Silva អតីតកីឡាករ Man City ឆ្លង COVID-19 ចំថ្ងៃបង្ហាញមុខឲ្យក្រុមថ្មី Sociedad

COVID-19

កីឡាអន្តរជាតិ

អន្តរជាតិ

Silva អតីតកីឡាករ Man City ឆ្លង COVID-19 ចំថ្ងៃបង្ហាញមុខឲ្យក្រុមថ្មី Sociedad

01, Sep 2020 , 4:40 pm

រូបភាព

ដោយ: ទេព ពិទូរ្យ

David Silva អតីតខ្សែបម្រើក្រុម Manchester City ដែលទើបផ្លាស់ទៅរួមក្រុម Real Sociedad បានធ្វើតេស្តចេញលទ្ធផលវិជ្ជមានជំងឺ COVID-19។ នេះបើតាមការប្រកាសរបស់ក្លិប Real Sociedad នៅថ្ងៃទី៣១ ខែសីហា។

ឈានចូលដល់វ័យ ៣៤ ឆ្នាំ កីឡាករសញ្ជាតិអេស្ប៉ាញរូបនេះបានទៅចូលរួមជាមួយក្លិបនៃក្របខណ្ឌ La Liga វិញ បន្ទាប់ពីរួមរស់ជាមួយក្រុមរហស្សនាមមេឃខៀវរយៈពេល ១០ ឆ្នាំ។ ១០រដូវកាលនៅទឹកដីអង់គ្លេស Silva បង្ហាញខ្លួនបាន ៤៣៦ ប្រកួត និងជួយក្រុមឈ្នះពានរង្វាន់សរុបចំនួន ១៤។

Silva បានបង្ហាញខ្លួនជាផ្លូវការក្នុងនាមជាកីឡាកររបស់ Real Sociedad នៅកីឡដ្ឋាន Anoeta ចំថ្ងៃដែលរូបគេពិនិត្យឃើញថាឆ្លងជំងឺរាតត្បាតសកលនេះដែរ។ បើទោះបីពិនិត្យឃើញថាឆ្លង COVID-19 មែន ប៉ុន្តែអតីតកីឡាករ Valencia រូបនេះ មិនមានចេញរោគសញ្ញាអ្វីទេ ខណៈសព្វថ្ងៃរូបគេកំពុងដាក់ចត្តាឡីស័ក និងទទួលការព្យាបាលពីគ្រូពេទ្យ។

Real Sociedad នឹងចាប់ផ្តើមការប្រកួតបើកឆាកក្របខណ្ឌលីគកំពូលអេស្ប៉ាញ La Liga រដូវកាល ២០១០-២១ ដោយត្រូវតទល់ជាមួយ Real Valladolid នៅថ្ងៃទី១៣ ខែកញ្ញា៕