ក្រោយរៀនចប់ជំនាញកសិកម្ម យុវជន សុធារិទ្ធិ បង្កើតផ្សារទិញបន្លែធម្មជាតិពីកសិករតាមបណ្តាខេត្ត

ជាតិ

ក្រោយរៀនចប់ជំនាញកសិកម្ម យុវជន សុធារិទ្ធិ បង្កើតផ្សារទិញបន្លែធម្មជាតិពីកសិករតាមបណ្តាខេត្ត

03, Sep 2020 , 7:59 am

រូបភាព

ដោយ:

លោក នូ សុធារិទ្ធិ បានបង្កើតផ្សារធម្មជាតិ ទទួលទិញកសិផលខ្មែរពីកសិករនៅខេត្តផ្សេងៗ ទូទាំងប្រទេស ដើម្បីជួយរកទីផ្សារដល់កសិករ។ ផលិតផលធម្មជាតិដែលលោកទទួលទិញមានដូចជាបន្លែ ត្រី សាច់ ផ្លែឈើ និងគ្រឿងផ្អាប់ ដូចជា ប្រហុក ផ្អក និងផលិតផលជាច្រើនទៀត។

យុវជនវ័យ ៣០ឆ្នាំរូបនេះ មានស្រុកកំណើតនៅខណ្ឌដង្កោ រាជធានីភ្នំពេញ បានបញ្ចប់ការសិក្សាថ្នាក់បរិញ្ញាបត្រនៅសាកលវិទ្យាល័យភូមិន្ទកសិកម្ម ជំនាញកសិកម្មនាឆ្នាំ ២០១២ និងបានចាប់បើកហាងចំការខ្មែរនៅឆ្នាំ ២០១៧។ លោកបានលើកឡើងថា៖ «ដោយសារការស្រលាញ់ និងជាសិស្សបានបញ្ចប់ការសិក្សាផ្នែកកសិកម្ម បានធ្វើការច្រើនជាមួយកសិករ ហើយនៅពេលចុះជួបផ្ទាល់ជាមួយពួកគាត់ៗ ដាំហើយអត់មានទីផ្សារ ខ្ញុំគិតក្នុងចិត្តថាថ្ងៃណាមួយខ្ញុំនឹងបើកផ្សារដើម្បីជួយពួកគាត់ ប៉ុន្តែជួយតាមលទ្ធភាពដែលជួយបាន»។

ស្ថិតក្នុងហាងលក់បន្លែធម្មជាតិចំការខ្មែរ ដែលមានទីតាំងនៅសង្កាត់ទំនប់ទឹក ខណ្ឌចំការមន រាជធានីភ្នំពេញ បុរសសម្បុរស្រអែមជាអ្នកគ្រប់គ្រងហាងផ្ទាល់បាននិយាយថា ទោះបីខ្លួនកើតនៅភ្នំពេញពិតមែន ប៉ុន្តែនៅជាយក្រុងនោះទេហើយគ្រួសារក៏ជាអ្នកកសិករដែរ ដូច្នេះការសម្រេចចាប់យកជំនាញកសិកម្មមិនមែនជារឿងចម្លែកនោះទេ។

យ៉ាងណាមិញលោកបានបង្ហាញពីមូលហេតុដែលជ្រើសរៀនជំនាញកសិកម្ម ដោយសារចិត្តស្រលាញ់កសិកម្ម និងមើលឃើញវិស័យកសិកម្មជាផ្នែកមួយដ៏សំខាន់សម្រាប់ជួយកសិករឲ្យមានប្រាក់ចំណូល និងជាទីផ្សារការងារដ៏ធំសម្រាប់និស្សិត។ ម្យ៉ាងទៀតអាកាសធាតុ និងសណ្ឋានដីកម្ពុជាមានអំណោយផលលើវិស័យកសិកម្ម និងការរៀនជំនាញនេះជាចំណែកមួយក្នុងការអភិវឌ្ឍប្រទេសឲ្យរីកចម្រើន និងជឿនលឿន តាមរយៈការផ្ដល់បច្ចេកទេស និងចូលរួមដោះស្រាយបញ្ហាទីផ្សារ។

អតីតនិស្សិតកសិកម្មរូបនេះបានបន្តថា បំណងដែលលោកចង់ជួយកសិករបានច្រើនហើយ តាមរយៈសកម្មភាពចុះផ្ដល់បច្ចេកទេសដាំដុះដោយផ្ទាល់ដល់ពួកគាត់ និងជួយរកទីផ្សារឲ្យពួកគាត់ដោយទទួលទិញកសិផលពីកសិករទាំងនោះជាប្រចាំ។

លោកបានបញ្ជាក់ទៀតថា ចំការខ្មែរបានធ្វើកុងត្រាជាមួយកសិករ ដើម្បីឲ្យពួកគាត់ដាំដុះបន្លែ ផ្លែឈើ ដែលមិនប្រើប្រាស់សារធាតុគីមី និងឲ្យពួកគាត់ផលិតក្នុងបរិមាណ ៣-៤គីឡូក្នុងបន្លែមួយមុខសម្រាប់កសិករម្នាក់។ ក្នុងនោះកសិករដែលបានចុះកុងត្រាត្រូវផ្ដល់បន្លែដល់ហាងចំការខ្មែរជារៀងរាល់ថ្ងៃ។ ហើយកសិផលរបស់កសិករ ត្រូវតែជាកសិផលធម្មជាតិ ដោយមានការពិនិត្យត្រឹមត្រូវពីអ្នកជំនាញកសិកម្ម មុននឹងយកមកលក់នៅភ្នំពេញ៕