ជាតិ
ផ្កាស្បៃរឿងដែលលោក យឿន ភា ដាំទុកលក់ក្លាយជាទីទេសចរណ៍ដ៏ទាក់ទាញនៅជើងភ្នំសំពៅ
× ភ្នំពេញ៖ ផ្កាចម្រុះពណ៌ ជាច្រើនប្រភេទកំពុងបង្អួតសម្រស់ដាក់សាធារណជន នៅជើងភ្នំសំពៅ នាភូមិសំពៅកើត ឃុំភ្នំសំពៅ ស្រុកបាណន់ ខេត្តបាត់ដំបង។ លោក យឿន ភា ម្ចាស់ចម្ការផ្កាស្បៃរឿង បានប្រាប់Thmeythmey 25 ថាដើមឡើយលោកដាំផ្កាទាំងនេះសម្រាប់ទុកកាត់ផ្កាលក់នៅរដូវបុណ្យទាន តែដោយសារទីនេះឧស្សាហ៍មានភ្ញៀវមកថតលេង លោកក៏ចាប់ផ្ដើមបង្កើតជាកន្លែងទេសចរណ៍នេះឡើង។ ចម្ការផ្កាដ៏ទាក់ទាញនេះ បើកទទួលទេសចរឲ្យចូលថតរូបកម្សាន្តជិត១ឆ្នាំកន្លះហើយ។
លោក យឿន ភា ម្ចាស់ចម្ការផ្កាស្បៃរឿង បានប្រាប់Thmeythmey 25 ថា ចម្ការរបស់លោកទាក់ទាញទេសចរព្រោះ មានផ្កាជាង៣០ប្រភេទដូចជា ផ្កាស្បៃរឿងខ្មែរ ផ្កាស្បៃរឿងថៃ ផ្កាសិរមាន់ កេសរកូល ផ្កាអមតៈជាដើម ហើយស្ថិតនៅពីមុខភ្នំសំពៅតែម្តង។ ផ្លូវចូលដែលសាងសង់ឡើងជារាងដូចរូងភ្នំអមដោយផ្កាជុំវិញ និងជាពិសេសសម្រស់ផ្ទះឫស្សីដែ លសាងសងដោយយកដើមដូងជាទីបង្អែក ក៏ជំរុញឲ្យទេសចរទៅកម្សាន្តទីនោះផងដែរ។ ទេសចរក៏អាចភ្លក់រសជាតិតែផ្កាអមតៈ ឬផ្កាមេអំបៅដែលដាំដុះនៅទីនេះផងដែរ។
ទឹកផ្កាមេអំបៅ ក្នុងរមណីយដ្ឋានចំការផ្កាជើងភ្នំសំពៅ
លោកបានបន្ថែមថា ផ្កាទាំងអស់នៅក្នុងចម្ការស្បៃរឿងជើងភ្នំសំពៅនេះ សឹងតែទាំងអស់ជាពូជផ្កាក្នុងស្រុក លើកលែងតែផ្កាស្បៃរឿងថៃប៉ុណ្ណោះ។
បើតាម លោក យឿន ភា ដើមឡើយលោកដាំផ្កាសម្រាប់លក់នៅរដូវបុណ្យទានប៉ុណ្ណោះ ប៉ុន្តែដោយភ្ញៀវតែងតែថតរូបលេង លោកក៏ច្នៃទៅជាទីតាំងទេសចរណ៍ថ្មីមួយនៅជើងភ្នំសំពៅនេះតែម្តង។ លោក យឿន ភាបានប្រាប់សារព័ត៌មានThmeyThmey25 ដូច្នេះថា៖«ដើមឡើយយើងដាំផ្កាលក់សម្រាប់ពិធីបុណ្យទាន ហើយយើងស្រលាញ់ផ្កាផង ហើយចេះតែមានភ្ញៀវមកថតលេង ដល់ពេលកាន់តែច្រើនទៅៗ ខ្ញុំក៏ចាប់ផ្ដើមយកលុយពីអ្នកចូលថត រហូតបង្កើតជាកន្លែងទេសចរណ៍នេះឡើង»។
ម្ចាស់ចម្ការរូបនេះបានថ្លែងទាំងសប្បាយរីករាយថា ជីវភាពគ្រួសាររបស់លោកមានភាពប្រសើរឡើងជាងមុន តាំងតែពីលោកប្តូរពីរបរដាំផ្កាលក់ មកបង្កើតរមណីយដ្ឋាន ដែលមានរយៈពេលប្រមាណ ១ឆ្នាំ៥ខែមកនេះ។ «ជីវភាពរបស់ខ្ញុំ មានភាពរីកចម្រើនជាងមុន ដោយទទួលបានចំណូលច្រើនជាងមុន គ្រាន់តែមានភាពនឿយហត់ជាងមុនឆ្ងាយណាស់ ព្រោះត្រូវប្រើគំនិតកែច្នៃរហូត។ ហើយបើកាល ដាំផ្កាលក់អត់ចាំបាច់គិតច្រើនទេ»។ នេះបើតាមលោក យឿន ភា។
លោក ភា ក៏បានសាងសង់ផ្ទះស្នាក់ចំនួន១ និងកំពុងសាងសង់កន្លែងបោះតង់ សម្រាប់ទេសចរប្រមាណ៨កន្លែងទៀតដែរ ដើម្បីទទួលទេសចរដែលតែងតែកើនឡើងឥតឈប់ឈរមកទស្សនចម្ការផ្ការបសខ្លួន៕
រូបភាពផ្ទះឫស្សីក្នុង ចំការផ្កាស្បៃរឿងជើងភ្នំសំបៅ
រូបភាពពីទំព័រហ្វេសប៊ុកចំការផ្កាស្បៃរឿង
© រក្សាសិទ្ធិដោយ thmeythmey.com