ជាតិ
ប្រធានផ្នែកដោះស្រាយវិវាទ ស្នើឲ្យកម្មករនិងក្រុមហ៊ុនភូមិវប្បធម៌ចរចាគ្នា ដើម្បីបញ្ចៀសការរំខានភ្ញៀវទេសចរ
បុគ្គលិករបស់ក្រុមហ៊ុនភូមិវប្បធម៌ ដែលតវ៉ា នៅខាងមុខភូមិវប្បធម៌ ក្នុងក្រុងសៀមរាប កាលពីថ្ងៃទី២២ សីហា។ (រូបផ្ដល់ដោយលោក លឹម សុផា ប្រធានសហជីពកម្មករភូមិវប្បធម៌)
×![]()
ដោយ: ឡាយ សុភាវតី
ភ្នំពេញ៖ ប្រធានការិយាល័យដោះស្រាយវិវាទការងារខេត្តសៀមរាបលោក ផេង ឆេងលី ស្នើឲ្យក្រុមកម្មករ និងក្រុមហ៊ុនភូមិវប្បធម៌ចរចាគ្នា ជៀសវាងបង្កការរំខានដល់អ្នកដទៃនិងប៉ះពាល់កិត្តិយសរៀងខ្លួន។ ការលើកឡើងបែបនេះ ដោយសារលោកឃើញភាគីទាំងពីរគ្មានដំណោះស្រាយសមស្របណាមួយ រួមទាំងបង្កសំឡេងរំខានដល់ភ្ញៀវទេសចរ។ 
កម្មករក្រុមហ៊ុនភូមិវប្បធម៌ ដែលរងផលប៉ះពាល់ដោយសារការកាត់ប្រាក់ឈ្នួល បាននាំគ្នាតវ៉ា រួមទាំងប្រើឧបករណ៍កងរំពងរំខាន ដល់ក្រុមហ៊ុន និងភ្ញៀវទេសចរនៅតំបន់នោះ តាមរយៈការចាក់សំឡេងហែសព កាលពីថ្ងៃទី២ កញ្ញា។មេសហជីពរបស់កម្មករក្រុមហ៊ុនភូមិវប្បធម៌ លោក លឹម សុផា បានឆ្លើយតបប្រាប់សារព័ត៌មានថ្មីៗថា ការចាក់សំឡេងហែសពនេះ គឺចង់បង្ហាញពីភាពមិនសប្បាយចិត្តនូវការបាត់បង់សិទ្ធិសេរីភាពនិងអត្ថប្រយោជន៍របស់ខ្លួន។ ជាមួយគ្នាដែរ លោក អះអាងថា ភាគីក្រុមហ៊ុនក៏បានយកឧបករណ៍បន្លឺសំឡេងបើកចម្រៀងខ្លាំងៗប្រណាំងប្រជែងជាមួយក្រុមលោកវិញដែរ។
ភាគីបុគ្គលិកដែលកំពុងបម្រើការងារនៅភូមិវប្បធម៌សុំមិនបញ្ចេញឈ្មោះ អះអាងប្រាប់សារព័ត៌មានថ្មីៗនៅថ្ងៃទី២ កញ្ញាតាមទូរស័ព្ទថា សកម្មភាពទាមទារនិងបង្កសំឡេង តាមរយៈការចាក់ភ្លេងហែសពនេះ គឺធ្វើឲ្យប៉ះពាល់កិត្តិយសរបស់ក្រុមហ៊ុនភូមិវប្បធម៌។
លោកថ្លែងថា៖ «កន្លងមកក្រុមហ៊ុនមិនដែលបញ្ឈប់បុគ្គលិកឡើយនៅអំឡុងពេលកូវីដ-១៩នេះ គឺគ្រាន់តែកាត់ប្រាក់ឈ្នួល២០ភាគរយនិងថ្លៃអាហារប្រចាំថ្ងៃប៉ុណ្ណោះ។ ការកាត់ប្រាក់នេះ ក្រុមហ៊ុនក៏បានបន្ថយម៉ោងធ្វើការ១ម៉ោងកន្លះដែរ ហើយកាត់ប្រាក់ខែតែអ្នកទទួលបានប្រាក់ខែ២០០ដុល្លារឡើងប៉ុណ្ណោះ។ ក្នុងដំណាក់កាលរងវិបត្តិកូវីដ-១៩នេះ ក្រុមអ្នកទាមទារគួរយល់ដល់ក្រុមហ៊ុនផង»។
ជាមួយគ្នាដែរ លោកបន្ថែមថា ភាគីក្រុមហ៊ុនក៏បានចេញលិខិតឲ្យបុគ្គលិកដែលតវ៉ាចូលបំពេញការងារវិញ ប៉ុន្តែក្រុមអ្នកទាមទារមិនព្រម។ បើតាមបុគ្គលិកកំពុងធ្វើការនៅក្រុមហ៊ុនភូមិវប្បធម៌រូបនេះ បានបញ្ជាក់ថា ក្រុមហ៊ុនបានកំណត់ថ្ងៃចរចាហើយ គឺថ្ងៃទី៩ ខែកញ្ញាខាងមុខ។
ពាក់ព័ន្ធនឹងវិវាទនេះ ប្រធានការិយាល័យដោះស្រាយវិវាទការងារខេត្តសៀមរាបលោក ផេង ឆេងលី បញ្ជាក់ថា កន្លងមកក្រុមការងារក្រសួងការងារ និងបណ្ដុះបណ្ដាលវិជ្ជាជីវៈ ក្រុមប្រឹក្សាអាជ្ញាកណ្ដាល និងអាជ្ញាធរខេត្តសៀមរាប បានចុះសម្របសម្រួលហើយ តែភាគីទាំងពីរនៅតែមិនត្រូវរ៉ូវគ្នា ទើបបណ្ដាលឲ្យរឿងនេះនៅអូសបន្លាយ។
«ការដាក់សំឡេងប្រណាំងប្រជែងគ្នានេះ បើភាគីទាំងពីរមិនបានសុំច្បាប់អនុញ្ញាតគឺខុសទាំងសងខាង។ ភាគីទាំងពីរគួរចូលចរចាគ្នាតាមសន្តិវិធី មិនគួរបណ្ដោយឲ្យមានសកម្មភាពទាមទារមិនចប់មិនហើយឡើយ ការមិនព្រមជជែកសម្រួលគ្នាវាមានតែធ្វើឲ្យប៉ះពាល់ដល់កិត្តិយសរៀងខ្លួននិងបង្កការរំខានដល់អ្នកដទៃ»។ នេះបើតាមការលើកឡើងរបស់លោក ឆេងលី។
ទាក់ទងនឹងការចាក់សំឡេងរំខានឌឺដងគ្នាទៅវិញទៅមករវាងភាគីក្រុមកម្មករតវ៉ា និងក្រុមហ៊ុននេះ ក៏ត្រូវបានអាជ្ញាធរខេត្តសៀមរាប ចុះថតយករូបភាព និងណែនាំពួកគេផងដែរ។ អភិបាលក្រុងសៀមរាប លោក នួន ពុទ្ធារ៉ា អះអាងថា ក្រុមទាំងពីរនេះ មិនបានសុំសិទ្ធិអនុញ្ញាតបន្លឺសំឡេងឡើយ ។ លោកបន្តថា ប្រសិនបើមានភាគីណាមួយ មិនអនុវត្តតាមការណែនាំនេះទេ អាជ្ញាធរនឹងអនុវត្តតាមនីតិវិធីច្បាប់។
ក្រោយការព្រមានណែនាំពីអាជ្ញាធរនេះ ក្រុមកម្មករដែលបន្តនាំគ្នាតវ៉ា លែងធ្វើសកម្មភាពចាក់សំឡេងរំខានគ្នាទៀតហើយ ខណៈភាគីក្រុមហ៊ុនបន្តធ្វើការងារធម្មតា នៅថ្ងៃទី៣ កញ្ញានេះ។
គួររម្លឹកថា បុគ្គលិកប្រមាណ៦០នាក់របស់ក្រុមហ៊ុនភូមិវប្បធម៌ បាននាំគ្នាទៅតវ៉ាជាថ្មីនៅមុខក្រុមហ៊ុនតាំងពីថ្ងៃទី១៤សីហា ដើម្បីទាមទារឲ្យក្រុមហ៊ុនដោះស្រាយបញ្ហា៣ចំណុចដល់ពួកគេ។ ពួកគេទាមទារឲ្យក្រុមហ៊ុន កំណត់ពេលចរចាអនុសញ្ញារួមជាមួយសហជីពឲ្យជាក់លាក់, សងប្រាក់២០ភាគរយនៃប្រាក់ឈ្នួលដែលក្រុមហ៊ុនបានកាត់ និងប្រាក់អាហារប្រចាំថ្ងៃ និងរក្សាការិយាល័យសិល្បៈ និងតួនាទីរបស់កម្មករនិយោជិតនៅដដែល។ តំណាងបុគ្គលិកដែលលើកគ្នាមកតវ៉ានោះ អះអាងថា ពួកគេនឹងបន្តតវ៉ា លើកបដាទាមទារនៅមុខក្រុមហ៊ុន ទាល់តែមានដំណោះណាមួយដែលខ្លួនអាចទទួលយកបាន៕
Tag:
វិវាទ
ភូមិវប្បធម៌
© រក្សាសិទ្ធិដោយ thmeythmey.com
