នៅថ្ងៃទី២ កញ្ញា រដ្ឋមន្ត្រីការបរទេសអាមេរិក បានប្រកាសពីវិធានការរឹតបន្តឹងថ្មីបន្ថែមទៀតទៅលើអ្នកការទូតចិនក្នុងទឹកដីអាមេរិក។ ក្រោមការរឹតត្បិតនេះ អ្នកការទូតចិនត្រូវមានការយល់ព្រមពីក្រសួងការបរទេសអាមេរិកមុននឹងទៅទស្សនកិច្ចនៅសាកលវិទ្យាល័យណាមួយ ឬរៀបចំកម្មវិធីវប្បធម៌ដែលមានមនុស្សចូលរួម៥០នាក់ឡើងទៅនៅក្រៅបរិវេណស្ថានទូត។
វិធានការរឹតត្បិតអ្នកការទូតចិន ត្រូវបានវ៉ាស៊ីនតោន ចាត់ទុកជាការឆ្លើយតបទៅនឹងការរឹតបន្តឹងរបស់ប៉េកាំង ទៅលើអ្នកការទូតខ្លួននៅប្រទេសចិន។ នេះក៏ដូចជាយុទ្ធនាការប្រឆាំងការបង្កើនឥទ្ធិពលរបស់ចិន និងសកម្មភាពស៊ើបការសម្ងាត់ផងដែរ។
ក្នុងសន្និសីទសារព័ត៌មានថ្ងៃទី២ ខែកញ្ញា លោក ម៉ៃ ប៉ុមប៉េអូ ប្រមុខការបរទេសអាមេរិក បានអះអាងថា អាមេរិកគ្រាន់តែចង់បានភាពទៅវិញទៅមកប៉ុណ្ណោះ។ លោកថា សេរីភាពរបស់អ្នកការទូតអាមេរិក នៅចិន គឺជាការឆ្លុះបង្ហាញពីសេរីភាពរបស់អ្នកការទូតចិននៅអាមេរិក ហើយអាមេរិកកំពុងសំដៅទៅទិសដៅនេះ។ នេះយោងតាមទីភ្នាក់ងារសារព័ត៌មាន Reuters។
ស្ថានទូតចិន នៅរដ្ឋធានីវ៉ាស៊ីនតោនវិញ បានចេញប្រតិកម្មដោយអះអាងថា ការសម្រេចចិត្តនេះជាការរំលោភយ៉ាងធ្ងន់ធ្ងរលើអនុសញ្ញាក្រុងវីយែនស្តីពីទំនាក់ទំនងការទូត។ ស្ថានទូតចិនបន្ថែមថា អាមេរិកត្រូវកែកំហុស លុបចោលការសម្រេចចិត្តនេះ ផ្តល់ការគាំទ្រ និងសម្រួលដល់អ្នកការទូតចិន ក្នុងការបំពេញសកម្មភាពពាក់ព័ន្ធ។
លើសពីនោះ រដ្ឋមន្ត្រីការបរទេសអាមេរិក ក៏លើកផងដែរពីការគំរាមរបស់បក្សកុម្មុយនីស្តចិន ទៅលើសាកលវិទ្យាល័យអាមេរិក និងឲ្យគណគ្របគ្រងសាកលវិទ្យាល័យផ្តល់ដំណឹងពីការគំរាមនោះ។ លោក ប៉ុមប៉េអូ អះអាងថា ការគំរាមអាចមានក្នុងទម្រង់ជាការផ្តល់ប្រាក់មិនស្របច្បាប់សម្រាប់ការស្រាវជ្រាវ ការលួចកម្មសិទ្ធិបញ្ញា ការបំភ័យនិស្សិតបរទេស និងការទាក់ទាញមនុស្សមានសមត្ថភាពដោយមិនបើកចំហជាដើម។
ចាប់តាំងតែពីទំនាក់ទំនងរវាងប្រទេសទាំង២ ស្ថិតក្នុងស្ថានភាពអាក្រក់ខ្លាំង និងជាពិសេសក្រោយពេលបិទស្ថានកុងស៊ុលគ្នាទៅវិញទៅមក អាមេរិកបានដាក់ការរឹតបន្តឹងដល់អ្នកការទូតចិន ដូចជាតម្រូវឲ្យប្រាប់ពីជំនួបរវាងមន្ត្រីតាមរដ្ឋ និងមូលដ្ឋាននីមួយៗ ក៏ដូចជានៅស្ថាប័នសិក្សា និងស្រាវជ្រាវផងដែរ។
វិទ្យាស្ថានខុងជឺ ក៏ជាមុខសញ្ញារបស់អាមេរិកដែរ។ កាលពីថ្ងៃទី១ កញ្ញាកន្លងទៅ លោក ប៉ុមប៉េអូ បានបង្ហាញសេចក្តីសង្ឃឹមថា វិទ្យាស្ថានខុងជឺនៅតាមសាកលវិទ្យាល័យអាមេរិក នឹងត្រូវបិទត្រឹមចុងឆ្នាំ២០២០។ វិទ្យាស្ថាននេះ ត្រូវបានប្រមុខការបរទេសអាមេរិក ចោទប្រកាន់ថាបានធជ្រើសរើសគិញឲ្យចិន និងជាអ្នករួមគំនិតក្នុងសកម្មភាពរបស់ចិននៅអាមេរិក។
ក្រៅពីនេះ ក្រសួងការបរទេសអាមេរិក ក៏តម្រូវឲ្យគ្រឹះស្ថានសារព័ត៌មានចិន ចុះបញ្ជីជាបេសកកម្មបរទេស។ ចំណែកកាលពីខែមីនា ក្រសួងការបរទេសអាមេរិក បានប្រកាសឲ្យកាត់បន្ថយចំនួនអ្នកសារព័ត៌មានដែលអាចបម្រើការនៅគ្រឹះស្ថានសារព័ត៌មានចិនធំៗ ពី១៦០នាក់មកសល់ត្រឹម១០០នាក់ទៀតផង៕