អន្តរជាតិ
ឥណ្ឌាចោទចិនថា បង្កបញ្ហាថ្មីនៅតាមព្រំដែនជម្លោះបំពាន កងទ័ពឥណ្ឌា យាមល្បាតនៅតាមព្រំដែនឥណ្ឌា ចិន។ រូបភាព៖ Reuters
× យោធាឥណ្ឌា នៅថ្ងៃទី៣១ ខែសីហា បានចេញសេចក្តីថ្លែងការណ៍មួយដោយចោទចិនថា បានបង្កសកម្មភាពយោធាថ្មី នៅតំបន់ព្រំដែនជម្លោះរវាងប្រទេសទាំងពីរ។ សកម្មភាពយោធាថ្មីនេះ ត្រូវបានភាគីឥណ្ឌាអះអាងថា កើតឡើងនៅក្បែរកន្លែងប៉ះទង្គិចចាស់ ដែលកាលនោះមានទាហានឥណ្ឌាយ៉ាងហោចណាស់ចំនួន ២០នាក់បានបាត់បង់ជីវិត និងជាច្រើននាក់រងរបួស។
កម្តៅនៅតាមព្រំដែនឥណ្ឌា និងចិន ហាក់មានសភាពស្ងប់ស្ងាត់មួយរយៈ បន្ទាប់ពីកិច្ចចរចាយោធារវាងទីក្រុងញូវដែលី និងទីក្រុងប៉េកាំង បានធ្វើឡើងរហូតដល់ទៅ ៣ដង។ ប៉ុន្តែភាពតានតឹងនៅតែតាមព្រំដែនរវាងប្រទេសទាំងពីរបានកើនឡើងវិញ បន្ទាប់ពីឥណ្ឌាអះអាងថា ចិន បានបង្កសកម្មភាពយោធាជាថ្មី។
តាមរយៈសេចក្តីថ្លែងការណ៍មួយ ក្រសួងការពារជាតិឥណ្ឌា បានអះអាងថា កងទ័ពរំដោះប្រជាជនចិន បានចល័តទ័ព ដែលជាសកម្មភាពបង្ករឿង ដើម្បីផ្លាស់ប្តូរស្ថានភាពបច្ចុប្បន្ន ហើយក៏ជាការបំពានការឯកភាពគ្នាកន្លងដែរ។ ហេតុការណ៍នេះ បានកើតឡើងនៅភាគខាងកើតតំបន់ Ladakh ក្បែរតំបន់ជម្លោះលើកមុន នៅយប់ថ្ងៃទី២៩ ខែសីហា។ យ៉ាងណាក៏ដោយ ក្រសួងការពារជាតិឥណ្ឌា មិនបានបញ្ជាក់ទេ ថាតើមានការប៉ះទង្គិចគ្នាឬអត់។
ក្នុងសេចក្តីថ្លែងការណ៍ដដែលនេះ ឥណ្ឌា បានលើកឡើងថា កងទ័ពចិន បានបំពានកិច្ចព្រមព្រៀង ដែលកាត់បន្ថយភាពតានតឹងតាមព្រំដែន។ បើតាមទីភ្នាក់ងារព័ត៌មាន AFP ក្រសួងការពារជាតិលើកឡើងថា៖ «កងទ័ពឥណ្ឌា បានត្រៀមខ្លួនទុកជាមុន ដើម្បីទប់ស្កាត់សកម្មភាពរបស់ចិននៅភាគខាងត្បូងនៃជ្រោយទន្លេ Pangong Tso, ពង្រឹងទីតាំងឈរជើង និងបង្ការការផ្លាស់ប្តូរព្រំដែនជាឯកតោភាគីពីសំណាក់ចិន»។
មេបញ្ចាការកងទ័ពឥណ្ឌា និងចិន នៅថ្ងៃទី៣១ ខែសីហា បានជួបប្រជុំជាមួយគ្នា ដើម្បីជជែកពីបញ្ហានេះ។ ជំនួបមេបញ្ជាការយោធាខាងលើ ធ្វើឡើងនៅភូមិ Chushul ក្នុងតំបន់Ladakh។ ចាប់តាំងពីមានការប៉ះទង្គិចនៅក្នុងខែមិថុនាកន្លងមក វត្តមានកងទ័ពចិន និងឥណ្ឌា បានកើនដល់ប្រមាណ ១០ម៉ឺននាក់ នៅតាមតំបន់ព្រំដែនជម្លោះនេះ៕
© រក្សាសិទ្ធិដោយ thmeythmey.com