ជាតិ
សង្គមជាតិ
គណៈកម្មការទី៧ ចុះបេសកកម្មនៅខេត្តព្រៃវែង ដើម្បីស្វែងយល់ពីស្ថានភាពអប់រំក្នុងក្របខណ្ឌខេត្ត រូបភាពពីគណៈកម្មការទី៧ នៃរដ្ឋសភា
× ភ្នំពេញ៖ គណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា ដែលដឹកនាំដោយលោក ហ៊ុន ម៉ានី បានចុះបេសកកម្មមកកាន់ខេត្តព្រៃវែង នៅថ្ងៃទី២ កញ្ញានេះ ដើម្បីស្វែងយល់បន្ថែមពីស្ថានភាពអប់រំក្នុងក្របខណ្ឌខេត្ត។ បើតាមលោក ហ៊ុន ម៉ានី ពាក់ព័ន្ធនឹងវិស័យអប់រំ យុវជន និងកីឡា គណៈកម្មការទី៧ នៃរដ្ឋសភា បានកត់សម្គាល់ឃើញថាក្រសួងអប់រំ បានដាក់ចេញនូវគោលការណ៏ជាបន្តបន្ទាប់ ក្នុងការដោះស្រាយបញ្ហាប្រឈមលើវិស័យអប់រំក្នុងបរិការណ៏កូវីដ១៩។
កិច្ចប្រជុំរបស់គណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា រៀបចំឡើង ដើម្បីស្វែងយល់បន្ថែមពីស្ថានភាពអប់រំក្នុងក្របខណ្ឌខេត្ត និងសភាពការណ៍ជាក់ស្តែងនៅមូលដ្ឋានផ្ទាល់លើការអនុវត្តវិធានការនានា ដែលដាក់ចេញដោយក្រសួងស្ថាប័ន ពាក់ព័ន្ធនឹងវិស័យអប់រំក្នុងបរិបទកូវីដ១៩។ ក្នុងកិច្ចប្រជុំខាងលើ ក៏បានលើកឡើងពីបញ្ហាប្រឈមនានា ដើម្បីរួមគ្នាស្វែងរកដំណោះស្រាយឆ្លើយតបដែលមានប្រសិទ្ធភាព និងទាន់ពេលវេលា។
លោក ហ៊ុន ម៉ានី ប្រធានគណៈកម្មការទី៧ បានវាយតម្លៃខ្ពស់ចំពោះការខិតប្រឹងប្រែងរបស់គណៈអភិបាលខេត្ត មន្ទីរ និងមន្ត្រីអប់រំទាំងអស់ ដែលបានចូលរួមយ៉ាងសកម្មក្នុងការអនុវត្តតាមចំណាត់ការរបស់រាជរដ្ឋាភិបាល និងក្រសួងអប់រំ យុវជន និងកីឡា ក្នុងការផ្តល់ការអប់រំ ដល់សិស្សានុសិស្សតាមគ្រប់លទ្ធភាព ក្នុងដំណាក់កាលកូវីដ១៩។
លោក ហ៊ុន ម៉ានី ប្រធានគណៈកម្មការទី៧ នៃរដ្ឋសភា
ប្រធានគណៈកម្មការទី៧រូបនេះ លើកឡើងថា៖ «ខ្ញុំយល់ថាស្ថានភាពវិបត្តិជំងឺកូវីដ១៩ នេះ ពិតណាស់ គ្មាននណាម្នាក់អាចរំពឹងទុកមុនបានឡើយ។ កន្លងមកក្រសួងអប់រំ និងមន្ទីរអប់រំផ្ទាល់បានខិតខំអនុវត្តការងារតាមអ្វីដែលអាចធ្វើបាន និងគ្រប់អស់ពីលទ្ធភាព ដោយប្រើប្រាស់នូវគ្រប់ធនធានដែលខ្លួនមានក្នុងដៃស្រាប់។ ប៉ុន្តែថ្វីបើយ៉ាងនេះក៏ដោយ អ្វីដែលបានធ្វើនេះ នៅមិនទាន់ល្អគ្រប់ទិដ្ឋភាព និងអាចឆ្លើយបានទាំងស្រុងទៅនឹងតម្រូវការជាក់ស្តែងឡើយ ដែលនេះទាមទារអោយយើងទាំងអស់គ្នារួមគ្នា បន្តតាមដាន វាយតម្លៃ ជំរុញ និងបំពេញបន្ថែមនូវអ្វីដែលខ្វះ ដើម្បីធ្វើយ៉ាងណាឲ្យលទ្ធផលទទួលបានកាន់តែល្អប្រសើរសម្រាប់រយៈពេលវែង»។
ទាក់ទងនឹងវិស័យអប់រំ យុវជន និងកីឡា គណៈកម្មការទី៧ នៃរដ្ឋសភា បានកត់សម្គាល់ឃើញថាក្រសួងអប់រំ យុវជន និងកីឡា បានដាក់ចេញនូវគោលការណ៏ជាបន្តបន្ទាប់ ក្នុងការដោះស្រាយបញ្ហាប្រឈមលើវិស័យអប់រំក្នុងបរិការណ៏កូវីដ១៩។ គណៈកម្មការទី៧ នឹងនៅបន្តតាមដាន ពិភាក្សារួមគ្នា ដើម្បីចូលរួមផ្តល់ជាធាតុចូលបន្ថែមក្នុងការដោះស្រាយនូវបញ្ហាទាំងឡាយដែលក្នុងសមត្ថកិច្ចរបស់គណៈកម្មការ។
សូមបញ្ជាក់ថា កាលពីខែសីហា ឆ្នាំ២០១៩ ប្រតិភូគណៈកម្មការទី៧ នៃរដ្ឋសភា បានជួបប្រជុំជាមួយគណៈអភិបាលខេត្ត និងប្រធានមន្ទីរទាំងបួនក្នុងបន្ទុក ដើម្បីស្វែងយល់ពីស្ថានភាពនៃការអភិវឌ្ឍជារួមក្នុងខេត្ត និងពិនិត្យ តាមដាននូវការអនុវត្តកម្មវិធីគោលនយោបាយរបស់រាជរដ្ឋាភិបាល។ ដោយឡែក កិច្ចប្រជុំព្រឹកនេះ គឺជាការចុះបេសកកម្មជុំទី២ របស់គណៈកម្មការទី៧ មកកាន់ខេត្តព្រៃវែង ដើម្បីបំពេញការងារការឆ្លើយតបទៅនឹងស្ថានភាពនៃការវិវត្តសង្គម ជាពិសេសក្នុងដំណាក់កាលកូវីដ១៩៕
Tag:
ហ៊ុន ម៉ានី
គណៈកម្មការទី៧
ព្រៃវែង
© រក្សាសិទ្ធិដោយ thmeythmey.com