អន្តរជាតិ
មេ UN ទទូចឲ្យឥណ្ឌាបញ្ឈប់ការប្រើប្រាស់ឧស្សាហកម្មធ្យូងថ្មដើម្បីជួយបរិយាកាសផែនដី ទិដ្ឋភាពអ័ព្ទក្នុងរដ្ឋធានីញូវដែលីដោយសារការបំពុលខ្យល់នាពេលកន្លងមក។ រូបភាព Xinhua
×
ដោយ៖កង ម៉េងហុង
អគ្គលេខាធិការអង្គការសហប្រជាជាតិបានស្នើឲ្យប្រទេសឥណ្ឌាបញ្ឈប់រាល់ការសាងសង់ស្ថានីយ៍ថាមពលដើរដោយធ្យូងថ្ម ដើម្បីចូលរួមចំណែកក្នុងការដោះស្រាយការប្រែប្រួលអាកាសធាតុសាកល។
ប្រមុខអង្គការសហប្រជាជាតិលោកAntonio Guterres បានទទូចអោយប្រទេសឥណ្ឌាងាកចេញពីឧស្សាហកម្មធ្យូងថ្មយ៉ាងឆាប់រហ័ស និងជាអចិន្ត្រៃយ៍ ដ្បិតថា វាជាការវិនិយោគដែលគ្មានបានប្រយោជន៍ និងមានផលប៉ះពាល់ខ្លាំង ថ្វីបើវាមានតម្លៃថោកក៏ដោយចុះ។
«ធ្យូងថ្មមិនមែនជាការវិនិយោគដែលបានផលមកវិញទេ ហើយវាក៏គ្មានតម្លៃពាណិជ្ជកម្មដែរ ពោលគឺជំនួញថាមពលធ្យូងថ្មនេះនឹងរលាយតាមផ្សែងប៉ុណ្ណោះ»។ នេះជាសម្តីលោក Guterres ក្នុងវេទិកាតាមអនឡាញមួយដែលរៀបចំឡើងកាលពីថ្ងៃសុក្រទី ២៧ សីហា។
យោងតាមសារព័ត៌មាន The Guardian អគ្គលេខាធិការរូបនេះបន្តទៀតថា ឥណ្ឌាមានលទ្ធភាពអាចក្លាយជាប្រទេសមហាអំណាចពិភពលោកដ៏ពិតប្រាកដមួយដែលអាចចូលរួមប្រយុទ្ធប្រឆាំងនឹងការប្រែប្រួលអាកាសធាតុ បើប្រទេសនេះបង្កើនល្បឿនក្នុងការផ្លាស់ប្តូរពីការប្រើប្រាស់ឥន្ធនៈហ្វូស៊ីលទៅជាថាមពលដែលអាចកកើតឡើងវិញ។
យ៉ាងណាមិញ រដ្ឋាភិបាលឥណ្ឌាហាក់មានភាពស្ទាក់ស្ទើរក្នុងការប្តេជ្ញាចិត្តសារជាថ្មីចំពោះការដោះស្រាយបញ្ហាប្រែប្រួលអាកាសធាតុ ដោយសារជារឿយៗប្រទេសឥណ្ឌារមែងប្រកាន់យកនូវគោលជំហរមួយដែលសង្កត់ធ្ងន់ថា ប្រទេសអ្នកមានគួរតែជាអ្នកទទួលខុសត្រូវខ្ពស់បំផុតចំពោះការបំភាយឧស្ម័នពុល រីឯបណ្តាប្រទេសកំពុងអភិវឌ្ឍគួរបន្តប្រើប្រាស់ហ្វូស៊ីលឥន្ធនៈ។ រដ្ឋាភិបាលនេះក៏បន្តជំរុញការផលិតថាមពលធ្យូងថ្មជំនាន់ថ្មី ទោះបីជាតម្លៃនៃថាមពលកកើតឡើងវិញបានធ្លាក់ចុះក៏ដោយ។
ទាក់ទិននឹងបញ្ហានេះ លោក Guterres បានជំទាស់ជំហររបស់ឥណ្ឌា ដោយលោកបានព្រមានថា ប្រជាជនឥណ្ឌា អាចនឹងរងផលប៉ះពាលធ្ងន់ធ្ងរ ក្នុងករណីដែលគេនៅតែបន្តពឹងផ្អែកលើឧស្សាហកម្មធ្យូងថ្ម។ គ្រោះថ្នាក់នោះវាស្តែងឡើងតាមរយៈការបំពុលបរិយាកាស ហើយវាធ្វើឱ្យទីក្រុងជាច្រើននៅឥណ្ឌាទទួលផលប៉ះពាល់ខ្លាំងដែរ។
«ការវិនិយោគលើប្រេងឥន្ធនៈហ្វូស៊ីលមានន័យថា វានឹងធ្វើអោយអត្រាស្លាប់របស់មនុស្ស និងអត្រាកើតជំងឺរបស់ប្រជាជនកើនឡើងកាន់តែច្រើន ហើយការចំណាយលើការថែទាំសុខភាពក៏កើនឡើងជាលំដាប់។ និយាយឲ្យខ្លីគឺ វាជាគ្រោះមហន្តរាយមនុស្សជាតិ និងភាពដុនដាបនៃសេដ្ឋកិច្ច»។ ប្រមុខអង្គការសហប្រជាជាតិសង្កត់ធ្ងន់ដូច្នេះ៕
© រក្សាសិទ្ធិដោយ thmeythmey.com