អត្ថបទពាណិជ្ជកម្ម
ក្រសួងទេសចរណ៍ និងក្រុមហ៊ុនកូកា-កូឡា កម្ពុជា រៀបចំវគ្គបណ្តុះបណ្តាលស្តីពី «ការអនុវត្តវិធានសុវត្ថិភាព អនាម័យចំណីអាហារ និងបដិសណ្ឋារកិច្ច» ដល់អាជីវករនៅកំពង់ធំ
×![]()
ដោយ: សារព័ត៌មានថ្មីៗ
ខេត្តកំពង់ធំ៖ថ្ងៃទី២៨ ខែសីហា ឆ្នាំ២០២០ - ក្រោមកិច្ចសហការរវាងក្រសួងទេសចរណ៍ និងក្រុមហ៊ុនកូកា-កូឡា បានរៀបចំវគ្គបណ្តុះបណ្តាលស្តីពី «ការអនុវត្តវិធានសុវត្ថិភាព អនាម័យចំណីអាហារ និងបដិសណ្ឋារកិច្ច» ដល់អាជីវករលក់ដូរតាមផ្លូវក្នុងខេត្តកំពង់ធំ ដែលវគ្គបណ្តុះបណ្តាលបានប្រព្រឹត្តទៅកាលពីព្រឹកថ្ងៃទី២៨ ខែសីហា ឆ្នាំ២០២០ នៅសាលប្រជុំសាលាខេត្តកំពង់ធំ ក្រោមអធិបតីភាពរបស់ ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ តំណាងដ៏ខ្ពង់ខ្ពស់ ឯកឧត្តមបណ្ឌិត ថោង ខុន រដ្ឋមន្ត្រីនៃក្រសួងទេសចរណ៍។
វគ្គបណ្តុះបណ្តាលនេះ ត្រូវបានសម្រិតសម្រាងឡើង មិនត្រឹមតែក្នុងគោលបំណងបញ្ជ្រាបការយល់ដឹងពីវិធានសុវត្ថិភាព អនាម័យ និងសេវាកម្មចំណីអាហារ ក្នុងអំឡុងពេលដ៏លំបាកដែលបង្កដោយវីរុសកូវីដ-១៩ ប៉ុណ្ណោះទេ តែក៏ផ្តោតសំខាន់លើការអភិវឌ្ឍសមត្ថភាពសហគ្រិនភាពជាស្ត្រីក្នុងព្រះរាជាណាចក្រកម្ពុជា ក៏ដូចជាជាកិច្ចចូលរួមជំរុញចរន្តទេសចរណ៍នៅកម្ពុជា ក្នុងអំឡុងពេលដែលសេដ្ឋកិច្ចកំពុងទទួលរងផលប៉ះពាល់ពីកូវីដ-១៩។ វគ្គបណ្តុះបណ្តាលនេះមានរយៈពេលកន្លះថ្ងៃ បែងចែកជាពីរវគ្គសំខាន់ៗ គឺវគ្គទី១ ផ្តោតលើទ្រឹស្តី និងវគ្គទី២ ជាការសង្កេត និងអនុវត្តជាក់ស្តែង ដែលមានសិក្ខាកាមប្រមាណជាង ១០០ នាក់ បានចូលរួមទទួលយកវគ្គបណ្តុះបណ្តាលនេះ។
ក្នុងកម្មវិធីនេះដដែល តាមរយៈកិច្ចសហការដ៏ស្អិតរមួតជាមួយក្រសួងទេសចរណ៍ និងក្រុមហ៊ុនកូកា-កូឡា ធុងសំរាមបែងចែក ដែលកែច្នៃពីឈើប៉ាឡែតប្រើប្រាស់រួច ចំនួន ១០០ ធុង ត្រូវបានធ្វើពិធីប្រគល់ជូនរដ្ឋបាលខេត្តកំពង់ធំ និងមន្ទីរទេសចរណ៍ខេត្ត ដើម្បីដាក់ឲ្យប្រើប្រាស់នៅតាមទីសាធារណៈ និងរមណីយដ្ឋានទេសចរណ៍នានាក្នុងខេត្តកំពង់ធំ។ សកម្មភាពនេះ តម្រង់ទៅរកទិសដៅរបស់ក្រុមហ៊ុនកូកា-កូឡា ដែលកំពុងព្យាយាមធ្វើគ្រប់សកម្មភាពដើម្បីសម្រេចឲ្យបាននៅត្រឹមឆ្នាំ២០៣០ នូវគោលដៅ «ប្រមូលកែច្នៃ» ឲ្យបាន ៥០% នៃចំនួនសំបកវេចខ្ចប់សរុបដែលយើងបានលក់លើទីផ្សារ។ ជាសក្ខីភាពនៃការសម្រេចបាននូវមួយជំហ៊ានទៀត ចំពោះគោលដៅរបស់យើង ក្នុងឆ្នាំ២០២០នេះ យើងបានចេញលក់ទឹកពិសាដាសានីចំនុះ ៣៥០ មីលីលីត្រ ដែលសំបកដបវេចខ្ចប់ទឹកពិសានេះ ផលិតពីប្លាស្ទិកដែលបានកែច្នៃរួច ១០០% ឬហៅថា «rPET» ដោយអនុលោមតាមស្តង់ដារអូស្ត្រាលី និងកាណាដា។
លោក រស់ សោភា នាយកផ្នែកច្បាប់ និងទំនាក់ទំនងកិច្ចការសាធារណៈប្រចាំប្រទេស បានថ្លែងក្នុងពិធីថា៖ «សកម្មភាពនាថ្ងៃនេះ គ្រាន់តែជាការចាប់ផ្តើមមួយក្នុងជំហ៊ានដំបូង ដោយយើងនឹងមិនបញ្ឈប់ត្រឹមតែសកម្មភាពប៉ុណ្ណេះទេ។ ក្រោមសក្តានុពលនៃកិច្ចសហការដ៏រឹងមាំមួយនេះ ក្រុមហ៊ុនប្តេជ្ញាថានឹងចូលរួមសហការ និងព្យាយាមធ្វើគ្រប់យ៉ាងតាមដែលអាចធ្វើទៅបាន ដើម្បីចូលរួមអភិវឌ្ឍវិស័យទេសចរណ៍នៅកម្ពុជា»។
ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ តំណាងដ៏ខ្ពង់ខ្ពស់ ឯកឧត្តមបណ្ឌិត ថោង ខុន រដ្ឋមន្ត្រីនៃក្រសួងទេសចរណ៍ មានប្រសាសន៍ក្នុងកម្មវិធីបិទវគ្គបណ្តុះបណ្តាលនោះថា៖«ខ្ញុំសូមថ្លែងអំណរគុណចំពោះ ក្រុមហ៊ុន កូកា-កូឡា កម្ពុជាដែលបានផ្តល់ធុងសំរាមកែច្នៃពីឈើបាលែត (Pallet) ចំនួន១០០ធុង និងធុងសំរាមជ័រចំនួន២០០ធុង ដល់រដ្ឋបាលខេត្តកំពង់ធំ និងថែ្លងអំណរគុណចំពោះក្រុមហ៊ុនដែលតែងតែជួយគាំទ្រការងារបរិស្ថាន និងទីក្រុងស្អាត និងសំណូរពរឲ្យក្រុមហ៊ុននៅតែបន្តជួយការងារទាំងនេះទៀតដើម្បីកម្ពុជាស្អាត កម្ពុជាបៃតង ឆ្ពោះទៅស៊ីហ្គេម ២០២៣»។
ក្រុមហ៊ុនកូកា-កូឡា បានបន្ថែមទៀតថា«ក្រុមហ៊ុនពិតជាចង់ឃើញការបើកដំណើរការអាជីវកម្មលើវិស័យសេវាកម្មទេសចរណ៍ ឲ្យមានភាពទាក់ទាញដើម្បីចូលរួមប្រកួតប្រជែងក្នុងតំបន់ និងអន្តរជាតិ។ ជាពិសេសអនាម័យ និងសុវត្ថិភាពចំណីអាហារនាពេលនេះ គឺពិតជាមានសារៈសំខាន់ខ្លាំងណាស់ ដើម្បីរួមចំណែកការលើកកម្ពស់វិស័យទេសចរណ៍ និង ការពារហានិភ័យពីការឆ្លងជម្ងឺរលាកផ្លូវដង្ហើម កូវីដ-១៩»៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
