ជាតិ
រមណីយារាមក្នុងវត្តអង្គរជ័យ អនុញ្ញាតឲ្យពុទ្ធបរិស័ទ និងទេសចរ ទៅសម្រាកលម្ហែយ៉ាងស្ងប់ស្ងាត់
×![]()
ដោយ: សារព័ត៌មានថ្មីៗ
រមណីយារាមវត្តអង្គរជ័យ ដែលមានខ្យុសចំនួន២១ សង់នៅប្របមាត់ស្រះនៅក្នុងវត្ត គឺជាទីកន្លែងដ៏ស្ងប់ស្ងាត់ សម្រាប់ឲ្យពុទ្ធបរិស័ទដែលទៅធ្វើបុណ្យ ឬភ្ញៀវទេសចរពីទីជិតឆ្ងាយ សម្រាកលម្ហែឥតគិតថ្លៃ។ លើសពីនេះ ទេសចរអាចថតរូបនៅក្នុងសួនផ្កាជាច្រើន និងចម្លាក់សត្វច្រើនប្រភេទនៅរមណីយរាមវត្តអង្គរជ័យ ដែលមានទីតាំងស្ថិតនៅភូមិអង្គរជ័យ ឃុំបន្ទាយដែក ស្រុកកៀនស្វាយ ខេត្តកណ្ដាលនេះបានដែរ។ ពុទ្ធបរិស័ទ និងអ្នកទេសចរ ក៏អាចឲ្យចំណីត្រី យកចំណីអាហារទៅទទួលទានផងដែរ ប៉ុន្តែត្រូវរក្សាអនាម័យ និងសណ្តាប់ធ្នាប់។
ព្រះគ្រូចៅអធិការវត្តអង្គរជ័យ ព្រះនាម សុខ វាសនា មានសង្ឃដីកាប្រាប់សារព័ត៌មាន Thmeythmey25ថា ព្រះអង្គបានផ្ដួចផ្ដើមសង់ខ្យុសទាំងនេះ គឺសម្រាប់ឲ្យពុទ្ធបរិស័ទ ដែលបានទៅធ្វើបុណ្យក្នុងវត្តអង្គរជ័យ សម្រាកលម្ហែ។ គ្រូចៅអធិការវត្ត អង្គរជ័យ មានសង្ឃដីកាដូច្នេះ៖«ដើម្បីទទួលពុទ្ធបរិស័ទ ពេលមកធ្វើបុណ្យ រួចពួកគាត់បានទៅអង្គុយសម្រាកលេង និងស្រូបយកខ្យល់អាកាសបាន»។
ព្រះគ្រូចៅអធិការវត្តអង្គរជ័យ ព្រះនាម សុខ វាសនា ខ្យុសទាំងអស់ មានចំនួន២១ទើបបញ្ចប់ការសាងសង់កាលពីថ្ងៃទី១៧ ខែសីហា ឆ្នាំ២០២០។ ក្រៅពីសង់នៅលើទឹកហើយ ពុទ្ធបរិស័ទ និងទេសចផង ក៏អាចទស្សនារូបចម្លាក់សត្វជាច្រើន គយគន់សួនផ្កា ដែលមានផ្កាស្រស់ស្អាតជាច្រើនប្រភេទ និងថតរូបលេងផងដែរ។ លើសពីនេះ ទេសចរក៏ដូចជាពុទ្ធបរិស័ទ អាចមើលត្រី ពីលើស្ពានឈើដ៏ទាក់ទាញ និងឲ្យចំណីត្រីទាំងនោះបានដែរ។
សម្រាប់ព្រះគ្រូចៅអធិការវត្ត អង្គរជ័យ ការបង្កើតកន្លែងសម្រាក និងកម្សាន្តនៅក្នុងវត្ត មិនមានចោទជាបញ្ហា ដែលធ្វើឲ្យមានផលប៉ះពាល់ដល់សណ្តាប់ធ្នាប់នៅក្នុងទីអារាមនោះទេ ផ្ទុយទៅវិញជាការជំរុញឲ្យពលរដ្ឋ កាន់តែជ្រះថ្លា។ ព្រះគ្រូចៅអធិការវត្ត អង្គរជ័យ មានសង្ឃដីកាដូច្នេះថា៖«ចំណុចនេះមិនមានបះពាល់អ្វីទេ ព្រោះសព្វថ្ងៃតាមវត្តអារាម គឺធ្វើដើម្បីឲ្យមនុស្សចូលច្រើន»។
បន្ថែមពីនេះ អ្នកទេសចរ ក៏អាចកចំណីអាហារទៅបរិភោគបានផងដែរ ក៏ប៉ុន្តែត្រូវទុកដាក់សំរាមឲ្យត្រឹមត្រូវ ក្នុងធុងសំរាម ដែលត្រូវបានដាក់នៅតាមខ្យុសនីមួយៗ។ ទោះជាយ៉ាងនេះក្តី ទីអារាមនេះ មិនអនុញ្ញាតឲ្យពុទ្ធបរិស័ទ និងញាតិញោម យកគ្រឿងស្រវឹងនិងយកឧបករណ៍បំពងសំឡេងចូលនោះទេ ហើយក៏ត្រូវរក្សាឥរិយាបថស្ងប់ស្ងាត់ មិនស្រែកឡូឡា នៅក្នុងរមណីយារាមវត្តអង្គរជ័យនេះដែរ។ នេះបើតាមសង្ឃដីកា របស់ព្រះគ្រូចៅអធិការវត្ត អង្គរជ័យ៕
© រក្សាសិទ្ធិដោយ thmeythmey.com
