កីឡាអន្តរជាតិ
អន្តរជាតិ
Di Maria, Paredes និង Neymar ឆ្លង COVID-19 ក្រោយដំណើរកម្សាន្តលើកោះ Ibiza
× Angel Di Maria, Leandro Paredes និង Neymar បានធ្វើតេស្តចេញលទ្ធផលវិជ្ជមាន COVID-19 ក្រោយកីឡាករ Paris Saint-Germain ទាំង៣រូបនេះ ត្រឡប់ពីដំណើរកម្សាន្តរួមគ្នានៅលើកោះ Ibiza ក្នុងប្រទេសអេស្ប៉ាញកាលពីខែសីហា។ នេះបើតាមការផ្សាយរបស់សារព័ត៌មាន Talk Sport។
យ៉ាងណាក៏ដោយក្លិប PSG បានប្រកាសនៅលើបណ្តាញសង្គមរបស់ខ្លួនថាមានកីឡាករ៣នាក់ឆ្លងជំងឺរាតត្បាតនេះ ប៉ុន្តែមិនបានបញ្ជាក់ឈ្មោះនរណាម្នាក់ទេ។ «កីឡាករ PSG បីនាក់ត្រូវបានបញ្ជាក់ថាបានធ្វើតេស្តវិជ្ជមាន COVID-19 ហើយសព្វថ្ងៃកំពុងដាក់ឲ្យនៅដាច់ដោយឡែក និងព្យាបាល។ កីឡាករ និងបុគ្គលិកក្លិបទាំងអស់ នឹងត្រូវបន្តធ្វើតេស្តក្នុងរយៈពេលប៉ុន្មានថ្ងៃខាងមុខទៀត»។ នេះបើតាមសេចក្តីប្រកាសរបស់ក្លិបយក្សបារាំង។
ក្រោយខកចិត្តក្រោយចាញ់ Bayern Munich នៅវគ្គផ្តាច់ព្រ័ត្រ Champions League ក្តី កីឡាករមួយចំនួនដែលគេជឿជាក់ថាមានខ្សែបម្រើអាហ្សង់ទីន Di Maria និង Paredes រួមទាំងតារាឆ្នើមសញ្ជាតិប្រេស៊ីល Neymar នោះបានទៅកម្សាន្តរួមគ្នានៅលើកោះ Ibiza ។ Ibiza ជាកោះដ៏ល្បីល្បាញរបស់ប្រទេសអេស្ប៉ាញ។
ដោយសារអ្នកទាំងបីឆ្លង COVID-19 ដូច្នេះពួកគេនឹងត្រូវអវត្តមាននាជំនួបបើកឆាកក្របខណ្ឌ Ligue1 រវាងក្រុមម្ចាស់ការពារជើងឯក PSG និងក្រុម Lens នៅថ្ងៃទី១០ ខែកញ្ញា៕
Tag:
Paris Saint-Germain
COVID-19
© រក្សាសិទ្ធិដោយ thmeythmey.com