COVID-19
ជាតិ
សង្គមជាតិ
លោក នួន ផារ័ត្ន៖«គ្រូបង្រៀន ឪពុកម្តាយ និងអាជ្ញាធរ ត្រូវរួមគ្នាយកចិត្តទុកដាក់លើសុវត្ថិភាពសិស្ស»
លោក នួន ផារ័ត្ន អភិបាលរងសាលារាជធានីភ្នំពេញ ពិនិត្យ សម្ភារ សម្លាប់មេរោគនៅវិទ្យាល័យបាក់ទូក
×![]()
ដោយ: សារព័ត៌មានថ្មីៗ
អភិបាលរងសាលារាជធានីភ្នំពេញ លោក នួន ផារ័ត្ន បានចុះទៅពិនិត្យមើលការត្រៀមលក្ខណៈរបស់វិទ្យាល័យបាក់ទូក ក្នុងការបើកដំណើរការថ្នាក់រៀនឡើងវិញ។ ក្រសួងអប់រំ យុវជន និងកីឡា បានប្រកាសអនុញ្ញាតឱ្យគ្រឹះស្ថានអប់រំបើកទ្វារទទួលសិស្សានុសិស្សក្នុងដំណាក់កាលទី២ ចាប់ពីថ្ងៃចន្ទទី៧ខែកញ្ញាសប្តាហ៍ក្រោយនេះទៅ។
វិទ្យាល័យបាក់ទូក គឺជាគោលដៅមួយរបស់អាជ្ញាធរសាលារាជធានីដែលត្រូវពិនិត្យមើលការត្រៀមលក្ខណៈទទួលសិស្សានុសិស្សឡើងវិញ បន្ទាប់ពីវិទ្យាល័យត្រូវបានបិទទ្វារអស់ជាច្រើនខែជំងឺកូវីដ-១៩។
ក្រោមវត្តមានរបស់លោក នួន ផារ័ត្ន អភិបាលរងសាលារាជធានី គណៈគ្រងវិទ្យាល័យ និងលោកគ្រូ អ្នកគ្រូបានចូលរួមសម្អាតបន្ទប់រៀន បន្ទប់ទឹក ដោយការបាញ់ថ្នាំសម្លាប់មេរោគ ព្រមទាំងពិនិត្យឧបករណ៍សម្លាប់មេរោគ (ក្លោងទ្វារបាញ់ទឹកសម្លាប់មេរោគ) ដែលត្រូវប្រើប្រាស់នៅថ្ងៃបើកសាលារៀនផង។
លោក នួន ផារ័ត្ន អភិបាលរង សាលារាជធានីភ្នំពេញ កំពុង ថ្លែងទៅកាន់លោកគ្រូ អ្នកគ្រូ និងសិស្សានុសិស្ស ក្នុង ទីធ្លាវិទ្យាល័យបាក់ទូកព្រឹកថ្ងៃទី ៣ ខែ កញ្ញា នេះ
លោក នួន ផារ័ត្ន អភិបាលរង សាលារាជធានីភ្នំពេញ កំពុង ថ្លែងទៅកាន់លោកគ្រូ អ្នកគ្រូ និងសិស្សានុសិស្ស ក្នុង ទីធ្លាវិទ្យាល័យបាក់ទូកព្រឹកថ្ងៃទី ៣ ខែ កញ្ញា នេះ
នាយកវិទ្យាល័យបាក់ទូក លោក តូច កន្តាល់ បានអះអាងប្រាប់សារព័ត៌មានថ្មីៗថា គណៈគ្រប់គ្រងគ្រឹះស្ថានសិក្សារបស់លោក នឹងអនុវត្តតាមវិធានអនាម័យដែលណែនាំដោយក្រសួងសុខាភិបាល និងក្រសួងអប់រំ ពោលគឺការរក្សាគម្លាតសុវត្ថិភាព ការពាក់ម៉ាស់ជាប្រចាំ និងការលាងសម្អាតដៃញឹកញាប់។
លោកនាយកវិទ្យាល័យបានបន្ថែមយ៉ាងដូច្នេះថា៖«យើងនឹងដាក់ក្លោងទ្វារសម្លាប់មេរោគចំនួន៣កន្លែងផ្សេងគ្នាដែលសិស្សានុសិស្ស និងលោកគ្រូអ្នកគ្រូត្រូវឆ្លងកាត់។ យើងមិនអនុញ្ញាតឱ្យមានបើកអាហារដ្ឋាននៅក្នុងវិទ្យាល័យឡើយ រួមទាំងការលក់ដូរនៅក្រៅរបងសាលារៀន។ សិស្សានុសិស្សត្រូវវេចខ្ចប់អាហារពីផ្ទះមកខ្លួនឯង។»។
សុវត្ថិភាពរបស់សិស្សានុសិស្សត្រូវការការចូលរួមពីមជ្ឈដ្ឋាន៣។ នេះគឺជាការកត់សម្គាល់របស់លោក នួន ផារ័ត្ន អភិបាលរងសាលារាជធានីភ្នំពេញ ទៅដល់គណៈគ្រប់គ្រងវិទ្យាល័យបាក់ទូក និងសិស្សានុសិស្ស។ លោកអភិបាលរងបានមានប្រសាសន៍ថា៖«ទីមួយ គឺគណៈគ្រប់គ្រងសាលា និងលោកគ្រូអ្នកគ្រូត្រូវគោរពតាមវិធានអនាម័យរបស់ក្រសួងសុខាភិបាល និងស្តង់ដាររបស់ក្រសួងអប់រំ។ ទីពីរ ឪពុកម្តាយ ឬអាណាព្យាបាលត្រូវត្រៀមលក្ខណៈឱ្យបានល្អសម្រាប់កូនៗរបស់ពួកគេ ដូចជា ទឹកអាល់កុល ឬជែលលាង និងម៉ាស់ការពារ និងទីបី គឺកិច្ចសហការរបស់អាជ្ញាធរជាមួយគណៈគ្រប់គ្រងគ្រឹះសា្ថនសិក្សាក្នុងមូលដ្ឋានដើម្បីរៀបចំសណ្តាប់ធ្នាប់ជុំវិញសាលារៀន។»។
គួរបញ្ជាក់ថា ក្នុងដំណាក់កាលនៃការបើកគ្រឹះស្ថានសិក្សាដំណាក់កាលទីពីរនេះ ដំណើរការនៃការសិក្សានៅក្នុងថ្នាក់រៀនផ្ទាល់នៅមិនទាន់អាចប្រព្រឹត្តទៅបានពេញលេញដូចធម្មតានៅឡើយដែរ។ សិស្សានុសិស្ស ក៏ត្រូវបានដាក់ឱ្យអង្គុយនៅឃ្លាតគ្នា ហើយការជួបជុំនៅក្នុងទីធ្លាក៏ត្រូវបានហាមឃាត់ដែរ។
ក្នុងដំណាក់កាលទីមួយ ក្រសួងអប់រំបានអនុញ្ញាតឱ្យតែគ្រឹះស្ថានសិក្សាឯកជនអន្តរជាតិដែលអាចបើកសាលារៀនរបស់ពួកគេបាន ដោយត្រូវអនុវត្តតាមវិធានការអនាម័យ និងសុវត្ថិភាពសុខាភិបាល៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
