បារាំង និង​សហភាព​អឺរ៉ុប​ចេញមុខ​រិះគន់​អាមេរិក ចំពោះ​ការដាក់ទណ្ឌកម្ម​លើ​មន្ត្រី ICC
អន្តរជាតិ
បារាំង និង​សហភាព​អឺរ៉ុប​ចេញមុខ​រិះគន់​អាមេរិក ចំពោះ​ការដាក់ទណ្ឌកម្ម​លើ​មន្ត្រី ICC
04, Sep 2020 , 8:29 pm        
រូបភាព
រដ្ឋមន្រ្តីការបរទេសបារាំង Jean-Yves Le Drian (ឆ្វេង) និងលោក Josep Borrell ប្រមុខការទូតអឺរ៉ុបនាពេលកន្លងមក។ រូបភាព AFP
រដ្ឋមន្រ្តីការបរទេសបារាំង Jean-Yves Le Drian (ឆ្វេង) និងលោក Josep Borrell ប្រមុខការទូតអឺរ៉ុបនាពេលកន្លងមក។ រូបភាព AFP
​បារាំង និង​សហភាព​អឺរ៉ុប នៅ​ថ្ងៃទី​៣ ខែកញ្ញា បាន​ចេញមុខ​រិះគន់​អាមេរិក​ចំពោះ​ការដាក់ទណ្ឌកម្ម​សេដ្ឋកិច្ច​ទៅលើ​អគ្គ​រដ្ឋអាជ្ញា​នៃ​តុលាការ​ព្រហ្មទណ្ឌ​អន្តរជាតិ​(ICC)​។ បារាំង បាន​និយាយថា អាមេរិក​បានធ្វើ​ការវាយប្រហា​រ​យ៉ាងធ្ងន់ធ្ងរ​ទៅលើ​ស្ថាប័ន​យុត្តិធម៌​ពិភពលោក ខណៈ​អឺរ៉ុប នឹង​បន្ត​គាំទ្រ​ស្ថាប័ន​យុត្តិធម៌​នេះ​ទៀត​។

 
​លោក​ម៉ៃ ប៉ុ​ម​ប៉េ​អូ រដ្ឋមន្ត្រីការបរទេស​អាមេរិក កាលពី​ថ្ងៃទី​២ ខែកញ្ញា​បានសម្រេច​ដាក់ទណ្ឌកម្ម​សេដ្ឋកិច្ច​ទៅលើ​លោកស្រី Fatou Bensouda​អគ្គ​រដ្ឋអាជ្ញារ​នៃ​តុលាការ និង​មន្ត្រីជាន់ខ្ពស់​មួយរូប​ទៀត​។ ទណ្ឌកម្ម​នេះ​ធ្វើឡើង ក្រោយ​តុលាការ​សម្រេច​អនុញ្ញាត​ឲ្យ​បើក​ការស៊ើបអង្កេត​លើ​បទល្មើស​សង្គ្រាម​ប្រព្រឹត្ត​ដោយ​ទាហាន​អាមេរិក នៅ​អា​ហ្វ​ហ្កា​នី​ស្ថាន​។​
 
​បារាំង មិន​គាំទ្រ​អាមេរិក​លើ​រឿង​នេះឡើយ​។ ប្រមុខ​ការបរទេស​បារាំង លោក Jean-Yves Le Drian បាន​រិះគន់​អាមេរិក​ថា វិធានការ​ប្រកាស​នៅ​ថ្ងៃទី​២ កញ្ញា ស្មើ​ទៅនឹង​ការវាយប្រហារ​លើ​តុលាការ និង​ហត្ថលេខី​នៃ​លក្ខន្តិកៈ​ក្រុង​រ៉ូម​។ លោក​បន្ថែមថា វា​ក៏​បង្កើតជា​ឧបសគ្គ​ចំពោះ​គោលការណ៍​ពហុ​និយម និង​ឯករាជ្យភាព​របស់​តុលាការ​ដែរ​។​
 
​ចំណែក​សហភាព​អឺរ៉ុប​វិញ អ្នកនាំពាក្យ​របស់លោក​Josep Borrell ប្រមុខ​ការទូត​អឺរ៉ុប បានបង្ហាញ​ការគាំទ្រ​ដល់​តុលាការ ដោយ​លើកឡើងថា តុលាការ​ព្រហ្មទណ្ឌ​អន្តរជាតិ​កំពុង​រង​បញ្ហា​ប្រឈម​ពី​ខាងក្រៅ​ឥតឈប់ឈរ​។ បើតាម​ទីភ្នាក់ងារ​ព័ត៌មាន AFP មន្ត្រី​នាំពាក្យ​ដដែល​បន្តថា សហភាព​អឺរ៉ុប នឹង​ប្រឆាំង​ការប៉ុនប៉ង​ទាំងឡាយណា​ដែល​ធ្វើ​ឲ្យ​ប៉ះពាល់​ដល់​ប្រព័ន្ធ​យុ​ត្តិ​ធ​ម៍​អន្តរជាតិ ដោយ​រារាំង​ការងារ​ស្នូល​របស់​ស្ថាប័ន​តុលាការ​។​
 
​មិន​ត្រឹមតែ​រដ្ឋ​ឡើយ​ដែល​ប្រឆាំង​ទណ្ឌកម្ម​អាមេរិក សូម្បីតែ​អង្គការសិទ្ធិមនុស្ស Human Rights Watch ក៏​ចេញមុខ​រិះគន់​ទីក្រុង​វ៉ាស៊ីនតោន​ដែរ​។ អង្គការ​មួយ​នេះ​បាន​លើកឡើងថា​ការ សកម្មភាព​របស់​រដ្ឋ​បាល​លោក​ប្រធានាធិបតី ដូ​ណា​ល់ ត្រាំ បង្ហាញ​ពី​ការមិន​ខ្វាយខ្វល់​ចំពោះ​ជនរងគ្រោះ​នៃ​បទល្មើស​ដ៏​អាក្រក់​បំផុត​ក្នុង​ពិភពលោក​។​
 
​មិនមែនជា​រឿង​ចម្លែក​ដែល​អាមេរិក​ចាត់វិធានការ​បែបនេះ​។ កាលពី​ឆ្នាំ​២០០២ សភា​អាមេរិក​ថែមទាំង​បានអនុម័ត​ច្បាប់ Hague Invasion Act ដែ​អនុញ្ញាត​ឲ្យ​ប្រធានាធិបតី​ប្រើ​កម្លាំងយោធា ដើម្បី​ដោះលែង​កងទ័ព​អាមេរិក​ក្នុងករណី​ត្រូវបាន ICC ឃុំឃាំង​ទៀតផង​។ កាន់តែ​ភ្ញាក់ផ្អើល ច្បាប់​នេះ ក៏​អនុញ្ញាត​ឲ្យ​ទាហាន​អាមេរិក​វាយ​ចូល​ទីក្រុង​ឡាអេ ប្រទេស​ហូ​ឡង់​ដែលជា​ទីស្នាក់ការ​របស់​តុលាការ​ទៅទៀត​។​
 
​ការខ្វែងគំនិត​គ្នា​ពេលនេះ ជា​ចំណែក​តូច​មួយ​នៃ​ការ​គោលនយោបាយ​បញ្ច្រាស​គ្នា​រវាង​អឺរ៉ុប និង​អាមេរិក ក្រោយ​ការដាក់ចេញ​គោលនយោបាយ​ជាតិនិយម​របស់លោក​ត្រាំ ដែល​គិតពី​ប្រយោជន៍​អាមេរិក​ជាមុន នៅពេល​សហភាព​អឺរ៉ុប​មាន​ទំនោរ​ដឹកនាំ​បែប​ពហុ​និយម​។  សំណុំរឿង​ជាច្រើន​ដូចជា​ពាណិជ្ជកម្ម កម្មវិធី​នុយក្លេអ៊ែរ​អ៊ីរ៉ង់ ការប្រែប្រួល​អាកាសធាតុ និង​តួនាទី​ក្នុងការ​ដឹកនាំ​របស់​អង្គការ​ណា​តូ សុទ្ធតែជា​រឿង​អាមេរិក និង​អឺរ៉ុប​ដើរ​ផ្ទុយគ្នា​៕

Tag:
 បារាំង​
  អឺរ៉ុប​
  ICC
© រក្សាសិទ្ធិដោយ thmeythmey.com