សង្គមអន្តរជាតិ
អន្តរជាតិ
ដោយខ្លាចចិន កោះប៉ាឡាវស្នើអាមេរិកឲ្យដាក់មូលដ្ឋានទ័ព និងជួយផ្នែកសេដ្ឋកិច្ច
ប្រធានាធិបតីប៉ាឡាវ Tommy Remengesau ។ រូបភាព AFP
×![]()
ដោយ: តន ចាន់រិទ្ធារ៉ា
ប៉ាឡាវ ដែលដែនកោះនៃមហាសមុទ្រប៉ាស៊ីហ្វិក បានស្នើឲ្យអាមេរិកដាក់មូលដ្ឋានយោធាក្នុងទឹកដីរបស់ខ្លួន ដើម្បីពង្រឹងទំនាក់ទំនង ស្រោចស្រង់ផ្នែកសេដ្ឋកិច្ច និងទប់ទល់ឥទ្ធិពលរបស់ចិន។ សំណើនេះធ្វើឡើង អំឡុងពេលដំណើរទស្សនកិច្ចរបស់រដ្ឋមន្ត្រីការពារជាតិអាមេរិក ម៉ាក អេស្ពើ នៅប្រទេសដ៏តូចមួយនេះកាលពីសប្ដាហ៍មុន។ 
ប្រធានាធិបតីប៉ាឡាវ Tommy Remengesau បានស្នើដោយផ្ទាល់ទៅកាន់រដ្ឋមន្ត្រីការពារជាតិអាមេរិក ម៉ាក អេស្ពើ ឲ្យអាមេរិកដាក់មូលដ្ឋានទ័ពក្នុងប្រទេសរបស់លោក ដែលមានទីតាំងចំកន្លែងប្រទាញប្រទង់ឥទ្ធិពលរបស់អាមេរិក និងចិន។ ប៉ាឡាវ និងប្រទេសមួយចំនួននៅតំបន់មហាសមុទ្រប៉ាស៊ីហ្វិកនេះ ក្លាយជាគោលដៅរបស់ចិនក្នុងការផ្ដាច់ដង្ហើមការទូតរបស់តៃវ៉ាន់ ហើយកន្លងមក ប្រទេសក្នុងតំបន់នេះច្រើនហើយដែលងាកទៅចិន។
«សំណើរបស់ប៉ាឡាវទៅកាន់យោធាអាមេរិកមានលក្ខណៈធម្មតាៗ គឺកសាងមូលដ្ឋានប្រើប្រាស់រួមគ្នា ហើយបន្ទាប់មកអាចដាក់ទ័ពជាទៀងទាត់បាន។» លោក Remengesau និយាយបែបនេះក្នុងលិខិតផ្ញើឲ្យលោក អេស្ពើ ដែលចេញផ្សាយដោយការិយាល័យប្រធានាធិបតីផ្ទាល់។ នេះបើតាមការផ្សាយរបស់ទីភ្នាក់ងារព័ត៌មាន AFP នៅថ្ងៃទី៤ ខែកញ្ញា។
ក្នុងលិខិតដដែល ប៉ាឡាវដែលមានប្រជាជន២២០០០នាក់ ស្វាគមន៍ការដាក់មូលដ្ឋានទ័ព ប្រើប្រាស់កំពង់ផែ និងមូលដ្ឋានអាកាសសម្រាប់យោធាអាមេរិក។ លោក Remengesau ក៏ស្នើសុំវត្តមានកងឆ្មាំការពារឆ្នេរអាមេរិកពង្រាយនៅប៉ាឡាវដើម្បីជួយការពារធនធានធម្មជាតិដ៏ហូរហៀផងដែរ។ ដែនធម្មជាតិរបស់ប៉ាឡាវមានទំហំស្មើប្រទេសអេស្ប៉ាញ ដែលនេះជាការលំបាកសម្រាប់ប្រទេសតូចតាចប៉ាឡាវនេះតែម្ដង។
តាមពិតទៅនោះ ប៉ាឡាវដែលជាប្រទេសគ្មានកងទ័ព បានពឹងផ្អែកលើយោធាអាមេរិកដើម្បីការពារខ្លួនក្រោមកិច្ចព្រមព្រៀងទ្វេភាគី។ ក្រោមកិច្ចព្រមព្រៀងនេះ យោធាអាមេរិកអាចចូលទឹកដីប៉ាឡាវគ្រប់ពេល ទោះជាបច្ចុប្បន្នអាមេរិកមិនបានពង្រាយយោធាជាអចិន្ត្រៃយ៍នៅប្រទេសតូចនេះក្ដី។ ជាមួយនឹងការសាងសង់មូលដ្ឋានយោធារបស់អាមេរិក លោក Remengesau ក៏អះអាងដែរថា វានឹងជួយប៉ាឡាវផ្នែកសេដ្ឋកិច្ចផងដែរខណៈ COVID-19 កំពុងរាតត្បាតនោះ។
វត្តមានរបស់អាមេរិក ក៏នឹងជួយទប់ទល់ឥទ្ធិពលចិនផងដែរ។ នៅតំបន់ប៉ាស៊ីហ្វិក ចិនបានអូសទាញប្រទសចំនួនពីរកាលពីឆ្នាំមុនឲ្យផ្ដាច់ទំនាក់ទំនងជាមួយតៃវ៉ាន់ ឯប៉ាឡាវដែលជាមិត្តភក្តិរបស់តៃវ៉ាន់ ក៏ត្រូវបានអន្ទងដោយចិនដែរ ប៉ុន្តែបានទាត់ចោលរហូតដល់ចិនហាមជនជាតិខ្លួនទៅលេងប្រទេសនេះទៀតផង។
ដោយមិននិយាយចំឈ្មោះចិន លោក Remengesau និយាយថា ប្រទេសដែលបង្កអស្ថិរភាពបានកេងចំណេញពីស្ថានភាព COVID-19 ក្នុងប្រទេសក្រីក្រតាមរយៈការផ្ដល់កម្ចីនានា។ មេដឹកនាំប៉ាឡាវរូបនេះប្រាប់លោក អេស្ពើ ថា ជំនួយរបស់ចិនជះឥទ្ធិពលប្រជាជនក្នុងស្រុក ហើយក៏ប៉ះពាល់ដល់ការសម្រេចចិត្តក្នុងការរាប់អានមិត្តភក្តិដែរ៕
Tag:
ចិន
អាមេរិក
ប៉ាឡាវ
© រក្សាសិទ្ធិដោយ thmeythmey.com
