាឡីស័កវិទ្យាល័យបុរី១០០ខ្នង ចំនួន១៦នាក់ និង៦៤នាក់ទៀត ធ្វើចត្តាឡីស័កនៅសណ្ឋាគារ៤ទីតាំងផ្សេងៗគ្នានៅរាជធានីភ្នំពេញ។
ក្រសួងសុខាភិបាលបានរៀបរាប់ថា អ្នកធ្វើដំណើរទាំង៨០នាក់នោះ ជាមួយបុរសជនជាតិបារាំងដែលឆ្លងកូវីដ-១៩ខាងលើ មាន ជនជាតិខ្មែរ២៩នាក់, ចិន១២នាក់, អាមេរិក១៦នាក់, បារាំង១៦នាក់, កាណាដា៥នាក់, រុស្សី១នាក់ និងជនជាតិអៀរឡង់១នាក់។
សូមបញ្ជាក់ថា ១ករណីថ្មីនៃកូវីដ-១៩ដែលបានកើតឡើងលើបុរសជនជាតិបារាំងខាងលើនេះ គឺរកឃើញបន្ទាប់ពីកម្ពុជា ខានរកឃើញចំនួនអ្នកឆ្លងថ្មីនៃជំងឺនេះ អស់រយៈពេល១៦ថ្ងៃមកហើយ៕
Tag:
COVID-19
© រក្សាសិទ្ធិដោយ thmeythmey.com
