សង្គមអន្តរជាតិ
អន្តរជាតិ
អ្នករាជានិយមថៃជាង១០០០នាក់ បង្ហាញការគាំទ្រមហាក្សត្រ ក្រោយផ្ទុះការតវ៉ាឲ្យកែទម្រង់...
បាតុករគាំទ្ររាជានិយមថៃ ជួបជុំក្នុងកីឡដ្ឋានមួយក្នុងទីក្រុងបាងកក។ រូបភាព Reuters
×![]()
ដោយ: តន ចាន់រិទ្ធារ៉ា
អ្នករាជានិយមថៃប្រមាណ១២០០នាក់ នៅថ្ងៃទី៣០ ខែសីហាបានជួបជុំគ្នាដើម្បីបង្ហាញការគាំទ្ររបស់ពួកគេលើស្ថាប័នមហាក្សត្រ ដែលនៅរយៈពេលចុងក្រោយ រងការវាយប្រហារមិនធ្លាប់មាន។ ពួកគេ បានស្នើឲ្យប្រជាជនថៃការពារស្ថាប័នកំពូលមួយនេះដោយអះអាងថា មហាក្សត្រមិនមានតួនាទីក្នុងការគ្រប់គ្រងប្រទេសឡើយ។ ពួកគេ ក៏បានដាក់ការទាមទារចំនួនបីដែលផ្ទុយពីការទាមទាររបស់ក្រុមប្រឆាំងរដ្ឋាភិបាលផងដែរ។
នៅថៃ បាតុកម្មត្រូវបានរៀបចំស្ទើរមិនលស់ថ្ងៃ។ ភាគច្រើននៃការប្រមូលផ្ដុំ គឺការតវ៉ាប្រឆាំងរដ្ឋាភិបាលដឹកនាំដោយនាយករដ្ឋមន្ត្រី ប្រាយុទ្ធ ចន្ទអូចា ។ បាតុករភាគច្រើនជាយុវជន និស្សិតសាកលវិទ្យាល័យ និងសិស្សក្រោមឧត្តមសិក្សាជាដើម ដោយពួកគេទាមទារឲ្យរំលាយសភា និងកែរដ្ឋធម្មនុញ្ញជាដើម។ បាតុករវ័យក្មេង ក៏ថែមទាមទារដោយចំហឲ្យមានកំណែទម្រង់ស្ថាប័នព្រះមហាក្សត្រថៃដ៏មានឥទ្ធិពលផងដែរ។
នៅពេលមនុស្សវ័យក្មេងធ្វើបាតុកម្មដែលប៉ះពាល់ដល់មហាក្សត្រ ប្រជាជនថៃមួយចំនួនដែលជាអ្នករាជានិយម ក៏នាំគ្នាធ្វើបាតុកម្មដូចគ្នាដើម្បីបង្ហាញការគោរពដល់មហាក្សត្រដែរ។ ចលនាថៃភក្តី ដែលមានសមាជិកជាជនជាតិថៃវ័យចំណាស់ៗ បានជួបក្នុងកីឡដ្ឋានមួយក្នុងទីក្រុងបាងកកនៅថ្ងែទី៣០ ខែសីហា ជាមួយនឹងបដាជាច្រើនសរសេរថា សង្គ្រោះជាតិ, កុំរករឿងអ្នកស្មោះត្រង់ ឬបើចង់ផ្ដួលរំលំរាជានិយម ត្រូវកន្លងសពខ្ញុំជាដើម។ នេះបើតាមការផ្សាយរបស់កាសែតបាងកកប៉ុស្តិ៍។
បើតាមកាសែតដដែល លោក Warong Dechgitvigrom អ្នកនយោបាយស្ដាំនិយម និងជាអ្នកបង្កើតក្រុមខាងលើក្នុងខែសីហានេះ អះអាងថា ក្រុមរបស់លោកមានគោលដៅការពារស្ថាប័នមហាក្សត្រជាមួយចំណេះដឹង និងការពិត។ លោកបន្តថា ជម្លោះក្នុងប្រទេសកើតចេញពីអ្នកនយោបាយ ហើយព្រះមហាក្សត្រក៏គ្មានព្រះរាជតួនាទីអ្វីក្នុងការដឹកនាំប្រទេសដែរ តែជាការគាំទ្រផ្នែកសីលធម៌ដើម្បីភ្ជាប់ប្រជាជនប៉ុណ្ណោះ។
ជាមួយគ្នានេះ បាតុករមួយក្រុម ក៏បានដាក់ការទាមទាររបស់ខ្លួនទៅកាន់រដ្ឋាភិបាលថៃផងដែរ ដោយក្នុងនោះមានការទាមទារឲ្យរក្សាសភា ការអនុវត្តទោសអតិបរមាលើអ្នកដែលចង់ផ្ដួលរាជានិយម និងការកែរដ្ឋធម្មនុញ្ញតាមនីតិវិធិសមស្របផងដែរ។ ការទាមទារទាំងនេះ ហាក់ផ្ទុយពីការចង់បានរបស់បាតុករជាយុវជន ខណៈការស្នើឲ្យដាក់ទោសធ្ងន់ធ្ងរលើអ្នកប្រមាថមហាក្សត្រ ក៏ត្រូវបានមើលឃើញថា សំដៅលើក្រុមយុវជនដែរ។
ការធ្វើបាតុកម្មម្ខាងៗបែបនេះ កំពុងក្លាយជាការព្រួយបារម្ភសម្រាប់ថៃ ព្រោះវាជាសញ្ញាបង្ហាញពីការបែកបាក់ក្នុងសង្គម។ លោក ប្រាយុទ្ធ ផ្ទាល់ ក៏ធ្លាប់លើកឡើងដែរថា ថៃនឹងធ្លាក់ក្នុងភ្លើងជម្លោះ ប្រសិនបើការបែងចែកបន្តមានបែបនេះ៕
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com
