សារី ម៉ាត់​ណូ​រ៉ូ​ទីន ដែល​ទើប​ផ្ទេរ​ពី​វិសាខា​មក​ណាហ្គា ជាប់​ជា​កីឡាករ​ល្អ​ប្រចាំការ​ប្រកួត ជាមួយ​កីឡាករ​៣​រូប​ទៀត​
កីឡាជាតិ
ជាតិ
សារី ម៉ាត់​ណូ​រ៉ូ​ទីន ដែល​ទើប​ផ្ទេរ​ពី​វិសាខា​មក​ណាហ្គា ជាប់​ជា​កីឡាករ​ល្អ​ប្រចាំការ​ប្រកួត ជាមួយ​កីឡាករ​៣​រូប​ទៀត​
01, Sep 2020 , 7:29 pm        
រូបភាព
កីឡាករ សារី ម៉ាត់ណូរ៉ូទីន, ច្រឹង ពលរដ្ឋ, គី រីណា និង ជុង សុខា (រាប់ពីឆ្វេង),រូបភាពពី CNCC
កីឡាករ សារី ម៉ាត់ណូរ៉ូទីន, ច្រឹង ពលរដ្ឋ, គី រីណា និង ជុង សុខា (រាប់ពីឆ្វេង),រូបភាពពី CNCC
​កីឡាករ​៤​រូប​រួមមាន សារី ម៉ាត់​ណូ​រ៉ូ​ទីន​, ច្រឹង ពលរដ្ឋ​, ជុង សុខា និង​កីឡាករ គី រី​ណា ត្រូវបាន​គណៈកម្មការ​រៀបចំ​ការប្រកួត វាយតម្លៃ​ឲ្យ​ជាប់​ជា​កីឡាករ​ល្អ​ប្រចាំ​ការប្រកួត​ពានរង្វាន់​សម្តេច ហ៊ុន សែន ថ្នាក់ជាតិ​ជើង​ទីមួយ​។ នេះ​បើ​យោងតាម​ទំព័រ​ហ្វេ​ស​ប៊ុ​ក Hun Sen Cup​។​

 
​ខ្សែបម្រើ​ប្រយុទ្ធ សារី ម៉ាត់​ណូ​រ៉ូ​ទីន ដែល​ទើប​ត្រឡប់មក​ចូលរួម​ជាមួយ​ណាហ្គា​វើ​ល​កាលពី​ថ្ងៃទី​១៣ ខែសីហា ក្រោយ​ចែកផ្លូវ​ជាមួយ​វិសាខា ត្រូវបាន​គណៈកម្មការ​វាយតម្លៃ វាយតម្លៃ​ឲ្យ​ជាប់​ជា​កីឡាករ​ល្អ​ប្រចាំការ​ប្រកួត​។ ការវាយតម្លៃ​នេះ ធ្វើឡើង​ក្រោយ​រូបគេ​បានបង្ហាញ​ខ្លួន​យ៉ាង​ល្អជា​មួយក្រុម​ណាហ្គា​វើ​ល​ក្នុងជំនួប​ស្មើ ២-២ ជាមួយ​ព្រះខ័ន​រាជ​ស្វាយរៀង នា​ការប្រកួត​ជើង​ទី​១​វគ្គ​១/៤​ផ្តាច់ព្រ័ត្រ​នៃ​ពានរង្វាន់​សម្តេច ហ៊ុន សែន ថ្នាក់ជាតិ​នៅ​កីឡដ្ឋាន​ស្តា​ត​ចាស់​កាលពី​សប្តាហ៍​មុន​។  
 
​កីឡាករ​ខ្មែរ​-​អ៊ិ​ស្លាម​រូបនេះ បានបង្ហាញ​ទម្រង់​លេង​យ៉ាង​ល្អ និង​ជា​អ្នក​បញ្ជូន​បាល់​ឲ្យ​កីឡាករ គួច សុគ​ម្ភៈ ស៊ុត​បញ្ចូល​ទី​បានសម្រេច​ឲ្យ​ក្រុម​ណាហ្គា​វើ​ល​តាម​ស្មើ ១-១ ជាមួយ​ព្រះខ័ន​រាជ​ស្វាយរៀង​។ កីឡាករ គួច ដា​នី ជា​អ្នករក​គ្រាប់​បាល់​នាំមុខ ២-១ ឲ្យ​ណាហ្គា​វើ​ល មុន​កីឡាករ ហួយ ផល្លី​ន រក​គ្រាប់​ទី​ពីរ​ឲ្យ​ព្រះខ័ន​រាជ​ស្វាយរៀង បន្ទាប់ពី​គ្រាប់​បាល់​ទី​១​របស់ នុប តុលា​។​
 
​ក្រោយ​រួមរស់​ជាមួយគ្នា​បី​រដូវ​កាល កីឡាករ សារី ម៉ាត់​ណូ​រ៉ូ​ទីន បាន​ផ្ទេរ​ពី​ណា​ហ្គ​វើ​ល​ទៅ​វិសាខា​នៅ​ចុងឆ្នាំ​២០១៨ ក្រោយ​ជួយ​ឲ្យ​ក្លិប​នេះ​លើក​ពាន​ក្របខណ្ឌ​មិត្ត​ហ្វូ​ន​ខេ​ម​បូ​ឌា​ន​លី​គ​។ ប៉ុន្តែ​ក្រោយ​ចំណាយពេល​ជាង​១​ឆ្នាំ​ជាមួយ​ទ្រនំ​ថ្មី រូបគេ ក៏បាន​ត្រឡប់មក​ចូលរួម​ជាមួយ​ណាហ្គា​វើ​ល​សាជាថ្មី​នៅ​អំឡុង​ខែសីហា​នេះ បន្ទាប់ពី​ជួយ​ឲ្យ​វិសាខា​ទទួលបាន​ជើងឯក​រង​លី​គ​កំពូល​និង​លេខ​៣​ពាន​សម្តេច ហ៊ុន សែន ឆ្នាំ​២០១៩​។ 
 
​ជាមួយគ្នានេះ​កីឡាករ ច្រឹង ពលរដ្ឋ ដែល​រួមចំណែក​ជួយ​ឲ្យ​ក្រុម​វិសាខា​រក្សា​លទ្ធផល​ស្មើ ១-១ ជាមួយ​បឹងកេត ក៏​ត្រូវបាន​វាយតម្លៃ​ឲ្យ​ជាប់​ជា​កីឡាករ​ល្អ​ប្រចាំ​ការប្រកួត​ផងដែរ​។ ចំណែក​កីឡាករ ជុង សុខា ដែល​បង្ហាញខ្លួន​ឲ្យ​ក្រុម​គីរីវង់​សុខ​សែន​ជ័យ​ក្នុងជំនួប​ចាញ់​ភ្នំពេញ​ក្រោ​ន ២-១ និង​កីឡាករ គី រី​ណា ដែល​បង្ហាញខ្លួន​ឲ្យ​ព្រៃវែង​ក្នុងជំនួប​ចាញ់​កងយោធពល​ខេមរភូមិន្ទ ១-០ ក៏មាន​ឈ្មោះ​ក្នុង​បញ្ជី​ឈ្មោះ​កីឡាករ​ល្អ​ប្រចាំការ​ប្រកួត​ក្នុង​ពាន​សម្តេច ហ៊ុន សែន ជើង​ទី​១​នេះដែរ​។ 
 
​ទីផ្សារ​ដោះដូរ​កីឡាករ​ក្នុង​ពានរង្វាន់​ក្របខណ្ឌ​មិត្ត​ហ្វូ​ន​ខេ​ម​បូ​ឌា​ន​លី​គ បាន​បិទ​បញ្ចប់​នៅ​យប់​ថ្ងៃទី​៣១ ខែសីហា ឆ្នាំ​២០២០​។ ប៉ុន្តែ​នៅ​ជើង​ទី​ពីរ​យើង​សង្កេតឃើញថា ក្លិប​នីមួយៗ​ពុំមាន​ការផ្លាស់ប្តូរ​ឬ​នាំចូល​កីឡាករ​ថ្មី​គួរ​ឲ្យ​កត់សម្គាល់​នោះទេ ពោលគឺ​មានតែ​ក្លិប​មួយចំនួន​នោះទេ ដែលមាន​ការដោះដូ បញ្ចប់​កិច្ចសន្យា និង​នាំចូល​កីឡាករ​ថ្មី​។​
 
​ក្នុងនោះ​ក្លិប​បឹងកេត​បាន​នាំចូល​ខ្សែប្រយុទ្ធ Dzarma Bata ក្រោម​លក្ខខណ្ឌ​ខ្ចី​ជើង​ពី​អង្គ​រថា​យ​ហ្គឺ​រ ដើម្បី​ជំនួស​កៅអី​កីឡាករ Franc Santana Paiva​។ រីឯ​ក្លិប​ណាហ្គា​វើ​ល​បាន​នាំចូល​កីឡាករ សារី ម៉ាត់​ណូ​រ៉ូ​ទីន ក្រោយ​ចែកផ្លូវ​ជាមួយ​កីឡាករ Bisan George​។ ចំណែក​ក្លិប​នគរបាលជាតិ​បាន​ចុះកិច្ចសន្យា​ជាមួយ​កីឡាករ ម៉ាត់ យ៉ា​មីន អតីត​កីឡាករ​បឹងកេត​។ 
 
​ជាមួយគ្នានេះ​ក្រុម​អាស៊ី​អឺរ៉ុប​មានការ​នាំចូល​កីឡាករ​ថ្មី​គួរ​ឲ្យ​កត់សម្គាល់ ទោះបី​ពួកគេ​អស់​ឱកាស​ប្រជែង​ដណ្តើម​ជើងឯក​នៅ​រដូវ​កាល​នេះ​ក៏ដោយ​។ ពួកគេ​បាន​នាំចូល​កីឡាករ Bisan George, Gbenga Samuel, Wallixada ohammad Emran, គង់ រាត្រី​, ម៉ី គឹម​ឈាន​, អ៊ុ ឧ​ត្ត​ម​, ឈឹម សំបូរ និង អ៊ឹម សុ​ផា​និត្យ​។ ចំណែក គីរីវង់​សុខ​សែន​ជ័យ បាន​នាំចូល​កីឡាករ​៣​រូប​រួមមាន ប្រាក់ សុ​វណ្ណា​ពិសិដ្ឋ និង សេង សា​រ៉ាវុធ និង​អ្នកចាំទី ឈិន ឈៃ​នុត (​ខ្ចី​ជើង​ពី​ក្លិប​ភ្នំពេញ​ក្រោ​ន​)៕ 

Tag:
 បាល់ទាត់​
  សារី ម៉ាត់​ណូ​រ៉ូ​ទីន​
  Hun Sen Cup 2020
© រក្សាសិទ្ធិដោយ thmeythmey.com