ភ្ជុំបិណ្ឌ៖ ក្រសួងសុខាភិបាល រំឭកពលរដ្ឋឲ្យបន្តវិធានអនាម័យ ដើម្បីការពារជំងឺកូវីដ-១៩

ជាតិ

សង្គមជាតិ

ភ្ជុំបិណ្ឌ៖ ក្រសួងសុខាភិបាល រំឭកពលរដ្ឋឲ្យបន្តវិធានអនាម័យ ដើម្បីការពារជំងឺកូវីដ-១៩

31, Aug 2020 , 4:22 pm

រូបភាព

សកម្មភាពប្រជាពុទ្ធបរិស័ពរាប់បាត្រនាថ្ងៃកាន់ទី១បិណ្ឌក្នុងឆ្នាំ២០១៨

ដោយ:

ភ្នំពេញ៖ ក្រសួងសុខាភិបាល បានណែនាំឱ្យពលរដ្ឋ និងទីវត្តអារ៉ាម បន្តអនុវត្តអនាម័យ ដើម្បីការពារជំងឺកូវីដ-១៩ នាថ្ងៃបុណ្យភ្ជុំបិណ្ឌខាងមុខនេះ ។

ក្រសួងសុខាភិបាល បានសង្កត់ធ្ងន់ថា ទោះជំងឺកូវីដ-១៩មិនទាន់រាតត្បាតបែបលក្ខណៈធ្ងន់ធ្ងរ ឈានចូលសហគមន៍ក្តី តែជំងឺកាចសាហាវនេះ នៅតែគំរាមកំហែងពលរដ្ឋ ដែលទាមទារឲ្យនាំគ្នាការពារ និងទប់ស្កាត់ជំងឺកូវីដ-១៩នៅគ្រប់ទីកន្លែង និងគ្រប់ពេលវេលា។

ក្រសួងសុខាភិបាល និងក្រសួងធម្មការ និងសាសនា បានណែនាំឲ្យពលរដ្ឋ និងព្រះសង្ឃត្រូវពាក់ម៉ាស់ និងប្រកាន់ខ្ជាប់នូវអនាម័យជានិច្ច នាថ្ងៃបុណ្យភ្ជុំបិណ្ឌខាងមុខនេះ ។ បើតាមក្រសួងសុខាភិបាល រាល់វត្តនីមួយៗ ត្រូវរៀបចំទឹកអាល់កុល និងវាស់កម្តៅដល់ពុទ្ធបរិស័ទដែលចូលវត្ត។ ចំពោះពុទ្ធបរិស័ទនៅពេលចូលទៅដល់ក្នុងវត្តដែលអង្គុយប្រគេនព្រះសង្ឃ សំពះអុជធូប រាប់បាត ឬពូនភ្នំខ្សាច់ផ្សេងៗ គឺត្រូវរក្សាគម្លាតពីគ្នា។

ដើម្បីជៀសវាងឆ្លងនូវជំងឺផ្សេងៗ ក្រសួងសុខាភិបាលបានណែនាំឲ្យពលរដ្ឋត្រូវបរិភោគអាហារដែលចម្អិនល្អ និងជៀសវាងអាហារដែលងាយបង្កឲ្យពុល។ ក្រសួងសុខាភិបាលក៏បានណែនាំឲ្យម្ចាស់លក់ចំណីអាហារនីមួយៗ រៀបចំតុ កៅអី ដោយអង្គុយនៅឆ្ងាយពីគ្នាមួយម៉ែត្រកន្លះ ហើយរៀបចំឲ្យមានសាប៊ូលាងដៃនៅគ្រប់បន្ទប់ទឹក និងណែនាំឲ្យបុគ្គលិកខ្លួនពាក់ម៉ាស់ជានិច្ច។

បុណ្យភ្ជុំបិណ្ឌខាងមុខនេះ ប្រាកដណាស់ថា ពលរដ្ឋនឹងទៅធ្វើបុណ្យតាមវត្ត ក៏ដូចជាធ្វើដំណើរកម្សាន្ត នៅតាមរមណីយដ្ឋាននានា ឬទៅស្រុកកំណើត។ ដោយសារមើលឃើញចំណុចនេះ ក្រសួងណែនាំឲ្យម្ចាស់រថយន្តឧស្សាហ៍សម្អាត និងរក្សាអនាម័យយានយន្តជានិច្ច។ សម្រាប់អ្នកធ្វើដំណើរ កុំប្រើប្រាស់មធ្យោបាយដែលផ្ទុកមនុស្សច្រើន ជាពិសេសកុំធ្វើដំណើរនៅពេលដែលខ្លួនមានរោគសញ្ញាក្អក ផ្តាសាយ ឬក្តៅខ្លួន។

សម្រាប់ម្ចាស់រមណីយដ្ឋាន សណ្ឋាគារ ឬផ្ទះសំណាក់ទាំងអស់ ក៏ត្រូវរៀបចំប្រព័ន្ធការពារសុវត្ថិភាពដល់ភ្ញៀវរបស់ខ្លួន តាមរយៈការគូសគំនូសសម្រាប់តម្រង់ជួររង់ចាំឆែកចូលបន្ទប់ ឬចាកចេញ រួមទាំងរៀបចំឲ្យមានម៉ាស៊ីនវាស់កម្តៅ ទឹកអាល់កុល និងសាប៊ូ តាមបន្ទប់ទឹកនីមួយៗជាស្រេច៕