អន្តរជាតិ
ខួប៧៥ឆ្នាំជ័យជម្នះលើជប៉ុន៖ លោក ស៊ី រំឭកការលះបង់របស់ចិន-រុស្ស៊ី និងតួនាទីលើពិភពលោក ប្រធានាធិបតីចិន ស៊ី ជិនភីង ចាប់ដៃសមភាគីរុស្ស៊ី វ៉្លាឌីមៀ ពូទីន នាជំនួបកន្លងមក។ រូបភាព Xinhua
× ប្រធានាធិបតីចិន ស៊ី ជិនភីង បាននិយាយនៅថ្ងៃទី៣ ខែកញ្ញា ថា លោកត្រៀមខ្លួនធ្វើការជាមួយសមភាគីរុស្ស៊ី វ្ល៉ាឌីមៀ ពូទីន ដើម្បីការពារជ័យជម្នះសង្គ្រាមលោកលើកទីពីរ យុត្តិធម៌ និងជំរុញសន្តិភាពពិភពលោក។ បើតាមមេដឹកនាំចិនរូបនេះ មហាអំណាចទាំងពីរមានការទទួលខុសត្រូវលើការអភិវឌ្ឍ និងគាំពារប្រព័ន្ធពហុភាគីនិយម។
ប្រធានាធិបតីចិន ស៊ី ជិនភីង និងប្រធានាធិបតីរុស្ស៊ី វ្ល៉ាឌីមៀ ពូទីន បានផ្លាស់ប្ដូរលិខិតទៅវិញទៅមកនៅថ្ងៃទី៣ ខែកញ្ញា ឆ្នាំ២០២០ ដើម្បីអបអរខួបទី៧៥ឆ្នាំជ័យជម្នះក្នុងសង្គ្រាមលោកលើកទីពីរ។ ក្នុងសារទៅកាន់លោក ពូទីន លោក ស៊ី បានរំឭកពីការលះបង់របស់ប្រទេសទាំងពីរក្នុងតទល់ទាហានជប៉ុនក្នុងពេលសង្គ្រាម និងតួនាទីសម្រាប់ពេលបច្ចុប្បន្ន និងថ្ងៃខាងមុខ។
សង្គ្រាមលោកលើកទីពីរផ្ទុះនៅឆ្នាំ១៩៣៩ និងបញ្ចប់ទៅវិញនៅឆ្នាំ១៩៤៥ ។ អំឡុងពេលនេះ មេដឹកនាំចិនប្រាប់សមភាគីរុស្ស៊ីថា សង្គ្រាមដែលសាយភាយនៅអាស៊ី អឺរ៉ុប និងអូសេអានីជាដើមនោះ បានសម្លាប់ជីវិតទាំងយោធា និងស៊ីវិលច្រើនជាងមួយរយលាននាក់ ហើយរុស្ស៊ី និងចិនដែលជាសមរភូមិសំខាន់ បានលះបង់ឥតគណនា និងបានរួមចំណែកជាប្រវត្តិសាស្ត្រដើម្បីជ័យជម្នះនេះ។ នេះបើតាមការផ្សាយរបស់ទូរទស្សន៍រដ្ឋចិន CGTN ។
«នៅថ្ងៃនេះ៧៥ឆ្នាំមុន សង្គ្រាមប្រជាជនចិនប្រឆាំងការឈ្លានពានរបស់ជប៉ុន និងសង្គ្រាមសហភាពសូវៀតប្រឆាំងជប៉ុន ទទួលជោគជ័យ ដែលនាំដល់ជោគជ័យនៃសង្គ្រាមប្រឆាំងហ្វាស៊ីសរបស់ពិភពលោក។» លោក ស៊ី បញ្ជាក់បែបនេះក្នុងលិខិតរបស់ខ្លួន។ ប្រមុខរដ្ឋចិនបន្តថា ជាសមាជិកអចិន្ត្រៃយ៍ក្រុមប្រឹក្សាសន្តិសុខ ចិន និងរុស្ស៊ីមានការទទួលខុសត្រូវសំខាន់ក្នុងការជំរុញសន្តិភាព និងការអភិវឌ្ឍលើពិភពលោក។
ដោយឡែកក្នុងសារផ្ញើឲ្យលោក ស៊ី វិញ លោក ពូទីន បញ្ជាក់ថា វាជារឿងធម្មតាដែលរុស្ស៊ី និងចិនត្រូវការពារការពិតនៃប្រវត្តិសាស្ត្រសង្គ្រាមលោកលើកទីពីរ ហើយស្នើឲ្យប្រទេសទាំងពីរប្រឆាំងការប៉ុនប៉ងការទាត់ចោលលទ្ធផលជោគជ័យនេះ។ មេដឹកនាំរុស្ស៊ី ទំនងជាចង់និយាយសំដៅប្រទេសអឺរ៉ុប និងអាមេរិក ដែលដឹកនាំរណសិរ្សខាងលិចក្នុងការកម្ចាត់ហ្វាស៊ីសអាល្លឺម៉ង់។ កន្លងទៅ សម្ព័ន្ធមិត្តខាងលិចនេះ បានអះអាងពីការលះបង់របស់ខ្លួនក្នុងជ័យជម្នះនេះ ដោយមិនសូវលើកតម្លៃភាគីផ្សេងឡើយ។
ជាមួយគ្នានេះ លោក ពូទីន ក៏ប្រកាសពីឆន្ទៈរបស់រុស្ស៊ីក្នុងការចាប់ដៃជាមួយចិនទប់ស្កាត់សង្គ្រាម និងជម្លោះ ព្រមទាំងធានាស្ថិរភាព និងសន្តិសុខពិភពលោក៕
Tag:
ចិន
រុស្ស៊ី
ស៊ី ជិនភីង
វ្ល៉ាឌីមៀ ពូទីន
© រក្សាសិទ្ធិដោយ thmeythmey.com