សាលារៀនរដ្ឋជាង៦០០នៅខេត្តសៀមរាបបានត្រៀមខ្លួនសម្រាប់ការចូលរៀនឡើងវិញ

COVID-19

ជាតិ

សាលារៀនរដ្ឋជាង៦០០នៅខេត្តសៀមរាបបានត្រៀមខ្លួនសម្រាប់ការចូលរៀនឡើងវិញ

05, Sep 2020 , 10:59 am

រូបភាព

វិទ្យាល័យ១០មករា ១៩៧៩ សម័យប្រឡងបាក់ឌុប ឆ្នាំ២០១៩

ដោយ: អុីសា រ៉ហានី (Isa Rohany)

សៀមរាប៖ អនុវត្តន៍តាមគោលការណ៍ណែនាំរបស់ក្រសួងអប់រំ យុវជន និងកីឡា ដែលអនុញ្ញាតឱ្យបើកគ្រឹះស្ថានអប់រំឡើងវិញនាថ្ងៃទី៧ កញ្ញា នេះ មន្ទីរអប់រំខេត្តសៀមរាបបាននិងកំពុងរៀបចំឱ្យតាមសាលាទាំងអស់ ធ្វើអនាម័យ និងកែទម្រង់តាមថ្នាក់រៀន ដើម្បីស្របតាមការណែនាំរបស់ក្រសួង។ គ្រឹះស្ថានអប់រំជាង៦០០ក្នុងខេត្តសៀមរាប បានត្រៀមលក្ខណៈរួចរាល់សម្រាប់ការចូលរៀនឡើងវិញនេះ។

ប្រធានមន្ទីរអប់រំ យុវជន និងកីឡា ខេត្តសៀមរាប លោក លី ប៊ុនណា បានឱ្យដឹងថា បន្ទាប់ពីមានគោលការណ៍ណែនាំរបស់ក្រសួងឱ្យបើកសាលាឡើងវិញ មន្ទីរបានចាត់ឱ្យសាលាក្នុងខេត្តទាំងអស់សម្អាតអនាម័យតាមសាលារៀន ហើយពេលសាលារៀនរដ្ឋទាំងនោះបាននិងកំពុងរៀបចំតាមគោលការណ៍សុវត្ថិភាព ដើម្បីការការពារជំងឺកូវីដ១៩។ លោកប្រធានមន្ទីរពន្យល់ថា គ្រឹះស្ថានអប់រំដែលត្រៀមបើកដំណើរការឡើងវិញនៅថ្ងៃទី៧ កញ្ញា រួមមានមតេយ្យសិក្សាដាច់ដោយឡែកចំនួន ១៩សាលា គ្រឹះស្ថានបឋមសិក្សាមាន ៥០៧ និងមធ្យមសិក្សាចំនួន ១២៣សាលា ដែលសរុបមានចំនួន ៦៤៩សាលា។

«ប្រសិនបើសាលាមានសិស្សច្រើន យើងរៀបចំឱ្យរៀនតែមួយថ្នាក់តែ១៥ទៅ២០នាក់ប៉ុណ្ណោះ តែដើម្បីដោះស្រាយបាន យើងត្រូវរៀបចំជាវេនខុសៗគ្នា កន្លែងខ្លះរៀប២វេន ខ្លះ៣វេន គឺថាមួយសប្ដាហ៍រៀនតែ៨ម៉ោងទេ ក្រៅពីនោះអាចរៀនឆ្លាស់គ្នា...»។ លោក លី ប៊ុនណា បន្ថែមថា ការបើកសាលារៀនឡើងវិញក្នុងដំណាក់កាលនេះ គឺផ្តោតសំខាន់លើគ្រឹះស្ថានមធ្យមសិក្សា គឺសិក្សា១៨ម៉ោងក្នុងមួយសប្ដាហ៍ ដោយឡែកថ្នាក់មតេយ្យនិងមធ្យម គឺក្នុងមួយសប្ដាហ៍ចូលរៀនក្នុងសាលាតែម្ដងពីរដងប៉ុណ្ណោះ ក្រៅពីនោះពួកគេនឹងទទួលកិច្ចការយកទៅធ្វើនៅផ្ទះ។

ចំណែកសាលាឯកជនវិញ ដោយក្រសួងអប់រំមានគោលការណ៍ណែនាំដាច់ដោយឡែកមួយទៀត មន្ទីរអប់រំខេត្តសៀមរាប នៅព្រឹកថ្ងៃទី៤ កញ្ញានេះ បានប្រជុំដែលចូលរួមដោយតំណាងសាលាឯកជន ពីដំណើរការត្រួតពិនិត្យលក្ខណៈស្ដង់ដា មុននឹងក្រសួងចេញសេចក្ដីសម្រេចឱ្យបើកបង្រៀនឡើងវិញ។ លោក លី ប៊ុនណា ពន្យល់ថា ហេតុផលដែលក្រសួងរៀបចំដូច្នេះ ព្រោះយល់ថា មានសាលាឯកជនមួយចំនួនមានទីតាំងជាលក្ខណៈផ្ទះល្វែង ទើបចាំបាច់ត្រូវពិនិត្យស្ដង់ដា ដោយបារម្ភពីជំងឺកូវីដ១៩។ លោកប្រធានមន្ទីរបញ្ជាក់ថា សាលាឯកជននឹងអាចបើកដំណើរការភ្លាមៗ ប្រសិនបើការចុះពិនិត្យតាមលក្ខណៈស្ដង់ដា និងទទួលបានការសម្រេចពីក្រសួង៕