COVID-19
អន្តរជាតិ
យុទ្ធនាការបោះឆ្នោតលោក បៃឌិន រៃអង្គាសប្រាក់បាន៣៦៤លានដុល្លារក្នុងខែសីហា
លោក ចូ បៃឌិន បេក្ខជនប្រធានាធិបតីអាមេរិកមកពីបក្សប្រជាធិបតេយ្យ (AFP)
×![]()
បេក្ខជនប្រធានាធិបតីអាមេរិកមកពីបក្សប្រជាធិបតេយ្យ លោក ចូ បៃឌិន រៃអង្គាសប្រាក់បានរហូតដល់ ៣៦៤លានដុល្លារក្នុងខែសីហា ទោះបីជាមួយផ្នែកធំត្រូវបានធ្វើឡើងតាមរយៈប្រព័ន្ធអនឡាញ ព្រោះតែជំងឺរាតត្បាតសកល COVID-19 ។ តួលេខនេះ បានបំបែកកំណត់ត្រាក្នុងចំណោមការធ្វើយុទ្ធនាការរៃអង្គាសប្រាក់ប្រចាំខែសម្រាប់ការបោះឆ្នោត។ 
ក្រុមយុទ្ធនាការបោះឆ្នោតរបស់លោក បៃឌិន បានបញ្ជាក់នៅថ្ងៃទី ១ ខែកញ្ញាថា អតីតអនុប្រធានាធិបតីអាមេរិករូបនេះ រៃអង្គាសប្រាក់បានរហូតដល់ ៣៦៤,៥ លានដុល្លារ ហើយក្នុងនោះ លុយ២០៥លានដុល្លារ ត្រូវបានចូលឧបត្ថម្ភតាមរយៈអនឡាញពីសំណាក់អ្នកចូលវិភាគទានតូចៗ។ ជាមួយតួលេខនេះ លោក បៃឌិន បានបំបែកកំណត់ត្រារបស់អតីតប្រធានាធិបតី បារ៉ាក់ អូបាម៉ា ។
ក្នុងខែកញ្ញា ឆ្នាំ២០០៨ លោក អូបាម៉ា បានបង្កើតកំណត់ត្រារៃអង្គាសប្រាក់សម្រាប់យុទ្ធនាការរកសំឡេងឆ្នោត ដោយអាចប្រមូលរហូតដល់២០០លានដុល្លារ។ នេះបើតាមរបាយការណ៍របស់កាសែតអាមេរិក New York Times ។
ក្នុងសេចក្តីថ្លែងការណ៍អរគុណដល់អ្នកគាំទ្ររបស់លោក អ្នកនយោបាយវ័យ៧៧ឆ្នាំរូបនេះ បាននិយាយថា តួលេខនេះ ធ្វើឲ្យលោកភ្ញាក់ផ្អើលជាខ្លាំង។ តាមការចុះផ្សាយរបស់ទីភ្នាក់ងារព័ត៌មាន AFP លោក បៃឌិន លើកឡើងដូច្នេះថា៖«លុយជាង ២០៥លានដុល្លារ ឬប្រមាណ ៥៧ភាគរយនៃលុយដែលយើងរៃអង្គាសបាន គឺបានមកពីការឧបត្ថម្ភតាមអនឡាញ ដោយប្រជាជននាំគ្នាចូលលុយម្នាក់ ៥ដុល្លារ ១០ដុល្លារ និង ២០ដុល្លារ ជាដើម»។
ទន្ទឹមគ្នានេះ លោក បៃឌិន បានទទូចឲ្យអ្នកគាំទ្ររបស់លោកបន្តចូលវិភាគទានលុយតទៅទៀត ដើម្បីធានាថា ពួកគេមានឱកាសយកឈ្នះការបោះឆ្នោតនាពេលខាងមុខប្រឆាំងនឹងប្រធានាធិបតី ដូណាល់ ត្រាំ ។ ម្យ៉ាងវិញទៀត លោកអះអាងថា ម៉ាស៊ីនរកលុយរបស់លោកត្រាំ គឺគាំទ្រដោយអ្នកខាងក្រៅ និងលុយខ្មៅ។
ក្នុងខែកក្កដា លោក ដូណាល់ ត្រាំ និងគណៈកម្មាធិការជាតិបក្សសាធារណរដ្ឋ រៃអង្គាសបានប្រាក់ ១៦៥លានដុល្លារ ។ តួលេខនេះ គឺច្រើនជាងលុយដែលរៃអង្គាសបានដោយបក្សប្រជាធិបតេយ្យរបស់លោក បៃឌិន ដែលរកបាន ១៤០លានដុល្លារ ក្នុងខែតែមួយ។
សូមបញ្ជាក់ថា កាលពីថ្ងៃទី១២ ខែសីហា លោក បៃឌិន បានសម្រេចជ្រើសរើសអតីតគូប្រជែងក្នុងបក្សអ្នកស្រី កាម៉ាឡា ហារីស (Kamala Harris) ឲ្យធ្វើជាបេក្ខភាពអនុប្រធានាធិបតីសម្រាប់ការបោះឆ្នោតខែវិច្ឆិកាខាងមុខ។ ក្រោយការជ្រើសរើសនេះ ប្រាក់ឧបត្ថម្ភសម្រាប់ការបោះឆ្នោតលោក រៃអង្គាសបានរហូតដល់ ២៦លានដុល្លារក្នុងពេលត្រឹម២៤ម៉ោងប៉ុណ្ណោះ៕
Tag:
សហរដ្ឋអាមេរិក
ចូ បៃឌិន
ការបោះឆ្នោតអាមេរិក
© រក្សាសិទ្ធិដោយ thmeythmey.com
