ជាតិ
គោ ក្របី ៣៥ក្បាលនៅឃុំ២ក្នុងខេត្តស្វាយរៀង ងាប់ដោយសារជំងឺសារទឹក គោ ក្របី ៣៥ក្បាលនៅឃុំ២ក្នុងខេត្តស្វាយរៀង ងាប់ដោយសារជំងឺសារទឹក
× សត្វគោ ក្របី ចំនួន ៣៥ក្បាលបានងាប់ដោយសារការឆ្លងជំងឺសារទឹកបន្តគ្នាក្នុងឃុំចំនួន២ និងភូមិចំនួន ៥ ក្នុងនោះមានក្របីចំនួន ៣២ក្បាល ចាប់ពីថ្ងៃទី ១២ ខែសីហា ដល់ថ្ងៃទី ៣០ ខែសីហា ឆ្នាំ២០២០។ នេះបើតាមលោក សុំ សុទ្ធាវុទ្ធ អនុប្រធានមន្ទីកសិកម្មខេត្តព្រៃវែងប្រាប់សារព័ត៌មានThmeyThmey តាមទូរសព្ទ។
លោក សុំ សុទ្ធាវុទ្ធ បញ្ជាក់ថា កន្លងមកខេត្តស្វាយរៀង មិនធ្លាប់មានគោ ក្របី ស្លាប់ ច្រើនទេ គឺធ្លាប់មានត្រឹម ១-២ ក្បាលប៉ុណ្ណោះ។ មូលហេតុដែលធ្វើឲ្យគោ ក្របី ទាំង ៣៥ក្បាលស្លាប់ ព្រោះតែពលរដ្ឋមិនបានរាយការណ៍ទៅក្រសួងកសិកម្មឲ្យបានភ្លាមៗ។
ជំងឺសារទឹក កើតឡើងនៅរដូវភ្លៀងធ្លាក់ និងអាចចម្លងពីសត្វមួយទៅសត្វមួយទៀតតាមរយៈការប៉ះពាល់ជាមួយសត្វឈឺ ឬការឆ្លងតាមការស៊ីស្មៅកន្លែងដូចគ្នារបស់សត្វ។ ទោះបីជាជំងឺនេះឆ្លងពីសត្វមួយ តែវាមិនមានផលប៉ះពាល់ចំពោះមនុស្សដែលបរិភោគសាច់នោះទេ ប្រសិនបើចម្អិនបានឆ្អិនល្អ។ នេះបើតាមការបញ្ជាក់របស់អនុប្រធានមន្ទីកសិកម្មខេត្តស្វាយរៀង។
បើតាមក្រសួងកសិកម្ម ជំងឺសារទឹក ជាជំងឺឆ្លងដ៏កាចសាហាវក្នុងចំណោមជំងឺឆ្លងនានា ដែលបង្កឡើងដោយបាក់តេរីប៉ាស្ទ័ររ៉ែលឡាម៉ុល តូស៊ីដា។ ជំងឺនេះកើតទៅលើប្រភេទសត្វគោ ក្របី ចៀម ពពែ ជ្រូក នៅតំបន់ទំនាប សើមជោគជាំ ដក់ទឹក ពិសេសនៅរដូវភ្លៀង។ សត្វក្របី ងាយរងការឆ្លងច្រើនជាងគេ និងសត្វដែលមានវ័យជំទង់។
លក្ខណៈទូទៅ សត្វដែលកើតជំងឺសារទឹក មានហូរទឹកមាត់ ទឹកសំបោរ ។ រយៈពេល ៦-២៤ម៉ោង សត្វអាចស្លាប់ បើមិនមានការព្យាបាលទាន់ពេល។ ចំពោះវិធានការទប់ស្កាត់ ត្រូវធ្វើអនាម័យជាប្រចាំ ពិនិត្យគុណភាពចំណី និងសុខភាពសត្វ ហើយវិធានការសំខាន់បំផុតត្រូវចាក់វ៉ាក់សាំងការពារជំងឺសារទឹក៕
© រក្សាសិទ្ធិដោយ thmeythmey.com