ជាតិ
សង្គមជាតិ
ក្រសួងពាណិជ្ជកម្មឲ្យក្រុមហ៊ុនប្រមូលម្សៅទឹកដោះគោ Nutrilatt ហើយបញ្ឈប់ការនាំចូល និងចែកចាយ
សកម្មភាពមន្ត្រិសាខាក.ប.ប. ខេត្តត្បូងឃ្មុំ ចុះត្រួតពិនិត្យលើហាងលក់ផលិតផលម្សៅទឹកដោះគោនាថ្ងៃទី៣ ខែកញ្ញា រូបភាពពីក.ប.ប.
×![]()
ដោយ: ថ្មីៗ
ភ្នំពេញ៖ ក្រសួងពាណិជ្ជកម្មប្រកាសឲ្យក្រុមហ៊ុនបញ្ឈប់ការនាំចូល និងចែកចាយម្សៅទឹកដោះគោម៉ាក Nutrilatt ដែលមានលេខកូដ៤៨៧,៤៨៨,៥៣៦,៥៣៧,៥៣៨ និង៥៣៩ ចរាចរទៅទីផ្សារ ហើយតម្រូវឲ្យក្រុមហ៊ុនប្រមូលផលិតផលនោះមកវិញពីទីផ្សារ និងអ្នកប្រើប្រាស់ជាបន្ទាន់។
ការឈានដល់ការប្រកាសមិនឲ្យក្រុមហ៊ុននាំចូល ចែកចាយ និងប្រមូលមកវិញនូវម្សៅទឹកដោះគោម៉ាក Nutrilatt នេះ ដោយកន្លងមកក្រសួងពាណិជ្ជកម្មបានទទួលពាក្យបណ្តឹងពីមាតាបិតាដែលបានប្រើប្រាស់ម្សៅទឹកដោះគោនេះ បណ្តាលឲ្យកូនរបស់ពួកគេមានអាការស្លេកស្លាំង។
អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំនៃក្រសួងពាណិជ្ជកម្ម(ក.ប.ប.) បានបង្ហាញលទ្ធផលការធ្វើតេស្តនៃម្សៅទឹកដោះគោ Nutrilatt ដែលមានលេខកូដ ៤៨៧,៤៨៨,៥៣៦,៥៣៧,៥៣៨ និង៥៣៩ ថាម្សៅប្រភេទដែលឲ្យទារកអាយុ០ទៅ៦ខែ និង៦ទៅ១២ខែ ប្រើប្រាស់ គឺមានកម្រិតជាតិដែក និងជាតិស័ង្កសីទាប ដែលខុសពីបរិមាណដែលបានបញ្ជាក់នៅក្នុងស្លាកសញ្ញាផលិតផលថាមានជាតិដែកជិត៦មីលីក្រាម ហើយជាតិស័ង្កសីមានជិត មីលីក្រាម។ ជាក់ស្តែងមានជាតិដែកតែត្រឹម០.២៥មីលីក្រាម និងជាតិស័ង្កសីតែ២.២៧ និង២.៤តែប៉ុណ្ណោះ។
ដោយឃើញពីបញ្ហានេះ ក្រសួងពាណិជ្ជកម្មនឹងប្រមូលផលិតផលទាំងអស់ពីទីផ្សារដើម្បីប្រគល់ជូនអគ្គនាយកដ្ឋាន ក.ប.ប.ដើម្បីបន្តនិតីវិធី និងដើម្បីបន្តបញ្ជាក់ពីគុណភាព និងលក្ខខណ្ឌតម្រូវនានាចំពោះផលិតផលនេះក្នុងរយៈពេល៣ខែ។
ដើម្បីកុំឲ្យប៉ះពាល់ដល់សុខភាពទារក និងកុមារ ក្រសួងពាណិជ្ជកម្មតម្រូវឲ្យម្ចាស់ផ្សារទំនើប ឱសថស្ថាន និងហាងលក់ទំនិញទូទាំងប្រទេសផ្អាកការតាំងលក់នូវផលិតផលនេះ និងត្រូវប្រគល់ជូនអគ្គនាយកដ្ឋាន ក.ប.ប.។
ក្នុងកិច្ចប្រតិបត្តិការប្រមូលផលិតផលនេះ ក្រសួងពាណិជ្ជកម្មបានចាត់ឲ្យអគ្គនាយកដ្ឋានក.ប.ប.ចុះត្រួតពិនិត្យនៅតាមបណ្តាផ្សារទំនើប ឱសថស្ថាន និងហាងលក់ទំនិញនានា ដើម្បីដកហូតនូវផលិតផលនោះមកវិញ។
ក្រសួងពាណិជ្ជកម្មអំពាវនាវឲ្យមាតាបិតាបញ្ឈប់នូវការប្រើប្រាស់ផលិតផលនេះជាបន្ទាន់។ ក្នុងករណីមាតាបិតាដែលបានប្រើផលិតផលនេះបណ្តាលឲ្យកូនមានសុខភាពមិនល្អ ពួកគេអាចមកដាក់ពាក្យបណ្តឹងនៅអគ្គនាយកដ្ឋានក.ប.ប. ផ្លូវលេខ១៨ ភូមិក្តីតាកុយ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ឬខលតាមលេខទូរសព្ទ០៩២ ៨៣០ ៨៥៦។
ទាក់ទងនឹងការដកហូត និងបញ្ឈប់ឲ្យក្រុមហ៊ុននាំចូល និងចែកចាយផលិតផលម្សៅទឹកដោះគោម៉ាក Nutrilatt ខាងក្រុមហ៊ុនមិនអាចផ្តល់ព័ត៌មានអំពីបញ្ហានេះឡើយ ។ «ក្រុមហ៊ុនខ្ញុំសុំមិនបកស្រាយលើបញ្ហានេះទេ»។ នេះជាការរៀបរាប់របស់តំណាងក្រុមហ៊ុនម្សៅទឹកដោះគោម៉ាក Nutrilatt ដែលបានបញ្ជាក់ប្រាប់អ្នកសារព័ត៌មានថ្មីៗតាមទូរសព្ទ។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានបញ្ជាក់ថា ក្រសួងនឹងអនុញ្ញាតឲ្យមាតាបិតាដាក់ពាក្យបណ្តឹងមកអគ្គនាយកដ្ឋាន ក.ប.ប.ត្រឹមថ្ងៃទី៥ ខែកញ្ញា ដើម្បីបញ្ជូនពាក្យបណ្តឹង និងឯកសារទៅក្រុមហ៊ុននោះត្រួតពិនិត្យ។
លោកបានរៀបរាប់ដូច្នេះថា៖«កិច្ចប្រជុំកាលពីថ្ងៃទី១ កញ្ញា ២០២០ សម្របសម្រួល និងដឹកនាំអង្គប្រជុំដោយក្រសួងពាណិជ្ជកម្ម មានការចូលរួមពីសំណាក់ក្រុមហ៊ុន (មួយក្រុម រួមទាំងមេធាវីផង) និងក្រុមមាតាបិតា បានឯកភាពឲ្យក្រុមមាតាបិតាដាក់ពាក្យបណ្ដឹង ទៅអគ្គនាយកដ្ឋាន កបប ឲ្យបានត្រឹមថ្ងៃទី៥ ខែកញ្ញា ២០២០។ ក្រសួងនឹងបន្តដោះស្រាយបញ្ហានេះតទៅទៀត រហូតចប់សព្វគ្រប់»។
អ្នកនាំពាក្យរូបនេះ បានបញ្ជាក់ថា ក្រសួងពាណិជ្ជកម្មនឹងស្នើកិច្ចសហការជាមួយក្រសួងសុខាភិបាល អគ្គនាយកដ្ឋានគយ រដ្ឋាករ ម្ចាស់ផ្សារទំនើប និងឱសថស្ថានដើម្បីទប់ស្កាត់ការនាំចូល ការលក់ចែកចាយម្សៅទឹកដោះគោដែលមានបញ្ហាដូចមានលេខកូដបញ្ជាក់៕
Tag:
ម្សៅទឹកដោះគោ
កុមារ
សុខភាព
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
