ក្រុងប៉េកាំង ទទួលជើងហោះហើរពី៨ប្រទេសឡើងវិញ ដោយកម្ពុជាដំណើរការមុនគេ

COVID-19

ជាតិ

អន្តរជាតិ

ក្រុងប៉េកាំង ទទួលជើងហោះហើរពី៨ប្រទេសឡើងវិញ ដោយកម្ពុជាដំណើរការមុនគេ

03, Sep 2020 , 5:06 pm

រូបភាព

យន្តហោះអាកាសចរណ៍ China Southern ហោះហើរនៅព្រលានយន្តហោះទីក្រុងប៉េកាំង។ រូបភាព Xinhua

ដោយ: តន ចាន់រិទ្ធារ៉ា

រដ្ឋធានីប៉េកាំង បានចាប់ផ្ដើមទទួលយកជើងហោះហើរពីប្រទេសចំនួន៨ឡើងវិញចាប់ពីថ្ងៃទី៣ ខែកញ្ញាតទៅ ដែលជានេះជាសញ្ញាបង្ហាញថា ទីក្រុងដ៏ធំមួយនេះចាប់ផ្ដើមដំណើរការជាប្រក្រតីឡើងវិញ។ ជើងហោះហើរពីកម្ពុជា ថៃ និងប្រទេសប៉ែកខាងលិច៥ទៀត ត្រូវបានអនុញ្ញាតឲ្យធ្វើដំណើរទៅប៉េកាំង ព្រោះប្រទេសទាំងនេះមានហានិភ័យជំងឺ COVID-19 ទាប។

ជើងហោះហើរពីកម្ពុជាទៅកាន់ប៉េកាំងនៅថ្ងៃទី៣ ខែកញ្ញា ជាជើងហោះហើរទីមួយដែលចុះចតនៅព្រលានយន្តហោះរដ្ឋធានីចិន គិតតាំងពីខែមីនាមក។ ជាង៦ខែមកនេះ ប៉េកាំង ហាមឃាត់ការធ្វើដំណើរតាមផ្លូវអាកាសពីបរទេសដើម្បីទប់ស្កាត់ការនាំចូលជំងឺ COVID-19 ។ ក្រៅពីកម្ពុជា ជើងហោះហើរពីថៃ ក្រិក ដាណឺម៉ាក អូទ្រីស និងកាណដា ក៏ទទួលបានការអនុញ្ញាតផងដែរ។

បើតាមរដ្ឋបាលអាកាសចរណ៍ស៊ីវិលចិន ប្រទេសទាំងនេះ ទទួលបានភ្លើងខៀវពីរដ្ឋាភិបាលចិនក្នុងចាប់ផ្ដើមការធ្វើដំណើរជើងអាកាសទៅកាន់ប៉េកាំង ក្រោយត្រូវបានវាយតម្លៃថាមានហានិភ័យ COVID-19 ទាប។ នេះបើតាមការផ្សាយរបស់ទូរទស្សន៍ចិន CGTN នៅថ្ងៃទី៣ ខែកញ្ញា។ យ៉ាងណាមិញ លក្ខខណ្ឌសុខភាពតឹងរ៉ឹង នឹងត្រូវអនុវត្តដដែល។

អ្នកដំណើរទាំងអស់ដែលធ្វើដំណើរទៅកាន់ប៉េកាំងតាមជើងយន្តហោះក្រៅស្រុកទាំងអស់ ត្រូវបានមានលិខិតបញ្ជាក់អវិជ្ជមានជំងឺ COVID-19 បីថ្ងៃមុនឡើងយន្តហោះ ខណៈលើកមុនគឺ៥ថ្ងៃ។ ទៅដល់ចិន អ្នកដំណើរទាំងអស់ ត្រូវធ្វើចត្តាឡីស័ក១៤ថ្ងៃ នៅទីតាំងក្រៅប៉េកាំង។ ពួកគេ ក៏ត្រូវធ្វើតេស្តម្ដងទៀតមុនចាកចេញពីទីតាំងនោះ ហើយត្រូវរាយការណ៍ពីកម្ដៅរបស់ខ្លួនចំនួន៧ថ្ងៃបន្ទាប់។

ក្នុងសន្និសីទសារព័ត៌មានថ្ងៃទី៣ ខែកញ្ញា លោក Xu Hejian អ្នកនាំពាក្យរដ្ឋាភិបាលទីក្រុងប៉េកាំង បញ្ជាក់ថា ទីក្រុង នឹងមិនទទួលអ្នកដំណើរលើសពីមួយពាន់នាក់ឡើយ ហើយមានតែប្រជាជនចិន ប្រជាជនប្រទេសខាងលើប៉ុណ្ណោះ ដែលអនុញ្ញាតឲ្យឡើងយន្តហោះ៕